تاۋەلسىزدىك – باياندى بولاشاقتىڭ كەپىلى

ەلىمىزدىڭ ازاتتىققا قول جەتكىزگەنىنە وتىز جىلدان استى.

تاۋەلسىزدىكتىڭ العاشقى جىلدارىندا كەڭەس ۇكىمەتىنەن قالعان توزىعى جەتكەن، تەحنولوگياسى ەسكىرگەن ءوندىرىس ورىندارىنىڭ بىرتىندەپ توقتاي باستاۋى، وندا جۇمىس ىستەيتىن مامانداردىڭ ازايۋى، ازىق-تۇلىك ونىمدەرى مەن قاجەتتى تاۋارلاردىڭ، تاعى دا باسقا كوپتەگەن دۇنيەلەردىڭ جەتىسپەۋشىلىگىنەن قيىن كەزەڭدەردى باستان كەشىردىك.

تاۋەلسىزدىك جاستارىمىزدىڭ الەمنىڭ وزىق وقۋ ورىندارىنان ءبىلىم الىپ، بىلىكتى عالىمداردان، كاسىپكەرلەردەن، مەنەدجەرلەردەن، شىعارماشىلىق تۇلعالاردان ساباق الىپ، تاجىريبە الماسىپ جان-جاقتى دامۋىنا جول اشتى. قاشاندا ەل باسشىلارىنىڭ ۇزدىكسىز قولداۋىنا يە بولىپ كەلە جاتقان، ەلىمىزدەگى كاسىبي مۋزىكا ماماندارىن دايارلايتىن بىرەگەي جوعارى وقۋ ورنى – قۇرمانعازى اتىنداعى قازاق ۇلتتىق كونسەرۆاتورياسى ونەرلى جاستاردى الەمدىك مادەنيەتتىڭ كوشىنە ىلەستىرۋگە، ۇلتتىق ونەردى شەتەلدەردە بارىنشا ناسيحاتتاۋعا ەرەكشە مۇمكىندىك الدى. ونەر-بىلىم ورداسىنىڭ وقىتۋشىلارى، ءبىلىم الۋشىلارى مەن تۇلەكتەرى ءتۇرلى حالىقارالىق كونفەرەنسيالارعا، جوبالارعا قاتىسىپ، حالىقارالىق بايقاۋلار مەن فەستيۆالداردا، كونسەرتتەردە ونەر كورسەتىپ، ۇلتتىق مۋزىكامىزدى ناسيحاتتاپ، ەلىمىزدىڭ مەرەيىن ءوسىرىپ، الەمدىك اكادەميالىق مۋزىكا مۇرالارىن جانە اسپاپتىق ورىنداۋشىلىق ونەرىن جوعارى دەڭگەيدە مەڭگەرگەندىگىن دالەلدەپ كەلەدى.

