ازەربايجان پرەزيدەنتى ي. الييەۆتىڭ قازاقستانعا مەملەكەتتىك ساپارى بارىسىندا تاراز جانە قازاق قالالارى اراسىندا باۋىرلاستىق قاتىناس ورناتۋ جونىندەگى حاتتاماعا قول قويىلدى، دەپ حابارلايدى aqshamnews.kz
ازەربايجاننىڭ قازاقتار ءۇشىن ەرەكشە اتاۋى بار قالاسىنىڭ تاريحى تۋرالى قازاقستاننىڭ ازەربايجانداعى ەلشىسى ءالىم بايەل ايتىپ بەردى.
«قازاق — ازەربايجاننىڭ اسەم قالالارىنىڭ ءبىرى، ول گرۋزيا مەن ارمەنيا شەكاراسىنا جاقىن ورنالاسقان. ءبىز وسى اتاۋدىڭ ەتيمولوگياسىنا قاتىستى شاعىن زەرتتەۋ جۇرگىزىپ، قىزىقتى دەرەكتەرگە تاپ بولدىق.
16 عاسىردىڭ باسىندا ازەربايجان-پارسى بيلەۋشىسى شاح يسمايل مەن مۇحاممەد شايباني حان اراسىندا سوعىس بولعان. ال مۇحاممەد شايباني قازاق حانى قاسىمنىڭ بولەcءى بولعاندىقتان قاسىم حان وعان كومەككە جاساق جىبەرگەن. شايقاستا تۇتقىنعا تۇسكەن قازاق جاۋىنگەرلەرىن شاح يسمايل كاۆكازعا قونىستاندىرعان. سول كەزدەن باستاپ قازاق باتىرلارى ورىن تەپكەن بۇل ءوڭىر «قازاق» دەپ اتالىپ كەتكەن.
بۇگىندە ازەربايجاننىڭ سولتۇستىك-باتىسىندا قازاق اۋدانى مەن قازاق قالاسى بار. قازاق اۋدانىندا انتروپولوگيالىق تۇرعىدان قازاقتارعا ۇقسايتىن ادامداردى وسى كۇنگە دەيىن كەزدەستىرۋگە بولادى. ماسەلەن، ازەربايجاندىق تۇڭعىش اسكەري ۇشقىش فاررۋح اعا گايبوۆتىڭ سۋرەتىنە كوز سالساڭىز جەتكىلىكتى. قازاق اۋدانى — ازەربايجاندا قۇرت ازىرلەنەتىن جالعىز ايماق. سونداي-اق، مۇنداعى تۇرعىندار جىلقىنى ەرەكشە جاقسى كورەدى جانە وزدەرىنىڭ اقىندارىن — اشىقتاردى قادىرلەيدى. ءور مىنەزدى بولىپ كەلەدى.
وسىنىڭ بارلىعىن ەسكەرىپ، قازاق قالاسىنىڭ كونە تارازبەن باۋىرلاس بولعانىن ءجون سانادىق. سەبەبى تاراز — XV عاسىردا قازاق حاندىعى قۇرىلعان وڭىردە ورنالاسقان. بۇل سيمۆولدىق قادام باۋىرلاس حالىقتاردى ودان سايىن جاقىنداتا تۇسەدى.
جالپى، ازەربايجاندا ورتاق تاريحىمىزدى پاش ەتەتىن كوپتەگەن توپونيمدەر بار. مىسالى، قىپشاق جانە جالايىر دەپ اتالاتىن ەلدى مەكەندەر بار، ساقتارمەن بايلانىستى اتاۋلار كەزدەسەدى. دەمەك، بۇگىنگى ستراتەگيالىق ارىپتەستىگىمىز بەن باۋىرلاستىق بايلانىسىمىز بەرىك تاريحي ىرگەتاسقا نەگىزدەلگەن. كاسىبي تاريحشىلارىمىز كونە ءداۋىردىڭ وسى قىزىقتى بەتتەرىن زەرتتەسە يگى ەدى».