بۇگىندە كەز كەلگەن جاننىڭ قولىنان تۇسپەيتىن سمارتفون تەك بايلانىس قۇرالى ەمەس، ءومىرىمىزدىڭ تولىققاندى سەرىگىنە اينالدى. ادامنىڭ كوبى شىنايى الەمنەن گورى، سيفرلىق الەمدە ۋاقىتتارىن ءجيى وتكىزەدى. ءومىرىن تەك وسى كەڭىستىكتە كورەتىن جاندار تەلەفونسىز قالۋدان قورقاتىنىن بىلەسىز بە؟ بۇل قورقىنىشتى عىلىمدا نە دەپ اتايدى؟ ونىڭ پسيحولوگيامەن بايلانىسى بار ما؟ اqshamnews.kz ءتىلشىسى وسى ساۋالدارعا گەشتالت تەراپيەۆت، پسيحولوگ ۇلمەكەن ساندىبەكقىزىنان جاۋاپ الدى.
ۇلمەكەن ساندىبەك قىزى
پسيحولوگ، گەشتالت-تەراپيەۆت
"نوموفوبيا" نەدەن پايدا بولادى؟
تەلەفونسىز قالۋدان قورقۋ فوبيا تىلىندە - نوموفوبيا دەپ اتالادى. پسيحولوگتىڭ ايتۋىنشا، نوموفوبيا – بۇل كۇندەلىكتى ومىرىمىزدە تەلەفوننان ۇزاق ۋاقىتقا الىستاي الماۋ، ياعني تاۋەلدىلىكتىڭ ءبىر ءتۇرى. ەگەر ادام كۇنىنە 4 ساعات جانە ودان كوپ ۋاقىتىن گادجەتكە جۇمساسا، بۇل تاۋەلدىلىكتىڭ بەلگىسى.
"اقپارات اعىنىنىڭ دامۋى ادامدى ءوز ءومىرىنىڭ ساپاسىن جاقسارتۋدان گورى باسقانىڭ ءومىرىن باقىلاۋعا يتەرمەلەيدى. بۇل - ماقساتتاردان الشاقتاۋ، پروكراستيناسيا، ءتىپتى شىنايى ومىردەن قاشۋ دەپ تۇسىنۋگە بولادى"، - دەيدى ۇلمەكەن ساندىبەك قىزى.
تەلەفونسىز قالۋ مازاسىزدىق تۋدىرا ما؟ نوموفوبيانىڭ زيانى قانداي؟
نوموفوبيانىڭ كۇندەلىكتى ومىرگە اسەرى وتە ۇلكەن. بۇل تەك ۋاقىت جوعالتۋ ەمەس، پسيحولوگيالىق جانە فيزيولوگيالىق كۇيزەلىسكە دە الىپ كەلەدى.
"ادام تەلەفونعا بايلانعان سايىن ونىڭ ۇيقىسى بۇزىلادى، اگرەسسياسى ارتادى، زەيىنى شاشىرايدى. ەڭ قيىنى - ادام “وسىندا جانە ءقازىر” ساتىنەن ءلاززات الۋدى ۇمىتادى"، - دەيدى پسيحولوگ.
ول سمارتفونمەن بايلانىستى شەكتەۋ ءۇشىن "وزىڭمەن كەلىسىمشارت" جاساۋ، باسقا حوببي تابۋ جانە ءتىرى تىلدەسەتىن ورتانى كوبەيتۋ قاجەتىن ايتادى.
تەلەفونمەن سويلەسۋدەن قورقۋ – جاڭا زاماننىڭ فوبياسى ما؟
كەي ادامدار ءۇشىن تەلەفون قوڭىراۋى - تىكەلەي ۇرەي تۋدىرادى. ولار اڭگىمەدەن، ءوز داۋسىنان ۇيالادى، ءتىپتى ءساتسىز تاجىريبەلەرىنە بايلانىستى اۋىزشا سويلەسۋدەن قورقادى. نەگە؟
"بۇل كوبىنە ادامنىڭ ءوزىن تومەن باعالاۋىمەن، سىناۋدان قورقۋىمەن، وزىنە سەنبەۋ سەزىمىمەن بايلانىستى. كەي جاعدايلاردا بۇل قورقىنىش بۇرىنعى جامان جاڭالىق نە ستالكەرلىك سەكىلدى جاعىمسىز وقيعالاردىڭ سالدارىنان قالىپتاسۋى مۇمكىن"، - دەيدى ۇلمەكەن حانىم.
"ءومىرىمدى ءونىمدى وتكىزۋ ءۇشىن نە ىستەۋىم كەرەك؟" دەگەن سۇراقتان باستاۋ كەرەك"
تەلەفونعا تاۋەلدىلىك تەك جاسوسپىرىمدەرگە ءتان ەمەس. ءقازىر ەگدە جاستاعى ادامداردىڭ دا سمارتفونسىز ءومىرىن ەلەستەتە المايتىنى بەلگىلى. دەمەك، بۇل بالالىق شاقتا قالىپتاساتىن ادەت ەمەس، تەحنولوگيالىق ءداۋىردىڭ سالدارى.
"باستىسى - ۋاقىتتى باقىلاپ، سانالى تۇردە ءتارتىپ ورناتۋ. سەبەبى كەيبىر ادامداردىڭ تەلەفوندا وتكىزگەن ۋاقىتىنا قاراپ، ءبىر اپتادا 2 كىتاپ وقۋعا بولار ەدى. ءومىرىمدى ءونىمدى وتكىزۋ ءۇشىن نە ىستەۋىم كەرەك دەگەن سۇراقتان باستاۋ كەرەك"، — دەپ قورىتىندىلايدى پسيحولوگ.