مەملەكەت باسشىسىنىڭ ەكولوگيالىق باعىتتاعى قالالاردى دامىتۋ جونىندەگى تاپسىرماسىنا سايكەس، قازاقستان رەسپۋبليكاسى ۇكىمەتى 2024–2029 جىلدارعا ارنالعان «تازا قازاقستان» تۇجىرىمداماسىن بەكىتتى. وسى تۇجىرىمدامانى جەرگىلىكتى دەڭگەيدە ىسكە اسىرۋ ماقساتىندا الماتى قالاسى اكىمدىگى 2025–2029 جىلدارعا ارنالعان كەشەندى جوسپار ازىرلەدى. بۇگىن بۇل جوسپار دەپۋتاتتاردىڭ نازارىنا ۇسىنىلدى.
جوسپار جالپى ءۇش نەگىزگى باعىت بويىنشا 45 ناقتى ءىس-شارانى قامتيدى: ەكولوگيالىق ويلاۋ مەن مىنەز-قۇلىقتى قالىپتاستىرۋ، ەكولوگيالىق ءبىلىم بەرۋ جانە ەكولوگيالىق اعارتۋ مەن اقپاراتتىق قامتۋ. ءاربىر ءىس-شارا جىلدار بويىنشا ءبولىنىپ، سالالىق ورگاندارعا بەكىتىلگەن. سونىمەن قاتار، ولاردىڭ ناقتى ساندىق جانە ساپالىق ناتيجەلەرى جوسپارلانعان.
ەكولوگيالىق ويلاۋ مەن مىنەز-قۇلىق باعىتى حالىق پەن بيزنەستىڭ ەكولوگيالىق جاۋاپتى ۇستانىمىن دامىتۋعا باعىتتالعان. بۇل باعىت اياسىندا قالادا كامەرالار مەن داچيكتەر ورناتۋ، سۋمەن جابدىقتاۋ جۇيەسىن سيفرلاندىرۋ، فاندوماتتار مەن ەكوبوكستاردى ەنگىزۋ، قالدىقتاردى قايتا وڭدەۋ جوبالارىن ىسكە اسىرۋ، ىنتالاندىرۋ شارالارى ۇيىمداستىرۋ جانە قوعامدى كەڭىنەن قاتىستىرۋ باستامالارى جوسپارلانعان.
ەكولوگيالىق ءبىلىم بەرۋ باعىتى بالالار مەن جاستاردىڭ تابيعاتتى قورعاۋعا دەگەن سانالى كوزقاراسىن قالىپتاستىرۋدى كوزدەيدى. جوسپاردا ەكولوگيالىق بايقاۋلار مەن اكسيالار وتكىزۋ، «جاسىل بالاباقشا» جوباسىن دامىتۋ، مەكتەپتەردە ەكوساباقتار ۇيىمداستىرۋ، پەداگوگتاردىڭ بىلىكتىلىگىن ارتتىرۋ باعدارلامالارىن ەنگىزۋ كوزدەلگەن.
ەكولوگيالىق اعارتۋ جانە اقپاراتتىق قامتۋ باعىتى حالىقتىڭ ەكولوگيالىق ساۋاتتىلىعىن ارتتىرۋعا باعىتتالعان. بۇل باعىت شەڭبەرىندە «تازا قازاقستان»، «World Clean-up Day» سياقتى حالىقارالىق باستامالاردى جۇزەگە اسىرۋ، ەكولوگيالىق بەينەروليكتەر شىعارۋ، مادەني ءىس-شارالار ۇيىمداستىرۋ، بۇقارالىق اقپارات قۇرالدارىندا ەكولوگيا تاقىرىبىن كەڭىنەن جاريالاۋ، سونداي-اق «جاسىل مەكتەپ» جانە «جاسىل كەڭسە» جوبالارىن ىسكە اسىرۋ جوسپارلانىپ وتىر.
اتالعان جوسپاردى تولىققاندى ىسكە اسىرۋ الماتى قالاسىندا ەكولوگيالىق مادەنيەتتى جۇيەلى تۇردە قالىپتاستىرۋعا، حالىقتىڭ تابيعاتتى قورعاۋ ىسىنە بەلسەندى قاتىسۋىن قامتاماسىز ەتۋگە، قالالىق ورتانىڭ ساپاسىن ارتتىرۋعا جانە تۇرعىنداردىڭ ءومىر ءسۇرۋ دەڭگەيىن جاقسارتۋعا مۇمكىندىك بەرەدى.
قالا مەن تۇرعىنداردىڭ مۇددەسى ءۇشىن «تازا قازاقستان» تۇجىرىمداماسىن ىسكە اسىرۋ جونىندەگى جوسپاردى قولداۋ جانە بەكىتۋ ۇسىنىلادى.