جەتىسۋ وبلىسى پانفيلوۆ اۋدانىنىڭ تۇرعىنى باقتىبالا قاسىموۆا 35 جىلدان بەرى سالاۋاتتى ءومىر سالتىن ۇستانادى، - دەپ حابارلايدى aqshamnews.kz ءتىلشىسى 24.kz-كە سىلتەمە جاساپ.
اۋىلدىقتارعا ناعىز ۇلگى كورسەتىپ وتىر. باقتىبالا اپا تاڭمەن تالاسا تۇرىپ، اۋىل سىرتىنداعى جوتاعا جۇگىرىپ شىعادى. بابىن جوعالتپايىن دەپ، سالاۋاتتى ءومىر سالتىن ۇستانۋدى كۇندەلىكتى ادەتكە اينالدىرعان.
"جۇگىرمەسەم، قيمىلداماسام اۋىرىپ قالامىن. تۇرا الماي قالامىن. بالالارىم "جۇگىرمە، قاسقىر بار" دەيدى. قاراماي جۇگىرە بەرەمىن. ول دەنساۋلىق ءۇشىن عوي. مەن سياقتى 85-كە كەلگەن ادام جوق. كوبى قايتىس بولدى. بىر-ەكى ادام عانا بار. ولار تاياقپەن ارەڭ جۇرەدى. ونىڭ جانىندا جۇگىرىپ، ءوتىپ كەتەمىن. ادام ۇمتىلۋ كەرەك. نيەت جاساۋ كەرەك. جاتتىعۋ جاساۋشى ەدىم، كىلەم جوق قوي. 50 رەت وتىرىپ-تۇرامىن، وسى كۇنى قينالماستان 25-20 جاساي سالامىن"، - دەيدى "التىن القا" يەگەرى.
سەكسەننىڭ سەڭگىرىنە شىققان اجە 20 جىلدان اسا بالاباقشا مەڭگەرۋشىسى بولعان. جەتەكشىلىك ەتكەن ۇجىمىمەن بىرگە بۇلدىرشىندەردى ەڭبەككە، بىلىمگە باۋلىدى. بالا تاربيەلەۋ ارقىلى باقتىبالا اپا تۇتاس اۋىلدىڭ ارداقتى اناسىنا اينالدى.
"وسى اۋىلداعى ورتا بۋىن، اعا بۋىننىڭ تاربيەسىنەن وتكەن. سول كىسىنىڭ جولىن باسىپ كەلە جاتىرمىز. بالالارعا تاربيە بەرىپ وتىر. بۇگىندە بۇل جەردە 60 بالامىز بار. ءۇش توبىمىز بار. جۇمىسشىلارىمىز ءبىر ۇجىم بولىپ جۇمىس ىستەپ جاتىر"، - دەيدى بالاباقشا تاربيەشىسى كەنجەگۇل بايمۇقاشيەۆا.
بۇل ءىستى باقتىبالا اپانىڭ قىزى مەن كەلىندەرى جالعاستىرىپ جاتىر. ال، ءوزى اجەلەر ءانسامبلىنىڭ قۇرامىندا كوپشىلىك مادەني شارالارعا قاتىسىپ، اۋىلدىڭ قوعامدىق ومىرىنە بەلسەنە ارالاسادى.
"بۇكىل اۋىلداعى جاستارعا ۇلكەن ونەگە. ءوزىنىڭ بىلگەن اقىلىن ايتىپ وتىرادى. اپامىز سالاۋاتتى ءومىر سالتىن ۇستانادى. ودان بولەك قازاقى قولونەردى قولداپ، دارىپتەپ وتىر"، - دەيدى تالدى اۋىلدىق وكرۋگىنىڭ اكىمى قۋاندىق ءاشىرجانوۆ.
تالدى اۋىلىنا كەلىن بولىپ تۇسكەن باقتىبالا اپا نۇرعازى اتامەن جارتى عاسىر بىرگە عۇمىر كەشتى. ەكەۋى ون ءبىر بالا ءوسىرىپ، قىزىن-قياعا، ۇلىن ۇياعا قوندىردى.
"اتا-انامىزدىڭ تاربيەسىنىڭ ارقاسىندا وسى حالگە جەتتىك. وقىدىق، ءبىلىم الدىق، ءقازىر ەڭبەك ەتىپ جاتىرمىز. اتا-انامىز وسى اۋىلدا ەڭبەك ەتىپ، ەل سىيلاعان، بۇكىل اۋىل سىيلاعان ازاماتتار. اكەم بولماسا دا، ورنىن جوقتاتپاي، ءالى باسىمىزدى قوسىپ، قارا شاڭىراققا جيناپ، باتاسىن بەرىپ، تىلەكتەرىن ايتىپ وتىرادى"، - دەيدى تالدى اۋىلدىق وكرۋگىنىڭ اكىمى قۋاندىق ءاشىرجانوۆ اجەيدىڭ ۇلى ەرعازى ەشقايەۆ.
قيمىل قوزعالىسى شيراق اجە بۇگىندە بەينەتىنىڭ زەينەتىن، ۇل-قىزىنىڭ قىزىعىن كورىپ، نەمەرە-شوبەرەلەرىنىڭ ىستىق ىقىلاسىنا بولەنىپ وتىر.