وڭىرلىك كوممۋنيكاسيالار قىزمەتىنىڭ الاڭىندا حالىقتىڭ قارجىلىق ساۋاتتىلىعىن ارتتىرۋعا باعىتتالعان «قارىزسىز قوعام» جوباسىنىڭ قورىتىندىسى جاريالاندى، دەپ حابارلايدى aqshamnews.kz
جوبا 2024 جىلدىڭ 5 اقپانىندا باستالىپ، 12 563 قاتىسۋشىنى قامتىدى. بۇل باستاپقىدا جوسپارلانعان 12 000 ادامنان اسىپ ءتۇستى. جوبانى الماتى اكىمدىگى مەن قارجى نارىعىن رەتتەۋ جانە دامىتۋ اگەنتتىگىنىڭ قولداۋىمەن «AMANAT» پارتياسى جۇزەگە اسىردى.
بريفينگ بارىسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ جوبانىڭ باستى كورسەتكىشتەرىمەن ءبولىستى. ونىڭ ايتۋىنشا، قاتىسۋشىلاردىڭ 22،9%-ى كوپبالالى وتباسىلار بولسا، 74،3%-ىنىڭ نەسيەلەرى بار. سونىمەن قاتار، قاتىسۋشىلاردىڭ 13،8%-ى تولەمدەرىن 90 كۇننەن استام ۋاقىت كەشىكتىرگەن.
«جوبانىڭ ماقساتى — حالىقتىڭ قارجىلىق ساۋاتتىلىعىن ارتتىرۋ. بۇل جەكە قارجىنى باسقارۋ، شىعىنداردى وڭتايلاندىرۋ، نەسيەلەر مەن قارىزدار بويىنشا كەڭەستەر، سونداي-اق جۇمىسقا ورنالاسۋ جونىندەگى جەكە كونسۋلتاسيالاردى قامتيدى. وقىتۋ الماتىنىڭ سەگىز اۋدانىندا مىندەتتى باعدارلامالار مەن ساراپشىلاردىڭ كەڭەستەرى ارقىلى جۇزەگە اسىرىلدى»، — دەدى ب. جاۋباسوۆ.
وقۋ باعدارلاماسىنىڭ ناتيجەسىندە 5708 قاتىسۋشى ءتۇرلى قىزمەت تۇرلەرىن پايدالاندى:
- جەكە بيۋدجەتتى قۇرۋ (2814 ادام)؛
- قارىزدار مەن بانكروتتىق بويىنشا زاڭ كومەگى (627 ادام)؛
- جەڭىلدەتىلگەن نەسيەلەندىرۋگە جانە گرانتتارعا قۇجاتتار دايىنداۋ (298 ادام)؛
- نەسيەنى قايتا قارجىلاندىرۋ (207 ادام)؛
- نەسيەنى ءىشىنارا نەمەسە مەرزىمىنەن بۇرىن وتەۋ بويىنشا كەڭەستەر (467 ادام)؛
- گرانت پەن نەسيە الۋ ءۇشىن جك اشۋ (445 ادام).
سونىمەن قاتار، مەملەكەتتىك باعدارلامالارعا قاتىسۋ ءۇشىن 180 بيزنەس-جوسپار دايىنداۋعا كومەك كورسەتىلدى.
بريفينگكە «AMANAT» پارتياسى الماتى قالالىق فيليالى ءتوراعاسىنىڭ ورىنباسارى قۋانىش تولەپوۆ قاتىستى. ول پيلوتتىق كەزەڭ بارىسىندا ەلىمىز بويىنشا 65 مىڭنان استام ادامنىڭ وقۋدان وتكەنىن اتاپ ءوتتى.
«قازىرگى زامان تالابى — ءار ادامنىڭ جەكە قارجىنى باسقارۋ نەگىزدەرىن ءبىلۋى. بۇل بيۋدجەتتى ءتيىمدى جوسپارلاۋ ءۇشىن عانا ەمەس، وتباسى، قوعام جانە ەلدىڭ ءال-اۋقاتىن ارتتىرۋ ءۇشىن دە ماڭىزدى»، — دەپ اتاپ ءوتتى ق. تولەپوۆ.
«قارىزسىز قوعام» جوباسى ءتيىمدى جۇزەگە اسىرىلۋدا جانە الماتى تۇرعىندارىنىڭ قارجىلىق ساۋاتتىلىعىن ارتتىرۋعا ۇلكەن ۇلەس قوسۋدا. جوبا حالىقتىڭ بارلىق ساناتتارىنا جەكە قارجىنى باسقارۋ داعدىلارىن قالىپتاستىرۋ ارقىلى 2026 جىلعا دەيىن جالعاساتىن بولادى.