2025 جىلدىڭ سوڭىنا دەيىن الماتىدا ءبىلىم وردالارىنىڭ تاپشىلىعى التى ەسە ازايادى

الماتى قالاسى وڭىرلىك كوممۋنيكاسيالار قىزمەتىنىڭ الاڭىندا قالا اكىمىنىڭ ورىنباسارى بەيبىت شاحانوۆتىڭ قاتىسۋىمەن ءبىلىم بەرۋ سالاسىنداعى ىسكە اسىپ جاتقان جوبالارعا ارنالعان بريفينگ ءوتتى.
 
اكىم ورىنباسارى مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، ءۇش اۋىسىمدى وقىتۋدى جانە سىنىپتاردىڭ شامادان تىس تولۋىن جويۋ – باستى مىندەتتەردىڭ ءبىرى ەكەنىن اتاپ ءوتتى. بۇل تىكەلەي ءبىلىم ساپاسى مەن وقۋشىلاردىڭ جايلىلىعىنا اسەر ەتەدى، - دەپ حابارلايدى Aqshamnews.kz.
 
«ساپالى ءبىلىم بەرۋگە قولايلى جاعداي جاساۋ – ستراتەگيالىق ماقسات. ءار بالا ءقاۋىپسىز ءارى زاماناۋي ورتادا وقۋى ءۇشىن جاڭا وقۋ ورىندارىن سالىپ، عيماراتتاردى جاڭارتىپ جاتىرمىز»، – دەدى سپيكەر.
 
2025 جىلى الماتىدا بارلىعى 24 ءبىلىم نىسانىنىڭ قۇرىلىسى اياقتالدى.
پرەزيدەنت باستاماسىمەن جۇزەگە اسىپ جاتقان «جايلى مەكتەپ» ۇلتتىق جوباسى اياسىندا 22 500 وقۋشى ورنىنا ارنالعان 12 جاڭا وقۋ مەكەمەسى بوي كوتەردى. ونىڭ ىشىندە 7 ءبىلىم ورداسى جاڭا وقۋ جىلىنىڭ باسىندا اشىلدى.
 
اشىلعان ءبىلىم مەكەمەلەرى قاتارىندا:
•        №217 – «سامعاۋ» ش/ا (2000 ورىن)،
•        №218 – «قاراسۋ» ش/ا (2000 ورىن)،
•        №219 – «تەرەكتى» ش/ا (2000 ورىن)،
•        №214 – «نۇرلى دالا» تك (1500 ورىن)،
•        №216 – رايىمبەك داڭعىلى، 210 (1500 ورىن)،
•        «اقبۇلاق» شاعىن اۋدانىنداعى وقۋ كەشەنى (1500 ورىن)،
•        №215 – روزىباكييەۆ–ليەۆيتان كوشەلەرىنىڭ قيىلىسى (1500 ورىن)
ءبىلىم وردالارى بار.
 
ەكىنشى توقساندا «قۇرامىس»، «شۇعىلا»، «قاراعايلى» شاعىن اۋداندارىندا جانە C.ءاشىموۆ پەن ەگىزبايەۆ كوشەلەرىندەگى 5 زاماناۋي وقۋ ورداسى ىسكە قوسىلادى.
 
سونىمەن قاتار، جەكە ينۆەستورلار ەسەبىنەن 11،7 مىڭ وقۋشىعا ارنالعان 8 وقۋ عيماراتىنىڭ قۇرىلىسى ءجۇرىپ جاتىر. بۇل ءبىلىم نىساندارىن قالا اكىمدىگى كەيىن ساتىپ الىپ، كەلەسى جىلى پايدالانۋعا بەرۋ جوسپارلانعان.
 
جاڭا وقۋ ورىندارى نەگىزىنەن وقۋشى ورنى جەتىسپەيتىن، تۇرعىن ءۇي قۇرىلىسى قارقىندى ءجۇرىپ جاتقان اۋدانداردا سالىنعان. بۇل – جاڭا فورماتتاعى، زاماناۋي جابدىقتارمەن قامتىلعان، بالالارعا بارىنشا قولايلى ءبىلىم كەڭىستىگى.
 
