قازاقستاندا ەكولوگيالىق تەپە-تەڭدىكتى ساقتاۋ جانە ورمان القاپتارىن كەڭەيتۋ باعىتىندا اۋقىمدى جۇمىستار اتقارىلىپ جاتىر. بۇل شارالار مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىن جانە پرەزيدەنتتىڭ تابيعاتتى قورعاۋ جونىندەگى تاپسىرمالارىن جۇزەگە اسىرۋ اياسىندا قولعا الىنعان.
ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ مالىمەتىنشە، سوڭعى جىلدارى ەل اۋماعىندا 1 ملرد 369 ملن-نان استام كوشەت ەگىلدى. ونىڭ ىشىندە ارال تەڭىزىنىڭ قۇرعاعان تۇبىنە 48،7 ملن دانا سەكسەۋىل كوشەتى وتىرعىزىلعان. بۇل جوبا وڭىردەگى ەكولوگيالىق اپات سالدارىن جۇمسارتۋعا باعىتتالعان.
— «مەملەكەتتىك ورمان قورى اۋماعىنا اۋقىمدى كولەمدە اعاش وتىرعىزۋ جۇمىستارى جۇرگىزىلۋدە. اسىرەسە ارال تەڭىزىنىڭ قۇرعاعان اۋماعىنا سەكسەۋىل ەگۋ – شولەيتتەنۋدى توقتاتۋدىڭ ماڭىزدى تەتىگى»، — دەدى مينيستر.
ورمان شارۋاشىلىعىن تۇراقتى دامىتۋ ماقساتىندا قازالى اۋدانىندا بىلتىر جىل سوڭىندا جاڭا ورمان پيتومنيگى ىسكە قوسىلدى. ونىڭ اۋماعى 33 گەكتاردى قۇرايدى جانە جىلىنا 3 ملن كوشەت وسىرۋگە مۇمكىندىك بەرەدى. قازىرگى تاڭدا اگروتەحنيكالىق تالاپتارعا سايكەس پيتومنيكتىڭ 10 گەكتارىنا سەكسەۋىل تۇقىمى سەبىلگەن.
بۇعان قوسا، بيىل اۋدانى 15 گەكتار جاڭا پيتومنيكتى جوبالاۋ جانە ارالدىڭ قۇرعاعان تۇبىندە تىكەلەي ۇڭعىمىلار بۇرعىلاۋ جۇمىستارى باستالدى. بۇل شارالار جاس كوشەتتەردىڭ وسۋىنە قاجەتتى سۋ قورىن قامتاماسىز ەتۋگە باعىتتالعان.
«تازا قازاقستان» اياسىنداعى كوگالداندىرۋ جۇمىستارى:
-
ەلدەگى ورمان القاپتارىنىڭ كولەمىن ۇلعايتۋعا؛
-
شولەيتتەنۋدىڭ الدىن الۋعا؛
-
حالىق ءۇشىن ەكولوگيالىق قولايلى ورتا قالىپتاستىرۋعا؛
-
سۋ جانە اۋا تەڭگەرىمىن ساقتاۋعا ىقپال ەتەدى.
بۇل باستاما قازاقستاننىڭ ۇزاق مەرزىمدى ەكولوگيالىق قاۋىپسىزدىگى مەن ورنىقتى دامۋ ستراتەگياسىنىڭ ماڭىزدى بولىگىنە اينالىپ وتىر.