الماتىدا قارجى الاياقتارىمەن قالاي كۇرەسەدى؟

الماتى قالاسىنىڭ ەكونوميكالىق تەرگەۋ دەپارتامەنتىنىڭ وكىلى جاقسىلىق مىرزاحان وڭىرلىك كوممۋنيكاسيالار قىزمەتىنىڭ بريفينگىنە قاتىسىپ، ونىڭ بارىسىندا وتكەن جىلى ولاردىڭ ۆەدومستۆوسى 8 قارجى پيراميداسىنىڭ قىزمەتىن توقتاتقانىن ايتتى.

وكق سپيكەرى ەكونوميكالىق تەرگەۋ دەپارتامەنتىنىڭ قىزمەتكەرلەرى قارجى پيراميدالارىنىڭ جولىن كەسى مەن جويۋدا قانداي ءىس-شارالار وتكىزەتىنىن ايتتى، دەپ حابارلايدى Almaty-akshamy.kz.

«قازىرگى ۋاقىتتا قارجى پيراميدالارى باستاپقى كەزەڭدە جويۋ ءۇشىن شارالار قولدانۋدا. جارقىن مىسال – «كيبەرقاداعالاۋ» اقپاراتتىق جۇيەسى ارقىلى ينتەرنەت كەڭىستىگىندە سايتتاردى، اككاۋنتتاردى جانە جارنامالىق سىلتەمەلەردى بۇعاتتاۋ جۇمىستارى تۇراقتى تۇردە جۇرگىزىلۋدە. 2022 جىلى 396 ينتەرنەت سىلتەمەلەرى بۇعاتتالعان بولاتىن»، - دەپ حابارلادى جاقسىلىق مىرزاحان. 

بۇگىنگى تاڭدا ق ر قارجىلىق مونيتورينگ اگەنتتىگى قارجى پيراميدالارىن ۇيىمداستىرۋشىلاردىڭ ىس-ارەكەتتەرىن ەسكەرتۋگە مۇمكىندىك بەرەتىن ءبىرقاتار ءىس-شارالار ازىرلەندى.

كومپانيالاردى قارجى پيراميداسىنىڭ بەلگىلەرىنە تەكسەرۋ ءۇشىن «بايقا پيراميدا!» تەلەگرام-بوتى ەنگىزىلدى. بۇگىنگى تاڭدا وعان ازاماتتاردان 2 مىڭنان استام ءوتىنىم كەلىپ تۇسكەن، ونىڭ ىشىندە 1800ء-ى قارالدى. بۇل رەتتە، اتالعان جۇمىس ولاردى الدىن-الا انىقتاۋعا باعىتتالعاندىعىن ايتا كەتۋ قاجەت.

جالپى، 2022 جىلى الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى الماتى قالاسىنىڭ اۋماعىندا (Innova Gold)، (QOZGAN)، (the Finiko)، (Grand lux house)، (Tender)، (الفا سەيلس كونسالتينگ)، (Forex كلۋب) (Rich Beach) سەكىلدى 8 قارجى پيراميداسىنىڭ قىزمەتىن توقتاتتى. 

 ق ر قىلمىستىق كودەكسىنىڭ 217 - بابىمەن قارجى پيراميدالارى بويىنشا قوزعالعان 6 قىلمىستىق ءىس سوتقا جولداندى: "Caspian Crocus"، "TheFiniko"، "World Business Consulting" - (2)، "Qozgan Inc"، "B2B Jewelry". جوعارىدا اتالعان قارجى پيراميدالارىنىڭ قىزمەتىنەن 3500-دەن استام ازامات زارداپ شەكتى.

ماسەلەن، «Qozgan Inc» قارجى پيراميداسىن ۇيىمداستىرۋشىلارعا قاتىستى سوتقا دەيىنگى تەرگەۋدى اياقتالدى.
ۇيىمداستىرۋشىلار ازاماتتارعا وزدەرىنىڭ اقشالاي قاراجاتتارىن تەندەرلىك جوبالارعا سالۋدى ۇسىندى، بۇل 105 كۇن ىشىندە سالىم سوماسىنىڭ 5-30 پايىزعا دەيىن ەسەلەپ قايتارۋعا بولادى دەپ سەندىرگەن.

سالىمشىلاردىڭ جالپى سانى 50-دەن استام ادامدى قۇرايدى، كەلتىرىلگەن زالال سوماسى 270 ملن.تەڭگەدەن استى.

«سونداي-اق، قۇرامىندا التىن ەلەمەنتتەرى بار التىن قۇيمالارى مەن كوسمەتيكالىق ونىمدەردى ساتاتىن ينتەرنەت-دۇكەن رەتىندە جاسىرىنعان "Innova Gold" قارجى (ينۆەستيسيالىق) پيراميداسىن ۇيىمداستىرۋشىعا قاتىستى سوتقا دەيىنگى ءىس جۇرگىزۋ تەرگەلۋدە.
«Innova Gold» ۇيىمداستىرۋشىلارى ازاماتتاردىڭ سەنىمىنە كىرىپ، جوباعا شاقىرعان. قاراجات سالعانى ءۇشىن بونۋستار ەسەپتەۋگە، سونداي-اق ەگەر كليەنت وزىمەن بىرگە باسقا سالىمشىلاردى الىپ كەلگەن بولسا، جوباداعى ءرولىن ىلگەرىلەتۋگە ۋادە بەرە وتىرىپ» - دەپ جالعاستىردى سپيكەر.

