68 جاستاعى كريستين سورنين ءبىر جىل بۇرىن جۇرەگىنە ەكى رەت كۇردەلى وتا جاساتقان. وتا كەزىندە ول ەسىن ءبىلىپ جاتقان، ويتكەنى دارىگەرلەر تەك جۇرەك تۇسىن عانا جانسىزداندىرعان. ءولىم مەن ءومىر اراسىندا ارپالىسقان كەيىپكەرىمىزگە وتا كەزىندە ديماشتىڭ داۋسى دەمەۋ بولعان كورىنەدى.
كۋميرىنىڭ تۋعان جەرىن كورۋ ءۇشىن 7 مىڭ شاقىرىمدى ارتقا تاستاپ، ارمانىن ورىنداۋعا كەلگەن فرانسۋز ايەل اqshamnews.kz سايتىنا ەكسكليۋزيۆ سۇحبات بەردى. ونىڭ اڭگىمەسى – ومىرگە قۇشتارلىقتىڭ، ونەرگە ادالدىقتىڭ جانە شىنايى ماحابباتتىڭ سيمۆولى.
"مەنى ولىمنەن ەكى ادام قۇتقاردى. ءبىرى - ديماش، ەكىنشىسى - كارديولوگىم"
ءومىر بويى سپورتپەن شۇعىلدانعان كريستيننىڭ دەنساۋلىعى ۋاقىت وتە سىر بەرە باستاعان. دارىگەرلەر كەيىپكەرگە جۇرەك-قان تامىرى اۋرۋى دياگنوزىن قويىپ، وتا جاساۋ كەرەگىن ايتقان. ءبىر قىزىعى، دارىگەر مۇنداي كۇردەلى وتانى جاساۋ بارىسىندا كريستيننىڭ جۇرەك تۇسىن عانا جانسىزداندىرعان. كەيىپكەر 2 ساعات بويى ەسىن ءبىلىپ جاتقان.
"ارينە، قاتتى قورىقتىم، قوبالجىدىم. دارىگەرلەر مەنى تىنىشتاندىرۋ ءۇشىن "سىزگە نە دەمەۋ بەرەدى؟" دەپ سۇرادى. مەن ويلانباستان "ديماشتىڭ ءانى" دەپ جاۋاپ بەردىم. ولار ديماشتىڭ تەگىن ارەڭ جازعانى ەسىمدە. سول ءبىر قورقىنىشتى ساتتە ونىڭ داۋىسى ماعان قاراڭعىداعى شامداي ءۇمىت بەردى"، – دەيدى كريستين.
كريستين سورنين – فرانسيادا تۇراتىن زەينەتكەر. ول ساقتاندىرۋ سالاسىندا قىزمەت ەتسە دە، بوس ۋاقىتىندا تەاتر قويىلىمدارىن ساحنالاپ، ەكى جۇمىستى قاتار الىپ جۇرگەن. كەيىن ول قويىلىمداردى ساحنالاۋ ونەرىن ۇيرەنۋ ءۇشىن كۇيەۋىمەن بىرگە ارگەنتيناعا كوشىپ، يسپان ءتىلىن مەڭگەرگەن. ءقازىر زەينەتتە. كريستين بوس ۋاقىتىندا سۋرەت سالىپ، رومان جازادى. ونىڭ شىعارماشىلىعىنا شابىت بەرگەن ادام – ديماش.
"ءبىر ەستىگەننەن ەلەڭ ەتە قالدىم"
پاندەميا كەزىندە ۇيدە وتىرىپ قالعان كريستين قاتتى قۇلازىعانىن ايتادى. دامىلسىز ويعا شومىلعان ول ديماشتىڭ ونەرىمەن كەزدەيسوق تانىسادى.
