تاۋەلسىزدىك مەرەكەسى قارساڭىندا «Almaty Resort» شيپاجايىنىڭ باسشىلىعى مەن قىزمەتكەرلەرى سوعىس ارداگەرلەرىنە ارنايى بارىپ، ولاردىڭ ەرلىكتەرىن ەسكە الىپ، قۇرمەت كورسەتتى، دەپ حابارلايدى aqshamnews.kz
بالىقباي ىسقاق – 100 جاسقا تولعان ارداگەر. كەگەن اۋدانىنىڭ تۋماسى، 115ء-شى اتقىشتار ديۆيزياسىنىڭ قۇرامىندا ەۋروپانى ازات ەتۋگە قاتىسىپ، جەڭىس كۇنىن اۆستريادا قارسى العان. سوعىستان كەيىن قيىر شىعىستا قىزمەت اتقارىپ، قۇقىق قورعاۋ سالاسىندا ۇزاق جىلدار ەڭبەك ەتتى. ەرلىگى ءۇشىن III دارەجەلى داڭق وردەنىمەن جانە باسقا دا ناگرادالارمەن ماراپاتتالعان. ارداگەردىڭ ۇرپاقتارى ونىڭ باتىرلىق جولىن ماقتان تۇتادى.
ليۋبوۆ نيكولايەۆنا گوركوۆسكايا – 1925 جىلى لۋگانسك وبلىسىندا دۇنيەگە كەلگەن. سوعىس جىلدارى ءبىرىنشى ۋكراينا مايدانىندا بايلانىسشى بولىپ، سيەۆاستوپولدى، بەلارۋسسيانى جانە بالتىق جاعالاۋىن ازات ەتۋگە قاتىسقان. سوعىستان كەيىن "قازاقفيلم" كينوستۋدياسىندا ەڭبەك ەتىپ، ەكى بالا تاربيەلەدى. سوعىس جىلدارىنداعى ەرلىگى ءۇشىن العان ماراپاتتارى ونىڭ باتىلدىعىنىڭ كۋاسى.
اناتوليي نازار ۇلى پوپوۆ، قاسكەلەڭنىڭ 98 جاستاعى تۇرعىنى، 2ء-شى بالتىق مايدانىندا بايلانىسشى بولىپ قىزمەت ەتتى. سوعىستان كەيىن مەديسينالىق ۋچيليششەنى ءبىتىرىپ، 30 جىلدان استام ۋاقىت دەنساۋلىق ساقتاۋ سالاسىنا ۇلەس قوستى. بالالارى مەن نەمەرەلەرىنىڭ ورتاسىندا جۇرگەن ارداگەر جاستارعا ءوز ەرلىكتەرىن ۇلگى ەتەدى.
يۆان ماتۆەيەۆيچ بەگۋنوۆ – 99 جاستاعى قاراپايىم ءارى باتىر ارداگەر. جيتوميردە دۇنيەگە كەلگەن، 228ء-شى گۆارديالىق اتقىشتار پولكىنىڭ پۋلەمەتشىسى رەتىندە ەۋروپانى ازات ەتۋگە قاتىسقان. قىزىل تۋ وردەنى مەن «ەرلىگى ءۇشىن» مەدالىنىڭ يەگەرى. ءقازىر ۇلكەن اۋلەتىنىڭ ورتاسىندا قۇرمەتكە بولەنۋدە.
«Almaty Resort» ۇجىمى ارداگەرلەرگە قۇرمەت رەتىندە سىي-سياپات تابىستاپ، زور دەنساۋلىق پەن ۇزاق عۇمىر تىلەدى.
"جارقىن بولاشاق قۇرۋ ءۇشىن وتكەندى ەستە ساقتاۋ كەرەك! بەيبىت ءومىر ءۇشىن كۇرەسكەن باتىرلارعا باس يەمىز"، – دەپ اتاپ ءوتتى شيپاجاي ديرەكتورىنىڭ ورىنباسارى سالتانات بەيسەمبايەۆا. ول مۇنداي كەزدەسۋلەردىڭ ارداگەرلەردىڭ وزدەرىن قۇرمەت پەن قامقورلىقتا سەزىنۋى ءۇشىن تۇراقتى تۇردە ۇيىمداستىرىلاتىنىن جەتكىزدى.