بۇدان بولەك، اباي قۇنانباي ۇلىنىڭ 180 جىلدىعىنا وراي 900 ورىندىق، جاتاقحاناسى بار اباي اتىنداعى مەكتەپ-ينتەرنات سالىندى. سونداي-اق الاتاۋ جانە ناۋرىزباي اۋداندارىندا 890 ورىندىق ەكى جاڭا وقۋ نىسانىنىڭ قۇرىلىسى جالعاسىپ جاتىر.
 
بەيبىت شاحانوۆتىڭ ايتۋىنشا، قالادا 17 ءبىلىم ورداسىندا قاۋىپسىزدىك پەن ساپانى ارتتىرۋ ماقساتىندا رەكونسترۋكسيا جانە سەيسموكۇشەيتۋ جۇمىستارى جۇرگىزىلۋدە، ال 5 وقۋ ورنى (№161، 33، 10، 189، 191) تولىق جاڭارتىلدى. سونىمەن قاتار 30 نىساننىڭ جوندەۋ جوبالارى دايىندالۋدا، ونىڭ 26-سى «مەكتەپتەردى رەنوۆاسيالاۋ» باعدارلاماسى اياسىندا ىسكە اسىرىلادى.
 
كەشەندى جۇمىستاردىڭ ناتيجەسىندە 2025 جىلدىڭ سوڭىنا دەيىن الماتىداعى وقۋشى ورنى تاپشىلىعى 34 مىڭنان 5–6 مىڭعا دەيىن ازايادى دەپ كۇتىلۋدە.
 
سونىمەن قاتار اكىم ورىنباسارى بالاباقشا قۇرىلىسى تۋرالى ايتتى. بيىل №10 شاعىن اۋدانىندا 160 ورىندىق جاڭا بالاباقشا اشىلدى. ال «جاس قانات»، «التىن بەسىك»، «شۇعىلا»، «قۇرامىس»، «قاراعايلى» اۋداندارىندا 1260 ورىنعا ارنالعان تاعى 5 مەكتەپكە دەيىنگى مەكەمە سالىنىپ جاتىر. 9 بالاباقشا قايتا جوندەلۋدە، سونىڭ ىشىندە «وربيتا-3» شاعىن اۋدانىنداعى بۇرىنعى عيمارات جاڭارتىلىپ، 480 ورىندىق زاماناۋي بالاباقشاعا اينالدى.
 
تاعى 16 مەكتەپكە دەيىنگى نىسان بويىنشا جوبالىق-سمەتالىق قۇجاتتاما دايىندالىپ جاتىر، ونىڭ تورتەۋىنىڭ قۇرىلىسى 2026 جىلدىڭ العاشقى توقسانىندا باستالادى.
 
قالادا قوسىمشا ءبىلىم بەرۋ ينفراقۇرىلىمىن دامىتۋعا دا ەرەكشە كوڭىل بولىنۋدە. بيىل ۆاحتانگوۆ كوشەسىندە كۇنىنە 900 بالا قابىلداي الاتىن شىعارماشىلىق دامۋ ورتالىعى سالىندى. ال «سايالى» شاعىن اۋدانىندا 1350 ورىندىق ءىرى ورتالىقتىڭ قۇرىلىسى ءجۇرىپ جاتىر، ول 2026 جىلدىڭ قىركۇيەگىندە اياقتالادى.
 
قالا اكىمىنىڭ ورىنباسارى اتاپ وتكەندەي، «جۇمىسشى ماماندىقتار جىلى» اياسىندا تەحنيكالىق ماماندىقتاردىڭ بەدەلىن ارتتىرۋ ءۇشىن قالادا 1770 ورىندىق جانە 418 جاتاقحانا ورنى بار ەكى كوللەدج سالىنىپ جاتىر. ولار تەلەكوممۋنيكاسيا، ماشينا جاساۋ جانە يننوۆاسيالار باعىتىنداعى مامانداردى دايارلايدى.