TikTok پلاتفورماسى جاسوسپىرىمدەردىڭ قاۋىپسىزدىگىن ارتتىرۋ جانە اتا-انالاردىڭ باقىلاۋ مۇمكىندىكتەرىن كەڭەيتۋ ماقساتىندا جاڭا فۋنكسيالاردى ەنگىزەتىنىن حابارلادى. بۇل تۋرالى Aqshamnews.kz سايتى حابارلايدى.
جاڭارتۋلار اتا-انالارعا بالالاردىڭ TikTok-تاعى بەلسەندىلىگىن قاداعالاۋعا، ال جاسوسپىرىمدەرگە قوسىمشادا وتكىزەتىن ۋاقىتىن باسقارۋعا كومەكتەسەدى.
TikTok «وتباسىلىق باپتاۋلار» بولىمىندە اتا-انالارعا جاسوسپىرىمدەردىڭ قوسىمشاعا قولجەتىمدىلىگىن بەلگىلى ءبىر ۋاقىت ارالىعىندا شەكتەۋگە مۇمكىندىك بەرەتىن جاڭا فۋنكسيانى ىسكە قوسۋدى جوسپارلاپ وتىر. سونىمەن قاتار، پلاتفورما ساعات 22:00-دەن كەيىن TikTok قولدانۋشىلاردىڭ نازارىن ەكراننان الشاقتاتىپ، دەمالۋىنا كومەكتەسەتىن ارنايى ەسكەرتۋلەر قوسۋدى كوزدەيدى.
TikTok-تاعى «وتباسىلىق باپتاۋلاردىڭ» جاڭا مۇمكىندىكتەرى
TikTok-تا اتا-انالاردىڭ باقىلاۋ جۇيەسى ەنگىزىلگەنىنە بەس جىل بولدى. وسى ۋاقىت ىشىندە پلاتفورما ساراپشىلاردىڭ ۇسىنىستارىن جانە اتا-انالاردىڭ پىكىرلەرىن ەسكەرە وتىرىپ، جۇيەنى ۇنەمى جەتىلدىرىپ كەلەدى. جاڭا فۋنكسيالار اتا-انالارعا كەلەسى مۇمكىندىكتەردى ۇسىنادى:
🔹 بالالارىنىڭ TikTok قولدانۋ ۋاقىتىن شەكتەۋ (مىسالى، وقۋ نەمەسە ۇيقى ۋاقىتىندا).
🔹 بەلگىلى ءبىر ۋاقىتقا قوسىمشانى بۇعاتتاۋ ءۇشىن «دەمالىس» فۋنكسياسىن پايدالانۋ.
🔹 سيفرلىق دەتوكست ءۇشىن قايتالاناتىن كەستەنى ورناتۋ.
🔹 بالالارىنىڭ TikTok-تا كىمدەردى باقىلايتىنىن جانە ولاردىڭ اككاۋنتتارىنا كىمدەردىڭ جازىلعانىن كورۋ.
🔹 جاسوسپىرىمدەردىڭ بۇعاتتاعان اككاۋنتتارىن باقىلاۋ.
ق ر مادەنيەت جانە اقپارات ءمينيسترى ايدا بالايەۆا جاسوسپىرىمدەردىڭ ونلاين قاۋىپسىزدىگى مەن اقپاراتتىق كەڭىستىكتەگى مادەنيەتتى ساقتاۋ ماسەلەسىنىڭ وزەكتىلىگىن اتاپ ءوتتى. ونىڭ ايتۋىنشا، بالالاردىڭ ينتەرنەتتەگى ۋاقىتىن باقىلاۋ جانە ولاردى زياندى كونتەنتتەن قورعاۋ – مەملەكەتتىڭ باستى مىندەتتەرىنىڭ ءبىرى.
«سيفرلىق داۋىردە بالالاردىڭ ينتەرنەتتەگى قاۋىپسىزدىگى ماڭىزدى. TikTok سەكىلدى پلاتفورمالاردىڭ اتا-انالار ءۇشىن جاڭا باقىلاۋ مۇمكىندىكتەرىن ەنگىزۋى – وڭ وزگەرىس. ءبىز اقپاراتتىق قاۋىپسىزدىك سالاسىندا بەلسەندى جۇمىس ىستەپ، بالالاردى ءقاۋىپتى كونتەنتتەن قورعاۋ شارالارىن كۇشەيتەمىز»، – دەدى ايدا بالايەۆا.
بولاشاقتا TikTok قاۋىمداستىق ەرەجەلەرىنە سايكەس كەلمەيتىن كونتەنت تۋرالى اتا-انالارعا حابارلاۋ مۇمكىندىگىن ەنگىزۋدى جوسپارلاپ وتىر. بۇل جاڭاشىلدىق اتا-انالارعا بالالارىنىڭ ونلاين قاۋىپسىزدىگىن ءتيىمدى باقىلاۋعا مۇمكىندىك بەرەدى.