«تاربيەسىز بەرىلگەن ءبىلىم ادامزاتتىڭ حاس جاۋى» دەگەن ءپالساپا بار. كوپ ءتىل ءبىلۋ دە بىلىمدىلىكتىڭ بەلگىسى. قازىردە بۇۇ سياقتى الەمدىك مىنبەرلەردە اعىلشىنشا سويلەپ، ميلليارد قىتايدى قىتايشاسىمەن مويىنداتقان، رەسمي ساپارمەن قاي مەملەكەتكە بارسا سول ەل تۇسىنەتىن تىلدە سويلەي بىلەتىن ءبىزدىڭ پرەزيدەنتپەن قالاي ماقتانباسسىڭ. ال انا ءتىلىڭدى ءبىلۋ بۇل ەندى قاسيەتتى مىندەتىڭ. ەندى انا تىلىندە سويلەمەيتىن قانداستارعا كەلسەك بۇل قاسىرەت. بۇل جوعارىدا ايتىلعانداي انا سۇتىمەن بەرىلەتىن تاربيەنىڭ جوقتىعى.
اتا-اناسى پەرەنتىمەن قازاقشا سويلەسپەگەن دەگەن ءسوز. ول ون جەردەن ءبىلىمدى، بىرنەشە ۋنيۆەرسيتەت بىتىرگەن بولسىن ءبارىبىر تاربيە كورمەگەن، انا تىلىنەن ماقۇرىم. ال انا ءتىلىن بىلمەگەن ادامنىڭ ءوز ۇلتىن، وتانىن ءسۇيۋى، پاتريوت بولۋى مۇمكن ەمەس. كەيدە ويلاناسىڭ، وسى ءبىز سياقتى مەملەكتتىك ءتىلى ەكىنشى ورىندا تۇرعان ەل بار ما ەكەن دەپ. ولاي ويلاساڭ، ەلدە مەملەكەتتىك ءتىلدى جاقسى بىلەتىن جانە سونۋ بىلۋگە ۇمتىلعان وزگە ۇلت وكىلدەرىن قايدا قوياسىڭ. ياعني، ولار رۋحاني دۇنيەسى باي ادامدار. ءبىزدىڭ ىشىمىزدە سونداي ۇيرەنۋگە ۇمتىلعاندارعا كۇلەتىن كىسىلەر بار عوي تاعى..
وسىدان ءبىراز جىل بۇرىن سىر بويىنىڭ بوكسى قىزى مارينا ۆولنوۆا 2012 جىلعى لوندون وليمپياداسىندا جارتىلاي فينالدا جەڭىلىس تاۋىپ، رينگتەن ءتۇسىپ، ميكروفون ۇسىنعان جۋرناليست امانكەلدى سەيىتحانوۆقا تازا قازاقشا: - كەشىرىڭدەر اعايىن، مەن بارىمدى سالدىم. ءوزى دە مىقتى بالە ەكەن.. – دەگەنى بار. قالاي ريزا بولمايسىڭ. اينالايىن التىن قىز، ول كەزدە سەنىڭ قولا مەدالىڭ قازاق ەلى ءۇشىن التىننان قىمبات ەدى عوي. كەيىن، ءبىر سۇحباتىندا ءتىل تۋرالى قويىلعان سۇراققا؛ - مەن بالا كەزىمنەن ەكى ءتىلدى تەل ەمىپ ءوستىم. ال قازاقشا ۇيرەنۋ قيىن دەگەندەردى ءبىزدىڭ قازالىعا ءۇش ايعا اپارىپ تاستاڭدار، قالاي سويلەپ كەتكەنىن ءوزى بىلمەي قالادى، - دەگەنى بار. جارايدى، مارينا قىزدى تۋعاننان ءتىلى قازاقشا شىققان دەلىك، ەس بىلە كەلە قازاقشانى قاجەتتىلىك دەپ ۇيرەنگەندەر بار عوي. مىسالى، تاعى سول قىزىلوردانىڭ تۋماسى، داڭقتى اۋىراتلەت يليا يلين شە. سول ازاماتتىڭ قازاقشا سويلەۋدى قولعا العانىنا ءبىر جىل دا بولمادى اۋ. ءقازىر عالامتورعا كۇنارا شىعىپ، قازاقشا امانداسىپ، كۇندەلىكتى جوسپارىمەن قازاقشا بولىسەدى جانە ءتىلى جاتىق. ءتورت قۇبىلاسى تۇگەل سول يلياعا قانداي قاجەتتىلىك. بۇل رۋحاني تولىسقاندىق بەلگىسى. داڭقى دۇرىلدەپ تۇرعان شاعىندا شاقىرعان تالاي ەلگە «ساتىلماعان» سپورتشىنىنىڭ بولاشاعىن ءوز قازاقستانىمەن، مەملەكەتتىك تىلمەن بايلانىستىرعانىنىڭ بەلگىسى بۇل. بولاشاقتا وسىنداي ازاماتتان تاراعان ۇرپاق تا قازاقشا سويلەيتىنىنە سەنىم باسىم.
ال ەندى سانكت-پەتەربۋرگتەن شىققان بلوگەر، ءبىزدىڭ ديماشتىڭ فاناتى يۆان چەرۆينسكيي دەگەن ازامات بار. ول جىگىت ديماش ارقىلى قازاقستاندى جاقسى كورگەنى سونشالىق، بىلتىر قازاقستان ازاماتتىعىن الىپ، الماتىعا كوشىپ كەلىپ، بالالارىن قازاق مەكتەبىنە بەرگەن. ءوزى دە قازاقشا ۇيرەنۋگە مىقتاپ بەت بۇرعان. بۇل دا بولاشاعىن قازاقستانمەن بايلانىستىرعان ادامنىڭ تىرلىگى. ادام سەنبەستەي، سەنبەسكە امال جوق. جۇرگەن جەرىندە سەبەبىن ديماشپەن ءتۇسىندىرىپ، «نە موگۋ جيت بەز سۆويح كازاحوۆ..» دەيدى يۆان باتىر.
سول يۆاننىڭ تىرلىگىنە دە كۇمانمەن قارايتىندار تابىلادى بىزدە. ال ەندى وسىنداي مىسالدارعا مىسقىلداي كۇلەتىندەر بار اۋ. ايتەۋىر، جاتقان كۇمان، جاتقان كۇلكى. نە دەرسىڭ ولارعا.
«ەل بولام دەسەڭ بەسىگىڭدى تۇزە» دەگەن بار. ال بەسىك دەگەن ۇعىم ول- تاربيە، ول- انا سۇتىمەن كەلەتىن تۋعان ءتىل. ازىرگە سول بەسىك تولىق تۇزەلمەي تۇر اۋ. قازاقشا ۇيرەنۋگە ۇمتىلعاندارعا كۇلگەنشە بەسىگىمىزدى تۇزەيىكشى.