اتاپ ايتقاندا، ستۋدەنتتىك سيمفونيالىق وركەستردىڭ قازاقستان قالالارىندا كونسەرتتىك قويىلىمدار كورسەتۋى، ۇلىبريتانياداعى Barbican Hall كونسەرتتىك زالىندا، يتاليانىڭ  سان فەليچە اكادەمياسىندا وتكەن  «Ninth International Festival of European Youth Orchestras» اتتى جاستار وركەسترى فەستيۆالىندە، گەرمانيانىڭ بەرلين، كاسسەل، فرانكەنبەرگ، باتتەنبەرگ، بونن قالالارىندا وتكەن «Young Euro Classic» جانە «Kultursommer» حالىقارالىق جاستار وركەسترى فەستيۆالىندە ونەر كورسەتۋى، قازاق ۇلت اسپاپتار ستۋدەنتتىك وركەسترىنىڭ قىتايعا جانە تۇركيانىڭ انكارا، ستامبۋل قالالارىنا گاسترولدىك ساپار جاساۋى، قىرىمدا وتكەن «حالىقارالىق ونەرلى جاستار مەن ستۋدەنتتەر فەستيۆالىنە» قاتىسۋى، ستۋدەنتتىك ارالاس حوردىڭ يتالياداعى حالىقارالىق حور ۇجىمىنىڭ «مۋزىكالىق ۆەنەسيا-2009» فەستيۆالىنە قاتىسۋى، ستۋدەنتتىك كامەرالىق وركەستردىڭ تاجىكستانداعى حالىقارالىق «باحوريستان» كامەرالىق وركەسترلەر فەستيۆالىنە قاتىسۋى جانە كونسەرۆاتوريا پەداگوگتارى مەن ستۋدەنتتىك ۇجىمدارىنىڭ الماتى قالاسىنداعى رەسپۋبليكا سارايىندا، استانا قالاسىنىڭ كونسەرتتىك زالدارىندا، ەلىمىزدىڭ وزگە وڭىرلەرىندە تابىستى ۇجىمدىق كونسەرتتەر قويۋى، باسقا دا الەمدىك ساحنالاردا ونەر كورسەتۋى، مۋزىكاتانۋشى، ونەرتانۋشى عالىمدارىمىز بەن ماگيسترانت جانە دوكتورانتتارىمىزدىڭ ءوز ەڭبەكتەرىن بەدەلدى حالىقارالىق باسىلىمداردا جاريالاپ، كونفەرەنسيالارعا قاتىسىپ، شەتەلدىك ارىپتەستەرىن مويىنداتۋى – كونسەرۆاتوريانىڭ عىلىمي، ورىنداۋشىلىق، شىعارماشىلىق الەۋەتىن ايقىنداسا كەرەك-تى. وسىنداي كاسىبي مۋزىكالىق ءبىلىم بازاسىمەن «قارۋلانعان» كونسەرۆاتوريا بىتىرۋشىلەرى بولاشاق مۋزىكا مامانى رەتىندە رەسپۋبليكانىڭ بارلىق مۋزىكالىق ۇجىمدارىندا، كونسەرتتىك ۇيىمدار مەن وقۋ ورىندارىندا تابىستى قىزمەت ەتۋدە. بۇل – ەل تاۋەلسىزدىگىنىڭ ءبىزدىڭ جوعارى وقۋ ورنىنداعى جەتىستىگى.

اقپاراتتىق تەحنولوگيالار بارىنشا دامىپ، ءتۇرلى زياندى اقپاراتتار ازاماتتارىمىزدىڭ ساناسىن ۋلاپ جاتقان جاھاندانۋ زامانىندا ەلدىگىمىزگە باستى ءقاۋىپتىڭ قايدان ەكەنىن سارالاپ، حالقىمىزدىڭ ۇلتتىق بولمىسىن، رۋحاني ساۋلىعىن، بىرلىگىن ساقتاۋ اسا ماڭىزدى ماسەلە بوپ تۇر. تاۋەلسىزدىگىمىز باردا – ونداي باعىتتاعى شارۋالاردى جاساۋ مۇمكىندىگى ءوز قولىمىزدا. مەملەكەت بولماق تۇگىلى ۇلتتىعىن ساقتاي الماي جۇتىلىپ كەتكەن، جوعالىپ بارا جاتقان ەتنوستار قانشاما؟! تاۋەلسىزدىكتىڭ باياندى بولۋىنىڭ باستى كەپىلى – اۋىزبىرلىك، تىنىشتىق پەن بەيبىتشىلىك. «ب ا ق قايدا باراسىڭ، ىنتىماققا بارامىن» دەيدى اتادان قالعان اسىل ءسوز. ۇزدىكسىز دامۋ ۇستىندەگى قازىرگى زاماندا تاۋەلسىزدىگىمىزدى نىعايتىپ، ازاماتتارىمىزدىڭ رۋحاني-ينتەللەكتۋالدىق الەۋەتى مەن ءال-اۋقاتىن كوتەرىپ، باسەكەگە قابىلەتتى، دامىعان ەلدەر قاتارىنا قوسىلىپ، سول بيىگىمىزدەن تۇسپەي، باسقالارعا ۇلگى بولارلىق جاعدايعا جەتۋ ءۇشىن ەل ەرتەڭىنە الاڭدايتىن ءاربىر ازامات مەيلىنشە وسى قۇندىلىقتاردى ساقتاپ، ۇرپاقتان-ۇرپاققا قايماعىن بۇزباي جەتكىزۋ ءۇشىن ايانباي اتسالىسۋى كەرەك دەپ ەسەپتەيمىن. تاۋەلسىزدىگىمىز تۇعىرلى، بولاشاعىمىز جارقىن بولسىن!