ارميا ۇيىندە دوستاستىقتىڭ قورعانىس مينيسترلەرى كەڭەسى جانىنداعى اۋە شابۋىلىنا قارسى قورعانىس ماسەلەلەرى جونىندەگى ۇيلەستىرۋ كوميتەتىنىڭ 60-شى جۇمىس وتىرىسى ءوتتى، دەپ حابارلايدى aqshamnews.kz.
وعان بەلارۋس، قازاقستان، قىرعىزستان، رەسەي، تاجىكستان، وزبەكستان قارۋلى كۇشتەرىنىڭ اۋە-عارىشتىق، اسكەري-اۋە كۇشتەرى مەن اۋە شابۋىلىنا قارسى قورعانىس اسكەرلەرىنىڭ قولباسشىلارى (باس قولباسشىلارى)، تاۋەلسىز مەملەكەتتەر دوستاستىعىنىڭ جارعىلىق ورگاندارى مەن قورعانىس-ونەركاسىپ كەشەنىنىڭ وكىلدەرى قاتىستى.
وتىرىسقا قاتىسۋشىلارعا قورعانىس ءمينيسترىنىڭ ورىنباسارى – قازاقستان قارۋلى كۇشتەرى اۋە قورعانىسى كۇشتەرىنىڭ باس قولباسشىسى اۆياسيا گەنەرال-لەيتەنانتى داۋرەن قوسانوۆ ءسوز سويلەدى.
– ۇشقىشسىز باسقارىلاتىن اۆياسيالىق جۇيەلەردى پايدالانۋ قازىرگى زامانعى قارۋلى قاقتىعىستاردىڭ اجىراماس ەلەمەنتىنە اينالدى، سوندىقتان ءبىز ءبىر قادام الدا بولۋىمىز كەرەك. بۇل ءبىزدىڭ ەلدەردىڭ كۇش-قۋاتىن ۇيلەستىرۋمەن قاتار، ەلەكتروندى زاقىمداۋ قۇرالدارىن انىقتاپ، ولاردى ۇنەمى جاڭارتىپ وتىرۋدى تالاپ ەتەدى، – دەدى ول.
وتىرىستا دوستاستىقتىڭ بىرىككەن اۋە قورعانىسى جۇيەسىن جەتىلدىرۋدىڭ وزەكتى ماسەلەلەرى جانە ودان ءارى ءوزارا ءىس-قيمىلدىڭ پەرسپەكتيۆالارى دا قارالدى. ودان بولەك، بيىل تامىز – قىركۇيەك ايلارىنا «سارىشاعان» پوليگونىندا جوسپارلانعان «جاۋىنگەرلىك دوستاستىق-2025» بىرلەسكەن وقۋ-جاتتىعۋىن وتكىزۋ ءتارتىبى مەن يدەياسى تالقىلاندى.
ءىس-شارالار شەڭبەرىندە 97617 جانە 78639 اسكەري بولىمدەرىنىڭ بازاسىندا تمد ەلدەرىنىڭ اۋە-عارىشتىق، اسكەري-اۋە كۇشتەرى جانە اۋە شابۋىلىنا قارسى قورعانىس اسكەرلەرى قولباسشىلارىنىڭ قاتىسۋىمەن وقۋ-ادىستەمەلىك جيىن ءوتتى. سول جيىندا قارسىلاستىڭ ديۆەرسيالىق-بارلاۋ توپتارىنىڭ قارسى ءىس-قيمىلى كەزىندەگى س-300پس زەنيتتىك زىمىران ديۆيزيونىنىڭ پوزيسياسىن وزگەرتۋ شارالارى پىسىقتالدى. اۋە شابۋىلىنا قارسى قورعانىس اسكەرلەرى كوماندالىق پۋنكتىنىڭ كەزەكشى اۋىسىمى جاۋىنگەرلىك مىندەتتەردى ويداعىداي ورىنداپ شىقتى.
دوستاستىق ەلدەرىنىڭ وكىلدەرى 28 گۆارديالىق-پانفيلوۆشىلار ساياباعىنداعى داڭق مەموريالىنا گۇل شوقتارىن قويۋ راسىمىنە قاتىسىپ، ارميا ۇيىندەگى اسكەري-تاريحي مۋزەيدىڭ فيليالىنا باردى. شەتەلدىك قوناقتار بۇدان باسقا، «گرانيت» ارنايى كونسترۋكتورلىق-تەحنولوگيالىق بيۋروسى» ج ش س قىزمەتىمەن تانىستى.
وتكەن ءىس-شارا تمد ءاشقق بىرىككەن جۇيەسىن قۇرۋدىڭ 30 جىلدىق مەرەيتويى اياسىندا ەرەكشە ماڭىزعا يە. ۇيلەستىرۋ كوميتەتىنىڭ وتىرىسى مەن وقۋ-ادىستەمەلىك جيىن دوستاستىققا مۇشە مەملەكەتتەردىڭ اۋە شابۋىلىنا قارسى قورعانىس سالاسىنداعى ىنتىماقتاستىقتى ودان ءارى دامىتۋعا جانە نىعايتۋعا دەگەن ۇمتىلىسىن كورسەتتى، بۇل وڭىردەگى تۇراقتىلىق پەن قاۋىپسىزدىكتى قامتاماسىز ەتۋدىڭ ماڭىزدى فاكتورى.