ازاماتتاردىڭ سالعان اقشالاي قاراجاتى «Innova Gold» سايتىنداعى سالىمشىنىڭ جەكە كابينەتىندە كورسەتىلدى، الايدا سايت پايدالانۋشىلارى ءوز قاراجاتتارىن ءىس جۇزىندە قولما-قول اقشاعا اينالدىرا المادى. 

بۇل ءىس بويىنشا تەرگەۋ جۇرگىزىلىپ جاتىر، ونىڭ ناتيجەسى باق-دا جاريالاناتىن بولادى. 

 الماتى قالاسى بويىنشا ەتد قىزمەتكەرلەرىنىڭ قابىلداعان شارالارىنىڭ ناتيجەسىندە قارجى پيراميداسىنا كىرۋ، ادەتتە، ەرىكتى نەگىزدە جانە قۇقىقتىق سۇيەمەلدەۋسىز جۇزەگە اسىرىلاتىنىن اتاپ ءوتتى. الايدا، ءبىزدىڭ وندىرىستە اياقتالعان قىلمىستىق ىستەر بار، وندا ازاماتتار سالىنعان قاراجاتتارىن قايتارا الدى.

ەكونوميكالىق تەرگەۋ قىزمەتىنىڭ قابىلدانعان شارالاردىڭ ناتيجەسىندە، قارجى پيراميدالارىن ۇيىمداستىرۋشىلاردىڭ بانك شوتتارىنا، جىلجىمالى جانە جىلجىمايتىن مۇلىكتەرىنە تىيىم سالىندى. مىسالى، "World Business Consulting" قارجى پيراميداسىن ۇيىمداستىرۋشىلارعا قاتىستى قىلمىستىق ءىس بويىنشا سەگىز جابىرلەنۋشىگە كەلتىرىلگەن 34 255 155 تەڭگە سوماسىندا زالال وتەلدى.

«B2B Jewerly» قارجى پيراميداسىن ۇيىمداستىرۋشىلارعا قاتىستى قىلمىستىق ءىس بويىنشا 230-دان استام جابىرلەنۋشىگە 300 ملن.تەڭگە سوماسىنا زالال وتەلدى. 2،2 ملرد. تەڭگە سوماسىنا مۇلىككە تىيىم سالىندى.

«وسى مۇمكىندىكتى پايدالانا وتىرىپ، ازاماتتاردى ەلىمىزدە قارقىن الىپ جاتقان ينتەرنەت-الاياقتىقتان دا ساقتاندىرعىم كەلەدى. «جالعان قارجى» ۇيىمدارىنىڭ ۇسىنىستارىن تاراتۋ جاعدايلارى جيىلەپ كەتتى. ولار اقشانى مۇناي ءوندىرۋشى كومپانيالاردىڭ، تانىمال بانكتەردىڭ جانە كۆازيمەملەكەتتىك سەكتور سۋبەكتىلەرىنىڭ ءىرى جوبالارىنا جوعارى جانە ءپاسسيۆتى كىرىستىلىك ۋادەسىمەن ينۆەستيسيالاۋعا شاقىرادى»، - دەيدى جاقسىلىق مىرزاحان. 

سەندىرۋ ءۇشىن ۇيىمداستىرۋشىلار تانىمال جاڭالىقتار پورتالدارىنىڭ لوگوتيپتەرى مەن ديزاينىن پايدالانادى، سونىمەن قاتار تانىمال تۇلعالار مەن جوعارى لاۋازىمدى شەنەۋنىكتەردى اتاپ وتەدى. مۇنداي رەسۋرستارعا كىرە وتىرىپ، ءسىز ءوزىڭىزدىڭ ساۋالنامالىق دەرەكتەرىڭىزدى تولتىرماۋىڭىز كەرەك. وسىدان كەيىن، ولار قوڭىراۋ شالا باستايدى، ءاتى-جونىن سۇرايدى، ولار وزدەرىن بانكتىڭ نەمەسە قۇقىق قورعاۋ ورگانىنىڭ قىزمەتكەرلەرىمىز دەپ تانىستىرىپ، سىزگە نەسيە راسىمدەلگەنىن نەمەسە قىلمىستىق ءىس قوزعالادى دەپ ايتادى. توسىن ءسات پەن ءسىزدىڭ شاتاسۋىڭىزدى پايدالانىپ، ولار ءسىزدىڭ بانكتىك دەرەكتەرىڭىزدى الىپ الۋى مۇمكىن.
 
وسىعان وراي، الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى ازاماتتاردى قىراعى بولۋعا جانە ءوز جيناقتارىن كۇماندى قارجى ۇيىمدارىنا سالماۋعا شاقىرادى.
ەگەر ءسىز نەمەسە ءسىزدىڭ جاقىندارىڭىز قارجى پيراميدالارىنىڭ قۇربانى بولىپ نەمەسە كۇماندى جوبالارعا شاقىرىپ الىپ جاتساڭىزدار، الماتى قالاسىنىڭ ەكونوميكالىق تەرگەپ-تەكسەرۋ دەپارتامەنتىنە حابارلاسۋىڭىزدى سۇرايمىز (جىبەك جولى داڭعىلى، 127). سەنىم تەلەفونى 279-29-56 نەمەسە ق ر قم الەۋمەتتىك جەلىلەردەگى رەسمي اككاۋنتتارى ارقىلى.