وتاندىق دارىگەرلەر العاش رەت سينتەتيكالىق پروتەزبەن باۋىر ترانسپلانتاسياسىن جاسادى
تابيعي تامىر ورنىنا جاساندى قان وتكىزگىشتەر قويىلدى. استاناداعى ۇلتتىق عىلىمي ونكولوگيا ورتالىعىنىڭ ماماندارى كۇردەلى وپەراسيانى ءساتتى اياقتادى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
30 جاستاعى ءمولدىردىڭ باۋىرى اۋىرعانىنا 7 جىل. دياگنوزى - الۆەوكوككوز. ياعني، ىشكە تۇسكەن پارازيت باۋىردى تۇگەلدەي جەپ، ءوت جولى مەن قان تامىرلاردى قىسىپ تاستاعان. كەيىن جۇرەككە جەتە باستاعان. وسى ۋاقىتقا دەيىن ناۋقاسقا 4 وپەراسيا جاسالعان. ءبىراق، ولاردىڭ ءبارى باۋىردىڭ جۇمىسىن ۋاقىتشا جاقسارتۋدىڭ قامى ەدى. ال، وسى جولى جانىنا باتقان دەرتتەن تولىق ايىقتى.
«2016 جىلى جاز ايىندا قويىلعان بولاتىن دياگنوز. تەك قانا ترانسپلانتاسيا جاساۋعا بولادى. ترۋپنىي دونوردان دەدى. رودستۆەننىيدان جاساۋعا كەلمەيدى دەگەن بولاتىن ول كەزدە. ول كەزدە مۇنداي پراكتيكا بولعان جوق. سول كەزدە ءبىز ليست وجيدانياعا تۇردىق. ءبىراق، 7 جىل ىشىندە ماعان سايكەس تابىلمادى»، - دەيدى استانا قالاسىنىڭ تۇرعىنى ءمولدىر مۇستافينا.
باۋىرمال اعا
ال بيىل مولدىرگە تۋعان اعاسى باۋىرىنىڭ 65 پايىزىن بەرگەن. ءوزى 35 پايىز باۋىرمەن ءومىر ءسۇرىپ ءجۇر. ءبىراق، اعزا تەز ءوسىپ، 3 اي ىشىندە قايتا قالپىنا كەلەدى.
«مەنىڭ قانىم توبى قارىنداسىممەن بىردەي داجە سالماق ءبارى كەلەتىن بولىپتى. ءوزىم 1 اۋىزدان شەشىم قابىلدادىم. ول باۋىر دەگەن وسەدى، ءوسىپ كەتەدى. ول قارىنداسىمنىڭ امانشىلىعىن ويلادىم، ارتىندا بالا-شاعاسى بار»، - دەيدى اعاسى راميل مۇستافين.
قازاقستاندا باۋىر ترانسپلانتاسياسى 2013 جىلى باستالعان. بۇگىنگە دەيىن 70 وتا جاسالعانىمەن، وپەراسيانىڭ وسى ءتۇرى العاش رەت. ويتكەنى، بۇل جولى تەك باۋىر ەمەس، تامىرلار دا اۋىستىرىلدى. جاساندى سينتەتيكالىق پروتەزدەر ءۇندىستاننان الىنعان. وپەراسيا قيىن بولعاسىن سول ەلدەن مامان شاقىرىلدى.
«مەن وسىعان ۇقساس 20-دان استام وپەراسياعا قاتىستىم. مۇنىڭ قيىندىعى جۇرەك قىزمەتى مەن جۇرەك-وكپە اينالىمىن ۋاقىتشا توقتاتۋ كەرەك. ول ءۇشىن بىزگە كارديوحيرۋرگيا ورتالىعىنىڭ ماماندارى كومەككە كەلدى. قازاقستانداعى العاشقى جۇمىس ءساتتى اياقتالدى. ەندى تۇراقتى تۇردە جاساۋعا بولادى»، - دەيدى ءۇندىستاندىق دارىگەر سەلۆاكۋمار ناگاناحان.
ءۇندىستاندىق ماماننىڭ سوزىنشە، ول جاقتا جىلىنا 3 مىڭداي باۋىر ترانسپلانتاسياسى جاسالادى. قازاقستاندا دا باۋىر دەرتىنە شالدىققاندار كوپ. اۋرۋ العاشىندا بىلىنبەيتىندىكتەن، ولار كوبىنە دارىگەرگە كەش قارالادى.
«قازاقستاندا ەپيدەميولوگيچەسكيي رەگيون دەيدى. بىزدە ۆەتەرينارلىق جۇمىستار ءقازىر ونشا ءجوندى جۇمىستا ەمەس. يحونوكوك، الۆەكوك ولار كوبىنەسە تۇلكىدە، يتتە بولادى. سولاردان ادامعا جۇعادى. ۆەتەرينارنىي سلۋجبا سونىڭ جۇمىسى كوتەرىپ، اڭداردىڭ سانىن ازايتىپ، سولاردان ەمدەۋ كەرەك مەنىڭشە»، - دەيدى مەديسينا عىلىمدارىنىڭ دوكتورى توقان سۇلتانالييەۆ.
باسقا اعزالارعا قاراعاندا باۋىردى اۋىستىرۋ قيىن. باستى ماسەلە دونور جەتىسپەيدى. ويتكەنى، قان توبى سايكەس كەلۋى كەرەك. ءبىراق، ءقازىر قان توبى باسقا بولسا دا، باۋىردى اۋىستىرۋ مۇمكىندىكتەرى قارالىپ جاتىر،-دەيدى ماماندار. ال، قايتىس بولعان ادامنىڭ اعزاسىن الۋ ءۇشىن تۋىسىنىڭ رۇقساتى كەرەك. بۇل جۇمىستى سوزبالاڭعا سالادى، ونىڭ ۇستىنە كوبى كەلىسپەيدى. سول سەبەپتى، بىلتىر 2 وپەراسيا عانا جاسالسا، بيىل 1-اق ادامنىڭ باۋىرى اۋىستىرىلعان. ال، ءمولدىر سياقتى 350 ادام كەزەكتە تۇر.