الماتىدا تۇركسىب اۋدانىندا ورنالاسقان «باۋم» توعايىندا تازالىق سەنبىلىگى ءوتتى.
بۇل يگى ءىس – «تازا قازاقستان» رەسپۋبليكالىق باستاماسىنىڭ نەگىزىندە «الماتى – ءبىزدىڭ ورتاق ءۇيىمىز» ەكوناۋقانى اياسىندا جۇرگىزىلدى.
اتالعان اكسياعا ونەر ادامدارى، اۋدان تۇرعىندارى، بەلسەندى ازاماتتار، ەكولوگيا جاناشىرلارى، ستۋدەنتتەر جانە ت.ب. قاتىستى.
«ءوز قالامىزدىڭ تازالىعىن ساقتاپ، اينالامىزدى تازا ۇستاپ، كوپشىلىككە ءوزىمىزدىڭ ۇلگى-ونەگەمىزدى كورسەتسەك، ۇتارىمىز كوپ. جالپى العاندا وزىمىزدە وسىنداي ءىس-شارا ناتيجەسىندە تازالىق ساقتاۋدى باستى ورىنعا قويعان دۇرىس دەپ بىلەمىز»، – دەدى الاتاۋ ءداستۇرلى تەاترىنىڭ ترۋپپا جەتەكشىسى ساتتار ەرۋبايەۆ.
سونىمەن قاتار مەدەۋ تابيعي پاركى ديرەكتورىنىڭ مىندەتىن اتقارۋشى ۇزاق جامبىل ۇلى ەكولوگيالىق احۋالدى جاقسارتۋ ماقساتىندا جۇرگىزىلىپ جاتقان ىستەر توڭىرەگىندە وي قوزعادى.
«تازا قازاقستان اكسياسى بويىنشا ءبىزدىڭ ەكو الماتى، قالالىق ەكولوگيا جانە قورشاعان ورتا باسقارماسى قىزمەتكەرلەرى جانە ت.ب. جۇرتپەن بىرىگىپ وسىنداي ءىس-شارا ۇيىمداستىرىلدى. «باۋم» توعايى بويىندا تازالىق جۇمىستارى جاسالدى. مۇنىڭ ءمان-ماڭىزىن ءبىلىپ، وسكەلەڭ ۇرپاق كورىپ، كەلەلى ىستەردى ۇيرەنىپ، تابيعاتتى ايالاي بىلسە ەكەن»، – دەدى ول.
سونداي-اق اكسياعا قاتىناسۋشىلار قاتارىندا ستۋدەنت جاستار ءوز بەلسەندىلىكتەرىن كورسەتىپ، كەلەلى ءىستىڭ باسى-قاسىندا ءجۇردى.
«ءاردايىم وسىنداي تازالىققا بايلانىستى ناۋقاندارعا قاتىسىپ تۇرامىز. ساياباقتاردى، ادامدار دەمالاتىن ورىنداردى تازارتۋ ماڭىزدى بولىپ سانالادى. ويتكەنى قالا تازا ءارى ۇقىپتى ۇستالسا، وندا ەلىمىز دە تازارادى، دامي بەرەدى دەپ سەنەمىز»، – دەدى ستۋدەنت ەرۇلان ءنۇرادىل.