"ءبىر كۇنى عالامتوردان ديماشتىڭ كەزدەيسوق ءانىن تىڭداپ قالدىم. "بۇل كىم ءوزى؟" دەگەن سۇراق كەلدى. سەبەبى مەن ادام داۋسىنا كوپ ءمان بەرەتىنمىن. ال ونىڭ داۋسى وتە ەرەكشە. العاش ەستىگەن ءانىم – "ۇمىتىلماس كۇن". سول ساتتەن باستاپ ول مەنى باۋراپ الدى"، – دەيدى كريستين.
فرانسۋز جانكۇيەرىنىڭ ايتۋىنشا، ول ءان تىڭداعاندا ءماتىننىڭ ماعىناسىنا ەمەس، ورىنداۋشىنىڭ داۋىسى مەن ەموسياسىنا ءمان بەرەدى. ديماشتىڭ ونەرىندەگى ەڭ اسەرلى تۇس – ونىڭ ءجۇرىس-تۇرىسى، كوزى مەن ىشكى الەمى ارقىلى ءاننىڭ ءمانىن تىڭدارمانعا جەتكىزۋى.
"مىسالى، "سوعىس پەن بەيبىتشىلىك" ءانىن الايىق. مەن ونىڭ ءسوزىن تولىق تۇسىنبەسەم دە، ديماشتىڭ ەموسياسى، داۋسى، ساحناداعى بولمىسى ارقىلى بۇل ءاننىڭ نە تۋرالى ەكەنىن جۇرەگىممەن سەزەمىن. ول ءان ايتقاندا جانىن سالادى"، – دەيدى ول ەرەكشە ءبىر تولقىنىسپەن.
"ومىرىمدە ەكى-اق ادامنىڭ جانكۇيەرى بولدىم"
كريستين سورنين ومىرىندە ەكى ادامنىڭ عانا جانكۇيەرى بولعان. ءبىرى – بالا كەزدە ونەرگە عاشىق قىلعان فرانسۋز اكتەرى جان مارە، ەكىنشىسى – جۇرەگىنە ءۇمىت سىيلاعان قازاقستاندىق ءانشى ديماش قۇدايبەرگەن.
"ون ەكى جاسىمدا العاش رەت جان مارە ەسىمدى اكتەردىڭ ونەرىن كورىپ، تەاترعا عاشىق بولدىم. ونىڭ وينى مەن حاريزماسى مەنى تەاتر الەمىنە جەتەلەدى. سول ساتتە بولاشاعىمدى ونەرمەن بايلانىستىرامىن دەپ شەشتىم. كەيىنىرەك، رەجيسسۋرانى وقىدىم، قويىلىمدار قويدىم. جان مارە مەنىڭ العاشقى شابىتىم بولدى"، – دەيدى كەيىپكەر.
كەيىن اكتەردىڭ قۇمىراشى بولعانىن بىلگەن كريستين ونىڭ تەك ساحنادا ەمەس، ومىردە دە ونەرمەن تىنىستايتىنىنا تاڭىرقاپتى. جان مارە ومىردەن وتكەن سوڭ، كريستين ونىڭ تۇرعان مەكەنىنە ارنايى بارىپ، جۇمىس ىستەگەن شەبەرحاناسىن كورەدى.
"ونىڭ جۇمىسىن كورىپ، ونىڭ جۇرگەن ىزىمەن ءجۇرۋ – ەرەكشە اسەرگە تولى ءسات. ءبىر ساتكە بولسىن كۋميرىمە جاقىنداي تۇسكەندەي بولدىم. بۇل ءسات مەن ءۇشىن ارماندار ورىندالاتىنىنا دەگەن سەنىمىمە دالەل بولدى"، – دەيدى كريستين.
ەگەر جان مارە كەيىپكەردى تەاتر ونەرىنە باۋلىسا، ديماش سۋرەتكە شابىتتاندىرعان. ول قازاقستان تۋرالى كوپ ىزدەنىپ، مۇندا كەلۋدى تاعاتسىزدانا كۇتكەن.
"قازاقتاردىڭ ءجۇزى جىلى.."
كريستين الماتىعا كەلگەن كۇنى بىزبەن تىلدەسۋگە كەلىستى. ول قالانى ارالاپ ۇلگەرمەگەنىمەن، تۇرعىنداردىڭ جىلى ءجۇزى بىردەن كوزگە تۇسەتىنىن جاسىرمادى.
