جامبىل اتىنداعى قازاق مەملەكەتتىك اكادەميالىق فيلارمونياسىنىڭ 90 جىلدىعى اياسىندا تولەپبەرگەن ابدىراشيەۆ اتىنداعى ق ر مەملەكەتتىك اكادەميالىق سيمفونيالىق وركەسترىنىڭ «حح-25» اتتى فەستيۆالىنىڭ اشىلۋ كونسەرتى ءوتتى.
حالىققا كلاسسيكالىق ونەردى ناسيحاتتاۋدى ماقسات ەتكەن فيلارمونيادا ەكىنشى رەت ءوتىپ جاتقان فەستيۆالدىڭ ماقساتى - حح عاسىرداعى جانە زاماناۋي كومپوزيتورلاردىڭ سيمفونيالىق شىعارمالارىن جارىققا شىعارۋ، وتكەن عاسىردا تۋعان يدەيالاردىڭ بۇگىنگى كۇنمەن ۇندەسۋىن پاش ەتۋ، دەپ حابارلايدى aqshamnews.kz.
بيىلعى فەستيۆالدىڭ باستى ماقساتى - شەت ەلدەردەگى جوو ءبىلىم الىپ، جۇمىس ىستەپ، بۇگىنگى كۇنى شەت مەملەكەتتەردە ەتەنە تانىلىپ ۇلگەرگەن قازاق جاستارىنىڭ قازاقستانعا كەلىپ ونەر كورسەتىپ، تىڭدارماندارعا ونەرلەرىن ناسيحاتتاۋ. فەستيۆال-كونسەرتتە قانات وماروۆتىڭ جەتەكشىلىگىندەگى ت.ابدىراشيەۆ اتىنداعى ق ر مەملەكەتتىك اكادەميالىق سيمفونيالىق وركەسترىنىڭ سۇيەمەلدەۋىندە ارنايى بەلگيادان شاقىرىلعان حالىقارالىق بايقاۋلاردىڭ لاۋرەاتى، سكريپكاشى مەرۋەرت كارمەنوۆا ونەر كورسەتتى.
حالىقارالىق بايقاۋلاردىڭ لاۋرەاتى، سكريپكاشى مەرۋەرت كارمەنوۆا:
«جامبىل اتىنداعى قازاق مەملەكەتتىك اكادەميالىق فيلارمونياسىنىڭ مەرەيتويلىق جىلىندا ونەر كورسەتۋ – مەن ءۇشىن زور مارتەبە بولدى. بۇل كەشتە مەن كارول شيمانوۆسكييدىڭ №1 سكريپكاعا ارنالعان كونسەرتىن قازاقستان رەسپۋبليكاسى مەملەكەتتىك اكادەميالىق سيمفونيالىق وركەسترىنىڭ سۇيەمەلدەۋىمەن، ماەسترو قانات وماروۆتىڭ ديريجەرلىك ەتۋىمەن ورىندادىم. ايتا كەتەرلىگى، بۇل تۋىندى قازاقستاندا العاش رەت ورىندالدى. كەشتىڭ ەرەكشە اتموسفەراسى، وركەستردىڭ جوعارى كاسىبيلىگى مەنى قاتتى ءتانتى ەتتى جانە جادىمدا ۇزاق ساقتالاتىنى ءسوزسىز. فيلارمونيا ۇجىمىنا، وركەستر ارتىستەرىنە، ماەسترو قانات وماروۆقا جانە مەنىڭ ونەرىمدى ىستىق ىقىلاسپەن قابىلداعان بارلىق تىڭدارمانعا شىن جۇرەكتەن العىس بىلدىرەمىن. وسىنداي رۋحاني كەشكە قاتىسۋ مەن ءۇشىن ۇلكەن شابىت پەن قۋانىش سىيلادى».
كونسەرتتىك باعدارلامادا الەمدىك سيمفونيالىق ونەردىڭ تاڭداۋلى تۋىندىلارى ۇسىنىلدى. فيلارمونيادا وتكىزىلگەن كەزەكتى ءىس-شارا – داۋىرلەر مەن ۇرپاقتار ءۇنىنىڭ توعىسقان تۇسى، ونەر ارقىلى سالىنعان رۋحاني كوپىردىڭ ناعىز كورىنىسءى بولدى. «حح25» فەستيۆالى الداعى 13،21 ماۋسىم كۇنى كونسەرتتىك باعدارلامامەن جالعاسىن تابادى.
