سەنات دەپۋتاتى اينۇر ارعىنبەكوۆا دەنساۋلىق ساقتاۋ سالاسىنداعى كادر تاپشىلىعىنىڭ وتە وزەكتى ماسەلە ەكەنىن اتاپ ءوتتى. وسىعان بايلانىستى، ول قازاقستاندا قانداي ماماندار جەتىسپەيتىنىن دە اتاپ كورسەتكەن، دەپ حابارلايدى aqshamnews.kz.
دەپۋتاتتىڭ پىكىرىنشە، ماماندار جەتىسپەۋشىلىگى تەك اۋىلدىق جەرلەردە عانا ەمەس، ەلوردا مەن وبلىستاردا دا بايقالادى. بۇگىندە دەنساۋلىق ساقتاۋ سالاسىنا ۇلكەن كولەمدە قارجى بولىنگەنىنە قاراماستان، حالىقتىڭ تولىق سۇرانىسىن قاناعاتتاندىرۋ مۇمكىن بولماي وتىر. كوپتەگەن مەديسينالىق ۇيىمدار ماتەريالدىق-تەحنيكالىق جاعىنان جەتكىلىكتى قامتاماسىز ەتىلسە دە، «ءبارىن كادر شەشەدى» دەگەن ۇستانىمنىڭ ماڭىزدىلىعى ءالى دە ساقتالۋدا، – دەدى ول.
دەنساۋلىق ساقتاۋ مينيسترلىگىنىڭ مالىمەتى بويىنشا، 2023 جىلدىڭ سوڭىندا 4 864 دارىگەر تاپشىلىعى انىقتالعان. اسىرەسە، استانا، الماتى جانە شىمكەنت قالالارىندا دارىگەر تاپشىلىعى بايقالادى، سونداي-اق بىرنەشە اۋىل مەن اۋدانداردا دا مامان جەتىسپەۋشىلىگى بار.
قازىرگى تاڭدا سۇرانىسقا يە ماماندىقتار قاتارىنا تەراپيەۆتەر، انەستەزيولوگتار جانە اكۋشەر-گينەكولوگتار جاتادى. سەناتور دەنساۋلىق ساقتاۋ مينيسترلىگىنە وسى ماسەلەنى شەشۋ ءۇشىن ناقتى شارالار قابىلداۋدى ۇسىندى.
اينۇر ارعىنبەكوۆا دەنساۋلىق ساقتاۋ مينيسترلىگىنە كادر رەسۋرسى ماسەلەسى بويىنشا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە وزگەرىستەر ەنگىزۋ جونىندەگى زاڭنامالىق اكت جوباسىن پارلامەنتكە تەز ارادا ۇسىنۋدى، دەنساۋلىق ساقتاۋدىڭ ءتيىمدى كادر ساياساتىن قامتاماسىز ەتۋ ءۇشىن جول كارتاسىن ازىرلەپ بەكىتۋدى جانە كوپسالالى ۋنيۆەرسيتەت كلينيكالارىن قۇرۋ جۇمىستارىنىڭ اياقتالۋىن قامتاماسىز ەتۋدى تاپسىردى.