"بۇرىن قازاقستاندى تەك عالامتوردان باقىلاپ جۇرەتىن ەدىم. ال ءقازىر وسىندا كەلىپ، ءبارىن ءوز كوزىممەن كورگىم كەلدى. نەگە الماتى؟ سەبەبى بۇل قالادا بۇكىل قازاقستاننىڭ تابيعاتىن تاماشالاۋعا بولادى. ادامدارى دا كۇلىمدەپ تۇرادى. مۇندا ءبارى اشىق، جىلى ءجۇزدى. الماتىعا كەلگەلى جاقسى سەزىمدەمىن"، – دەيدى ول.
كريستين الماتىعا كەلۋدى بۇرىننان جوسپارلاپ قويعانىن ايتتى. دەنساۋلىعىنا بايلانىستى، وكىنىشكە قاراي، ديماشتىڭ الماتىدا وتكەن فان-كەزدەسۋىنە قاتىسا الماعان. ءبىراق ول بۇعان مويىمايدى. كەرىسىنشە، قالانىڭ اسەم تابيعاتىن ارالاپ ءجۇرىپ، ونەر يەسىن كوشەدە كورىپ قالسام عوي دەپ ارماندايدى.
الماتىعا كەلگەن قوناق ون كۇن ىشىندە ەلىمىزدىڭ اسەم جەرلەرى كولساي، قايىڭدى، التىنەمەلگە بارۋدى جوسپارلاپ وتىر. بولاشاقتا مىندەتتى تۇردە استاناعا، ءانشىنىڭ مەيرامحاناسىنا، اقتوبەدەگى ديماش وقىعان مەكتەپ پەن مۋزەيىنە بارعىسى كەلەتىنىن جاسىرمادى.
"كۇيەۋىم مەن رەنجىگەندە "ديماش ەمەسپىن عوي" دەپ ازىلدەيدى"
كريستيننىڭ كۇيەۋى دە، ەكى ۇلى دا ونىڭ بۇل قىزىعۋشىلىعىنا تۇسىنىستىكپەن قارايدى. ءتىپتى كەنجەسى شىعارماشىل ادام بولعان سوڭ، اناسىنا شابىت بەرگەن ءانشىنى قولدايدى.
"ۇلىم وتكەندە "جۇرەگىڭە وتا جاسالدى، قازاقستانعا بارىپ ولسەڭ دە، ارمانىڭ جوق شىعار" دەپ قالجىڭدايدى. ال كۇيەۋىممەن ۇرسىسىپ قالساق، ول ماعان "ديماش ەمەسپىن عوي" دەپ قالجىڭدايدى. ءبىراق ولار مەنى تۇسىنەدى. سەبەبى مەنىڭ ومىرگە قۇلشىنىسىمدى كورىپ وتىر. ديماش – مەن ءۇشىن كۋمير عانا ەمەس، شابىت"، – دەيدى ول.
"شىعارماشىلىعىمداعى شارىقتاۋ شەگى"
كريستين سورنين ديماشتىڭ ونەرىمەن تانىسقالى شىعارماشىلىق شارىقتاۋ شەگىنە جەتكەنىن ايتتى.
"سۋرەت سالا باستادىم، رومان جازۋعا وتىردىم. شابىتىم اشىلىپ، ءوزىمدى قايتا تاپقانداي بولدىم. ءبىر جىلدان بەرى رومان جازىپ ءجۇرمىن. ازىرگە ونىڭ قانداي بولارىن بىلمەيمىن. فيلم، الدە تەاتر قويىلىمى بولارىن ۋاقىت كورسەتەدى"، - دەپ قورىتىندىلادى ءسوزىن كەيىپكەر.
ءومىردىڭ ەڭ قيىن ساتتەردى ادامدى ونەر قۇتقارا الادى. كريستيننىڭ وقيعاسى – مۇنىڭ دالەلى.