قازاقستاندا ەكولوگيالىق قۇندىلىقتاردى قالىپتاستىرۋ جانە تابيعاتقا ۇقىپتى قاراۋ ماسەلەسى مەملەكەت ساياساتىنىڭ باسىم باعىتتارىنىڭ بىرىنە اينالدى. مەملەكەت باسشىسى قاسىم-جومارت توقايەۆتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن جۇزەگە اسىرۋ اياسىندا بۇل سالاعا ايرىقشا نازار اۋدارىلىپ وتىر.
قورشاعان ورتانى قورعاۋ تەك تابيعاتتى ساقتاۋ شاراسى عانا ەمەس، ول – ۇرپاق بولاشاعىنا دەگەن جاۋاپكەرشىلىك. وسى ماقساتتا ەلىمىزدە «تازا قازاقستان» ەكولوگيالىق مادەنيەتتى دامىتۋدىڭ 2024–2029 جىلدارعا ارنالعان تۇجىرىمداماسى قابىلداندى. قۇجات قوعامدا ەكولوگيالىق وي-سانانى جاڭعىرتىپ، ازاماتتاردىڭ تابيعاتقا دەگەن قاتىناسىن تۇبەگەيلى وزگەرتۋگە باعىتتالعان.
تۇجىرىمدامادا نەگىزگى ءتورت باعىت ايقىندالعان:
-
حالىقتىڭ ەكولوگيالىق ويلاۋ دەڭگەيىن جانە مىنەز-قۇلقىن جەتىلدىرۋ؛
-
ەكولوگيالىق جاۋاپتى ءومىر سالتىن ىنتالاندىرۋ جۇيەسىن قۇرۋ؛
-
ەكولوگيالىق ءبىلىم بەرۋ مەن اعارتۋدى كەڭەيتۋ؛
-
ەكولوگيا تاقىرىبىن اقپاراتتىق كەڭىستىكتە بەلسەندى ناسيحاتتاۋ.
ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، تۇجىرىمداما ازاماتتاردىڭ تابيعاتقا دەگەن قۇرمەتىن كۇشەيتىپ، ولاردى ەكولوگيالىق ماسەلەلەردى شەشۋگە بەلسەندى قاتىسۋعا جەتەلەيدى.
مۇندا بيزنەس پەن ءىرى كاسىپورىنداردىڭ ۇلەسىنە دە ۇلكەن ءمان بەرىلگەن. ولار مەملەكەتپەن قاتار قوعامنىڭ دا سەنىمدى سەرىكتەستەرى رەتىندە تابيعاتتى قورعاۋ باستامالارىنا بەلسەندى ارالاسادى. ءقازىردىڭ وزىندە ەلىمىزدەگى كوپتەگەن كومپانيالار «تازا قازاقستان» اياسىندا تۇراقتى تەحنولوگيالاردى ەنگىزىپ، جەرگىلىكتى دەڭگەيدە ەكولوگيالىق جوبالاردى جۇزەگە اسىرىپ وتىر.
تابيعاتتى قورعاۋ مادەنيەتىن قالىپتاستىرۋ – تەك ءبىر سالانىڭ عانا ەمەس، بۇكىل قوعامنىڭ مىندەتى. بۇل باعىتتاعى جۇمىستار جاس ۇرپاققا ەكولوگيالىق جاۋاپكەرشىلىكتى ءسىڭىرىپ، ەلىمىزدىڭ ءار ازاماتىن تابيعاتقا جاناشىر بولۋعا شاقىرادى.
«تازا قازاقستان» باستاماسى ارقىلى قورشاعان ورتاعا قامقورلىق جاساۋ – ۇرپاقتار اراسىنداعى التىن كوپىرگە اينالىپ، ادىلەتتى ءارى جاسىل قازاقستاندى قۇرۋعا جول اشادى.