بيىل جول جۇمىسشىلارىنىڭ جالاقىسى 30% - عا كوتەرىلدى.
مەملەكەت باسشىسىنىڭ ءبىرتۇتاس اۆتوجول كومپانياسىن قۇرۋ جونىندەگى تاپسىرماسى اياسىندا قازاۆتوجول ۇلتتىق كومپانياسى ءۇش نەگىزگى باعىت بويىنشا جۇيەلى جۇمىس جۇرگىزۋدە، دەپ حابارلايدى Almaty-akshamy.kz
ءبىرىنشى. كۇتىپ-ۇستاۋ جۇمىستارىنىڭ ساپاسىن ارتتىرىپ، جول قىزمەتكەرلەرىنىڭ جۇمىسىنا قولايلى جاعداي جاساپ، قولداۋ ماقساتىندا قوسىمشا جاڭا 150 بىرلىك ارنايى تەحنيكا الىندى. ولاردىڭ قاتارىندا جول ماشينالارى، شنەكوروتورلار، تيەگىشتەر، اۆتوگرەيدەرلەر، متز جانە ت.ب. بار. جاڭا تەحنيكا قوزعالىس قارقىندىلىعى جوعارى جول ۋچاسكەلەرىنە، سونداي-اق قار باسۋ ءقاۋپى جوعارى ۋچاسكەلەرگە جىبەرىلدى. سونىمەن قاتار، قولدانىستاعى تەحنيكا ءۇشىن 60 قوسىمشا جابدىق ساتىپ الىندى. كۇتىپ ۇستاۋ جۇمىستارى جىل بويى جۇرگىزىلەتىندىكتەن، جاڭا تەحنيكانى قالعان ءۇش مەزگىلدە دە قولدانۋعا بولادى.
ەكىنشى. جول قىزمەتكەرلەرىن ماتەريالدىق تۇرعىدا ىنتالاندىرىپ، كادرلاردىڭ تۇراقسىزدىعىن الدىن الۋ ءۇشىن 2023 جىلدىڭ باسىنان بەرى جول جۇمىسشىلارىنىڭ جالاقىسى 30% - عا كوتەرىلدى.
ءۇشىنشى. قىزمەتكەرلەردىڭ ەڭبەك جاعدايىن جاقسارتىپ، قاۋىپسىزدىكتى ارتتىرۋ ءۇشىن جول-پايدالانۋ قىزمەتتەرىنىڭ عيماراتتارىن جوندەۋ جۇمىستارىمەن قامتۋ جوسپارلانىپ وتىر.
جوعارىدا اتالعان باعىتتار بويىنشا قولعا الىنعان جۇمىس بيىل جالعاسىن تاپپاق.
ەل وڭىرلەرىندەگى قازاۆتوجولعا قاراستى جول قىزمەتتەرى تاۋلىك بويى كۇشەيتىلگەن رەجيمدە قىسقى كۇتىپ-ۇستاۋ جۇمىستارىن جالعاستىرۋدا. ماماندار جۇرگىزۋشىلەردى قىس مەزگىلىندە جول بويىندا ەرەكشە ساق بولۋعا، اۋا-رايى بولجامىن ءجىتى قاداعالاپ، ەسكەرۋگە جانە ارنايى تەحنيكانىڭ جۇمىسىنا قوسىمشا كەدەرگى تۋدىرماۋعا شاقىرادى.
جولدا قانداي دا ءبىر شتاتتان تىس جاعداي تۋىنداسا 1403 قىسقا ءنومىرى بويىنشا قازاۆتوجولدىڭ ءبىرىڭعاي تاۋلىك بويى جۇمىس ىستەيتىن بايلانىس ورتالىعىنا جۇگىنۋ قاجەت.