ەلىمىزدە كوكتەمنەن بەرى «تازا قازاقستان» جالپىۇلتتىق ەكولوگيالىق اكسياسى ۇيىمداستىرىلىپ، وندا قالا اۋماعىن اباتتاندىرۋ، كوگالداندىرۋ، كوشەلەردى تازارتۋ سەكىلدى تازالىق شارالارى وتكەنى بارشاڭىزعا ءمالىم.
مەملەكەت باسشىسى قاسىم-جومارت توقايەۆتىڭ تاپسىرماسى اياسىندا قولعا الىنعان يگى باستامانى الماتىلىقتار دا قۋانا قابىلدادى. ەكولوگيالىق اكسيادا قالا تۇرعىندارى مەن ەرىكتىلەرى وزەندەردى، ساياباقتاردى، كوشە بويلارىن جانە تابيعي اۋماقتاردى تازارتۋ جۇمىستارىنا بەلسەنە قاتىسىپ، قالا ەكولوگياسىن جاقسارتۋعا ۇلەس قوسۋدا.
– الماتىدا كوكتەمنەن باستاپ جاز بويى ەكولوگيالىق ءتۇرلى ءىس-شارالار ءوتتى. ءوز باسىم سولاردىڭ بىرنەشەۋىنە ەرىكتى رەتىندە قاتىستىم. الماتى – شەتەلدىك قوناقتار قىزىعا قارايتىن اسەم قالا عوي. سوندىقتان ءبىز ءوزىمىز تۇراتىن جۇماق مەكەندى تازا ۇستاۋعا مىندەتتىمىز! اركىمگە ءوزى ءومىر سۇرەتىن، تۇراتىن جەرى قىمبات! مەن ءۇشىن الماتىعا جەتەتىن جەر جوق. الماتى جىل وتكەن سايىن جاسارىپ، كۇن وتكەن سايىن قۇلپىرىپ كەلەدى. جازدا ءتىپتى كەرەمەت! جاسىل جەلەگى مەن قىزىل-جاسىل گۇلدەرى جايقالعاندا، الماتى اجارلانا تۇسەدى. ارينە، مۇنىڭ بارلىعى تىنىمسىز ەڭبەكتى، ۇزدىكسىز تازالىقتى تالاپ ەتەدى. ءبىز تاڭەرتەڭ جۇمىسقا كەلە جاتقاندا سارى ءتۇستى كۇرتەشە كيىپ، قولدارىنا سىپىرتقى، كۇرەك ۇستاعان تازالىقشىلاردى كۇندە كورەمىز. ءبىراق، ءبىز ولاردىڭ جۇمىسىن ءالى دە باعالاي الماي كەلەمىز. شىنداپ كەلگەندە، الماتىمىزدىڭ تاپ-تازا بولىپ تۇرعانى تاڭمەن تالاسا ويانىپ، ىسكە كىرىسەتىن سول جانداردىڭ ەڭبەگى! – دەيدى المالى اۋدانىنىڭ تۇرعىنى نۇرگۇل قويشىبەكوۆا.