«تازا قازاقستان» تۇجىرىمداماسى اياسىندا الماتىدا قىسقى كەزەڭدە كوممۋنالدىق تەحنيكانىڭ دايىندىعى كورسەتىلدى.
قالالىق ينفراقۇرىلىمدى قىس مەزگىلىندە ساپالى قامتاماسىز ەتۋ ماقساتىندا ارنايى تەحنيكا پاركى جاڭارتىلدى. بيىل 32 زاماناۋي تەحنيكا ساتىپ الىنىپ، ولاردىڭ كومەگىمەن تازالاۋ جۇمىستارىنىڭ تيىمدىلىگى مەن جىلدامدىعى ارتتىرىلماق، دەپ حابارلايدى aqshamnews.kz.
جاڭا تەحنيكانىڭ ىشىندە قوقىستى كونۆەيەر ارقىلى كونتەينەرلەرگە ءبىر ۋاقىتتا تيەۋ جۇيەسى بار التى سىپىرۋ-جيناۋ ماشيناسى بار. بۇل ماشينالار قالا كوشەلەرىنەن قار مەن قوقىستى تەز جانە ساپالى تازالاۋعا مۇمكىندىك بەرەدى. سونداي-اق، تومەن شۋ دەڭگەيىندە جۇمىس ىستەيتىن بەس ەلەكترلى سىپىرۋ-جيناۋ ماشيناسى ساتىپ الىندى، بۇل تۇرعىنداردىڭ تىنىشتىعىن بۇزباي، تۇنگى ۋاقىتتا تازالىق جۇمىستارىن جۇرگىزۋگە جاعداي جاسايدى.
سونىمەن قاتار، كوكتايعاقپەن كۇرەسۋگە ارنالعان 3 سۇيىق رەاگەنت تاراتقىش تەحنيكاسى بار. ولار رەاگەنتتەردى جولعا بىركەلكى سەبۋ ارقىلى قىس مەزگىلىندە قالا كوشەلەرىندەگى قاۋىپسىزدىكتى ايتارلىقتاي ارتتىرادى. ەرىگەن قار سۋىن سورۋ ارقىلى سۋ تاسقىنىنىڭ الدىن الادى جانە قالانىڭ درەناجدىق جۇيەسىن جاقسارتاتىن ەكى اسسەنيزاتور ماشيناسىنىڭ ماڭىزى زور.
«الماتى تازالىق» مكك ديرەكتورىنىڭ ورىنباسارى ەرتاي كاسەنوۆتىڭ ايتۋىنشا، قالاداعى تازالاۋ جۇمىستارى ۇنەمى جەتىلدىرىلۋدە. «قىسقى كەزەڭدە كوشە-جول جەلىسىن تولىق كۇتىپ ۇستاۋدى قامتاماسىز ەتەتىن 10 بىرىكتىرىلگەن جول تازالاۋ ماشيناسى، سونداي-اق تروتۋارلار مەن ىرگەلەس اۋماقتاردى قار مەن مۇزدان تازارتۋعا ارنالعان التى تراكتور ساتىپ الىندى»، - دەدى ول.
«الماتى تازالىق» مكك ارنايى تەحنيكا پاركى جىل سايىن جاڭارتىلىپ وتىرادى. بۇل كومپانيانىڭ جۇمىس ساپاسىن جاقسارتۋعا جانە قىس مەزگىلىندە ونىمدىلىكتى ارتتىرۋعا باعىتتالعان ماڭىزدى بولىگى. وسىلايشا، 2025 جىلى 123 ارنايى تەحنيكانى، سونىڭ ىشىندە جول تازالاۋ ماشينالارىن، جۇك كولىكتەرىن، قوقىس تاسيتىن كولىكتەردى، تروتۋارلاردى تازارتۋعا ارنالعان تراكتورلاردى، مانيپۋلياتورلارى بار اۆتوكرانداردى جانە Jetbroom قار تازالاۋ ماشينالارىن ساتىپ الۋ جوسپارلانۋدا، ولار قالا جولدارىندا ودان دا جوعارى تازالاۋ ساپاسى مەن قاۋىپسىزدىكتى قامتاماسىز ەتەدى.
ارنايى تەحنيكانى جۇرگىزەتىن كاسىپورىن ماماندارى جاڭا تەحنيكامەن جۇمىس ىستەۋ الدەقايدا ىڭعايلى بولعانىن اتادى. «بۇرىن ءبىر كوشەنى تازالاۋعا كوپ ۋاقىت كەتەتىن، ءقازىر تەحنيكانىڭ مانيەۆرلىگىنىڭ ارقاسىندا بۇل جۇمىس الدەقايدا جىلدام اتقارىلادى. بۇل قالا تۇرعىندارىنا ىڭعايلى»، - دەيدى ارنايى تەحنيكا جۇرگىزۋشىلەرىنىڭ ءبىرى.
«ءقازىر ءبارى تەحنيكانىڭ قانشالىقتى زاماناۋي جانە كوپفۋنكسيونالدى ەكەندىگىنە بايلانىستى. الماتى بۇل تۇرعىدا، بالكىم، الدىڭعى قاتاردا. پانفيلوۆ كوشەسى مەن باسقا دا سكۆەردى روبوت سەكىلدى كىشكەنتاي ماشينالار تازالاپ ءجۇر»، - دەيدى المالى اۋدانىنىڭ تۇرعىنى سىمبات بايبازاروۆا.
«قول ەڭبەگىنسىز، ارينە، بولمايدى، ءبىراق ونىمدىلىك تەحنيكادا. ءقازىر ماشينالار ءبارىن جاساي الادى. بۇرىن مۇنداي جابدىقتى تەك روليكتەردەن كورەتىنبىز، ال ءقازىر ولار ءبىزدىڭ قالامىزدا كوپ. ەڭ باستىسى، روبوت شاڭسورعىش سياقتى، ءبارىن تازا، دىبىسسىز جانە شىعارىندىلارسىز جاسايدى. ولاردىڭ كوبىسى ەلەكترلى»، - دەءدى بوستاندىق اۋدانىنىڭ تۇرعىنى اننا ليستوپادنايا ساۋالناما بارىسىندا.
الماتىعا 2024-2025 جىلداردىڭ قىس مەزگىلىندە ءتيىمدى قىزمەت كورسەتۋ ءۇشىن قالا كوشەلەرىندە 841 تەحنيكا جانە 1 405 جۇمىسشى قىزمەت ەتەدى. بۇل قار مەن مۇزدى ۋاقىتىلى تازالاۋعا، كوكتايعاقتىڭ الدىن الۋعا، سونداي-اق جول مەن تروتۋارداعى باسقا قىستاعى ماسەلەلەردى شەشۋگە مۇمكىندىك بەرەدى.