بيىل اسقار توقپانوۆ اتىنداعى وبلىستىق قازاق دراما تەاترىنىڭ 90 جىلدىعى جانە قازاقتىڭ تۇڭعىش كاسىبي رەجيسسەرى، ۇستاز، ۇلى تۇلعا - اسقار توقپانوۆتىڭ 110 جىلدىق مەرەيتويى اتالىپ وتۋدە.
وسىعان وراي تارازدا رەسپۋبليكالىق تەاتر فەستيۆالى سالتاناتتى تۇردە باستاۋ الدى، - دەپ حابارلايدى Aqshamnews.kz.
ءىس-شارا باستالماس بۇرىن تەاتر ۇجىمدارى مەن ارتىستەر قىزىل كىلەمنەن ءوتىپ، ونەردىڭ مەرەيىن اسىردى. شارا بارىسىندا قاتىسۋشىلار قازاق تەاتر ونەرىنىڭ كوريفەيى - اسقار توقپانوۆتىڭ ەسكەرتكىشىنە تاعزىم ەتىپ، گۇل شوقتارىن قويدى.
سالتاناتتى شارادا قازاقستاننىڭ حالىق ءارتىسى، تەاتر جانە كينو ونەرىنىڭ مايتالمانى ءاسانالى ءاشىموۆ، سونداي-اق تەاتر جانە كينو اكتەرى، قازاقستان تەاتر قايراتكەرلەرى وداعىنىڭ ءتوراعاسى تۇڭعىشباي ءال-تارازي قۇتتىقتاۋ ءسوز سويلەپ، اسقار توقپانوۆتىڭ ۇستازدىق جانە شىعارماشىلىق بولمىسى جايىندا ەستەلىكتەرىمەن ءبولىستى.
رەسپۋبليكالىق تەاتر فەستيۆالىنە ەلىمىزدىڭ ءار وڭىرىنەن التى تەاتر قاتىسۋدا. ولاردىڭ قاتارىندا س.قوجامقۇلوۆ اتىنداعى ۇلىتاۋ تەاترى، اتىراۋ وبلىستىق ماحامبەت اتىنداعى اكادەميالىق قازاق دراما تەاترى، ر.سەيتمەتوۆ اتىنداعى تۇركىستان تەاترى، ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترى، ب.ريموۆا اتىنداعى تالدىقورعان دراما تەاترى جانە قوناقجاي تارازدىڭ ماقتانىشى – اسقار توقپانوۆ اتىنداعى وبلىستىق قازاق دراما تەاترى بار.