قازاقستاندا جىلۋ ەنەرگەتيكاسى سالاسىنداعى ماماندىقتارعا قىزىعۋشىلىق قايتا كۇشەيىپ وتىر. بۇل تۋرالى ەنەرگەتيكا ۆيسە-مينيسترى سۇڭعات ەسىمحانوۆ ۇكىمەت وتىرىسىنىڭ قورىتىندىسى بويىنشا وتكەن باسپا ءسوز ءماسليحاتىندا مالىمدەدى.
ۆيسە-مينيستردىڭ ايتۋىنشا، بيىل بۇل سالاعا تۇسكەن تۇلەكتەردىڭ سانى بۇرىن-سوڭدى بولماعان كورسەتكىشكە جەتكەن.
«ءبىز سوڭعى ەكى جىلدا ەنەرگيا وندىرەتىن كاسىپورىندارداعى ورتاشا جالاقىنى 420-450 مىڭ تەڭگەگە دەيىن كوتەردىك. سونىڭ ناتيجەسىندە مامانداردىڭ كەتۋى توقتادى. بيىلعى جىلى عىلىم جانە جوعارى ءبىلىم مينيسترلىگىمەن بىرلەسىپ گرانتتار سانىن ۇلعايتىپ، العاش رەت الماتى ەنەرگەتيكا جانە بايلانىس ۋنيۆەرسيتەتىنە (اەبۋ) 200 ستۋدەنت ءتۇستى. بۇلاي ەشقاشان بولعان ەمەس. سوندىقتان سالاعا مامانداردى قايتا تارتۋعا مۇمكىندىك بار. ارينە، جاقسى ەنەرگەتيكتى بىرنەشە جىل باۋلۋ قاجەت. بۇل ءۇردىس ءبىزدىڭ باقىلاۋىمىزدا بولادى، سوندىقتان كادرلىق الەۋەتتى قالپىنا كەلتىرۋ باستالدى دەپ ايتا الامىز»، – دەدى ول.
جىلۋ ەنەرگەتيكاسى — ەلدىڭ ەنەرگەتيكالىق قاۋىپسىزدىگى مەن تۇراقتى دامۋى ءۇشىن ماڭىزدى سالانىڭ ءبىرى. سوڭعى جىلدارى ەنەرگەتيكالىق نىسانداردا جاڭعىرتۋ جۇمىستارى جۇرگىزىلىپ، جاڭا قوندىرعىلار ەنگىزىلۋدە. بۇل ءوز كەزەگىندە بىلىكتى كادرلارعا دەگەن سۇرانىستى ارتتىرۋدا.
ساراپشىلاردىڭ ايتۋىنشا، ەنەرگەتيكا سالاسىنداعى ەڭبەكاقىنىڭ كوتەرىلۋى، الەۋمەتتىك كەپىلدىكتەردىڭ جاقسارۋى جانە مەملەكەتتىك قولداۋ شارالارى جاس مامانداردىڭ قىزىعۋشىلىعىن ارتتىرىپ وتىر.
سونىمەن قاتار، بيىلعى «جۇمىسشى ماماندىقتارى جىلى» اياسىندا تەحنيكالىق باعىتتاعى گرانتتار كولەمى ايتارلىقتاي كوبەيىپ، جىلۋ ەنەرگەتيكاسى سالاسىنا جاڭا سەرپىن بەرمەك.