الماتىدا پوليسيا موپەدتەردى تۇرعان ورنىندا تىركەۋدە، - دەپ حابارلايدى aqshamnews.kz Polisia.kz-كە سىلتەمە جاساپ.
الماتى قالاسىندا موپەدتەردى تىركەۋ جۇمىستارى بەلسەندى تۇردە جالعاسىپ جاتىر. بۇگىنگى كۇنگە دەيىن وسى ساناتتاعى كولىك قۇرالدارىنىڭ 15 مىڭعا جۋىعى تىركەلگەن. قالالىق پوليسيا قىزمەتكەرلەرى ازاماتتاردىڭ قولايلىلىعى ءۇشىن تىركەۋ جۇمىستارىن كولىكتەردىڭ تۇراقتى تۇراعىندا، سونداي-اق ساتۋ ورىندارىندا دا جۇرگىزۋدە. بۇل ءتاسىل موپەد يەلەرىنە كولىكتەرىن قىسقا مەرزىمدە ءارى ىڭعايلى تۇردە زاڭداستىرۋعا مۇمكىندىك بەرەدى. پوليسيا موپەدتى تىركەۋسىز، ارنايى كۋالىكسىز، مەملەكەتتىك ءنومىرسىز جانە ساقتاندىرۋسىز باسقارۋ ق ر زاڭناماسىنا سايكەس اكىمشىلىك جاۋاپكەرشىلىككە اكەپ سوعاتىنىن ەسكەرتەدى. الماتى قالاسىنىڭ اۋماعىندا "زاڭ جانە ءتارتىپ" جانە "پروفيلاكتيكا جىلى" اياسىندا جول قوزعالىسى قاۋىپسىزدىگىن قامتاماسىز ەتۋ باعىتىندا كەشەندى شارالار جۇرگىزىلۋدە.
"موپەدتى تىركەۋ — جاي فورمالدىلىق ەمەس. بۇل — جول قوزعالىسىنا قاتىسۋشىلاردىڭ قاۋىپسىزدىگى مەن ءوزىڭىزدىڭ ازاماتتىق جاۋاپكەرشىلىگىڭىز. بارلىق كولىك يەلەرىن كولىكتەرىن دەر كەزىندە تىركەۋگە شاقىرامىز. پوليسيا بۇل باعىتتاعى باقىلاۋ شارالارىن جۇيەلى تۇردە جالعاستىرادى"، دەدى الماتى قالالىق پد اكىمشىلىك پوليسيا باسقارماسى پروسەسسينگ ورتالىعىنىڭ باستىعى ايدىن مەركىمبايەۆ.
پوليسيا قىزمەتكەرلەرى تىركەلمەگەن موپەدپەن ءجۇرۋ — زاڭ بۇزۋشىلىق ەكەنىن جانە ول ءۇشىن ايىپپۇل سالىناتىنىن، ءتىپتى كولىك قۇرالى تاركىلەنۋى مۇمكىن ەكەنىن تاعى ءبىر مارتە ەسكە سالادى.