قازاقستاندا قوعامدىق قاۋىپسىزدىكتى قامتاماسىز ەتۋ باعىتىنداعى جۇيەلى شارالار وڭ ناتيجەسىن بەرۋدە. مەملەكەت باسشىسى قاسىم-جومارت توقايەۆتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن جانە باسقا دا تاپسىرمالارىن ورىنداۋ شەڭبەرىندە ىشكى ىستەر مينيسترلىگى قىلمىسقا قارسى كۇرەستى كۇشەيتىپ، ءقاۋىپسىز قالا جانە اۋىلدىق ورتانى قالىپتاستىرۋعا كۇش سالىپ وتىر.
قازىرگى تاڭدا كۇن سايىن 14 مىڭنان استام پوليسيا قىزمەتكەرى مەن ۇلتتىق ۇلاننىڭ اسكەري قىزمەتشىلەرى قوعامدىق ءتارتىپتى قاداعالايدى. ەل بويىنشا 15 مىڭنان استام پاترۋلدەۋ مارشرۋتتارى ازىرلەنىپ، بارلىق پروبلەمالىق ايماقتار قامتىلدى. بۇل قىلمىستاردىڭ الدىن الۋعا جانە قۇقىق بۇزۋشىلىقتاردىڭ قايتالانۋىن ازايتۋعا مۇمكىندىك بەردى.
-
بيىل قوعامدىق ورىندار مەن كوشەلەردە قۇقىق بۇزۋشىلىقتار سانى ازايدى.
-
بۇرىن سوتتالعاندار تاراپىنان جاسالاتىن قىلمىستار تومەندەدى.
-
پوليسيا قىزمەتكەرلەرى 10 مىڭنان استام قىلمىستى اشتى،
-
سونداي-اق 10 ميلليونعا جۋىق اكىمشىلىك قۇقىق بۇزۋشىلىقتىڭ جولى كەسىلدى.
ىشكى ىستەر ءمينيسترى ەرجان سادەنوۆتىڭ ايتۋىنشا، قابىلدانعان شارالار ارقاسىندا ەلدەگى قىلمىستار سانى 13%-عا قىسقارعان، بۇل وتكەن جىلمەن سالىستىرعاندا 9 مىڭ قىلمىسقا از دەگەن ءسوز.
— «ءبىزدىڭ جۇمىستىڭ نەگىزى – "زاڭ جانە ءتارتىپ" قاعيداتى. الدىن الۋ شارالارىنىڭ ناتيجەسىندە كىسى ءولتىرۋ، قاراقشىلىق، توناۋ، بۇزاقىلىق، ۇرلىق جانە مال ۇرلىعى سياقتى اۋىر قىلمىستار ازايدى. بۇرىن سوتتالعاندار جاسايتىن قىلمىستاردىڭ، سونداي-اق قارۋمەن جاسالاتىن قۇقىق بۇزۋشىلىقتاردىڭ سانى تومەندەدى. سونىمەن قاتار قىلمىستاردىڭ اشىلۋ كورسەتكىشى جاقساردى»، — دەدى مينيستر.
جالپى، قىلمىس دەڭگەيىنىڭ تومەندەۋى قۇقىق قورعاۋ ورگاندارىنىڭ ۇيلەسىمدى جۇمىسىنىڭ ناتيجەسى بولىپ وتىر. بۇل ازاماتتاردىڭ قاۋىپسىزدىگىن قامتاماسىز ەتۋگە، قوعامدا زاڭعا دەگەن سەنىمدى ارتتىرۋعا جانە «ادىلەتتى قازاقستان» قۇرۋعا باعىتتالعان ناقتى قادامداردىڭ ءبىرى سانالادى.