تەستىلەۋ ۇزاقتىعى – ءتورت ساعات (240 مينۋت). سونداي-اق، ەرەكشە ءبىلىم بەرۋ قاجەتتىلىكتەرى بار تالاپكەرلەر ءۇشىن قوسىمشا 40 مينۋت ۋاقىت قاراستىرىلعان، دەپ حابارلايدى almaty-akshamy.kz
«تەستىلەۋ كەزىندە تالاپكەرلەرگە بىرنەشە ءۇزىلىس بەرىلەدى. تەستىلەۋدىڭ 60 مينۋتى وتكەننەن كەيىن 2 مينۋت، 120 مينۋتتان كەيىن 3 مينۋت جانە 180 مينۋتتان كەيىن 3 مينۋت كولەمىندە ءۇزىلىس بەرىلەدى. بۇل ۋاقىتتا تەستكە قاتىسۋشىلار جاتتىعۋ جاساپ، سۋ ءىشىپ، وزدەرىمەن بىرگە الىپ كەلگەن شوكولادتى جەي الادى»، - دەدى ق ر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
شىعارماشىلىق باعىتتى تاڭداعان تالاپكەرلەرگە تاپسىرمالاردى ورىنداۋ ءۇشىن 70 مينۋت بەرىلەدى. ولار ۇبت-نى ەكى ءپان – «قازاقستان تاريحى» جانە «وقۋ ساۋاتتىلىعى» بويىنشا تاپسىرادى.
شىعارماشىلىق ماماندىقتان باسقا ماماندىققا اۋىسۋعا نيەتتى ستۋدەنتتەر ءۇشىن تەستىلەۋ ۇزاقتىعى – 130 مينۋت. تەستكە قاتىسۋشىلاردىڭ بۇل ساناتى تاڭداۋى بويىنشا ەكى بەيىندىك ءپان بويىنشا تەست تاپسىرادى.
ءوز ماماندىعى نەمەسە ساباقتاس باعىت بويىنشا وقۋىن جالعاستىرۋدى جوسپارلاپ وتىرعان كوللەدج تۇلەكتەرىنە ۇبت-دا 120 مينۋت بەرىلەدى. وسى ۋاقىت ىشىندە ولار جالپى كاسىپتىك جانە ارنايى پاندەر بويىنشا تاپسىرمالاردى ورىندايدى.
ۇقساس ماماندىقتار بويىنشا وقۋدى جالعاستىرۋدى جوسپارلاپ وتىرعان شىعارماشىلىق باعىتتى ءتامامداعان كوللەدج تۇلەكتەرى ءۇشىن تەستىلەۋ ۋاقىتى – 80 مينۋت. ولار ۇبت-نى ءبىر ارنايى ءپان بويىنشا تاپسىرادى