الەمدىك ارەنادا كوك تۋىمىزدى جەلبىرەتىپ جۇرگەن، اۋىر سالماق دارەجەسىندە جۇدىرىقتاساتىن بىلعارى قولعاپ شەبەرى ەدىل قوجامبەردييەۆ الماتىدا ۇلتتىق ۇلاننىڭ باۋىرجان مومىش ۇلى اتىنداعى 5571 اسكەري ءبولىمىنىڭ جەكە قۇرامىمەن كەزدەستى.
چەمپيونمەن جۇزدەسۋ بارىسىندا ساربازدار سان ءتۇرلى ساۋالىن جولداپ، ەكىجاقتى پىكىر الماستى. بوكسشى وتان قورعاۋشىلارمەن ومىرلىك ساباقتارىمەن، الداعى جوسپارلارىمەن ءبولىسىپ، قۇقىقتىق ءتارتىپ اسكەرىنىڭ جاۋىنگەرلەرىنە جاۋاپتى قىزمەتتەرى ءۇشىن ريزاشىلىعىن ءبىلدىردى. مۇنداي كەزدەسۋلەر وتان الدىنداعى بورىشىن وتەپ جۇرگەن ساربازدارعا ەرىك-جىگەر، رۋح، پاتريوتتىق سەزىم سىيلايدى دەپ ويلايمىز.
– مەكتەپ قابىرعاسىندا وقىپ جۇرگەندە-اق سپورت سالاسىندا جارقىراۋدى ارمانداعان ەدىم. بالا كۇنىمنەن كيك-بوكسينگ ۇيىرمەسىنە جازىلىپ، ارمانىمنىڭ العاشقى باسپالداعىنا قادام جاسادىم. ارمان الدامايدى. تەك جۇرەكپەن قالاعان ماقسات بيىككە شىعارادى. جانە ازاماتقا شىدامدىلىق، قايتپاس قايسار مىنەز ءتان. 27 جەلتوقساندا بالۋان شولاق اتىنداعى سپورت سارايىندا 12 راۋندىق جەكپە-جەك وتەدى. سول دودادا مىقتى-مىقتى قارسىلاستارمەن جۇدىرىقتاسامىز. سىزدەردى قازاق بوكسىنىڭ جانكۇيەر بولۋعا شاقىرامىن! – دەدى بىلعارى قولعار شەبەرى.
ايتا كەتەيىك، ەدىل قوجامبەردييەۆ بالا كۇنىنەن سپورتقا جاقىن بولعان. اتى اڭىزعا اينالعان چەمپيون مايك تايسون مەن مۇحاممەد ءاليدىڭ سپورتتىق جولىنا تەلەديدار ارقىلى قىزىعىپ، بالالىق ارمانىن جۇزەگە اسىرۋ ماقساتىندا ءوز-وزىن جان-جاقتى شىڭداعان. قاجىرلى ەڭبەك پەن شىدامدىلىقتىڭ ارقاسىندا ازيا، الەم چەمپيوناتىنا قاتىسىپ، ءوزىن جەڭىسپەن دالەلدەي ءبىلدى. 2017 جىلدان باستان كاسىپقوي بوكسقا بەت بۇرعان.