قازاقتار قاشان دا ىرىمعا ەرەكشە كوڭىل بولگەن. اشەكەي بۇيىم تەك ساندىك ءۇشىن ەمەس، ءتۇرلى بالە-جالەدەن ساقتايدى دەپ سەنگەن. ءار ورنەك پەن ءپىشىن ارقىلى اق تىلەگىن جەتكىزگەن.
مۇرىنعا تاعىلعان سىرعا
ءبىر كەزدەرى شەتەلگە ەلىكتەگەننەن بىزدە دە جاستار مۇرىنعا پيرسينگ، قازاقشا ايتقاندا سىرعا تاعۋ ءسان بولعان ەدى. سويتسەك، ونىڭ ءبىر تامىرى قازاقتىڭ وتكەن تاريحىمەن دە بايلانىسىپ جاتىر ەكەن.
سۋرەت: depositphotos.com
قازاق قىزىنىڭ مۇرنىنا پيرسينگكە ۇقساس سىرعا تاققانى بۇگىندە توسىن كورىنۋى مۇمكىن. ءبىراق تاريحي دەرەكتەردە بۇل جايلى مالىمەت بار. ەتنوگراف ي.گ.اندرەيەۆ:
«كەيبىر قازاق قىزدارى مۇرنىنا كۇمىس سىرعا تاعادى. بۇل – اكەسىنىڭ ەڭ سۇيىكتى قىزى ەكەنىن بىلدىرەدى»، – دەپ جازعان.
سول سياقتى گەنەرال-مايور برونيەۆسكييدىڭ ەڭبەگىندە دە مۇرىنعا تاعىلعان كۇمىس ساقينا «ءۇيدىڭ ەڭ ەركە قىزى» دەگەندى بىلدىرەتىنى ايتىلادى. مۇنداي اشەكەي «زەرە سىرعا» اتالعان. ايگىلى قۇنانبايدىڭ اناسى دا مۇرنىنا «زەرە» تاعىپ جۇرگەندىكتەن، حالىق ونى زەرە دەپ اتاپ كەتكەن دەگەن دەرەك بار.
ايەلدەر مەن ەرلەر تۇمارى
تۇمار – قازاق ءۇشىن تەك اشەكەي ەمەس، ىرىمدىق زات. كوز تيۋدەن، پالە-جالادان قورعايدى دەپ سەنگەن. العاشقى تۇمارلارعا ينە، ۇكى، ءجۇن سالىنعان. ساپارعا شىققاندار تۋعان جەرىنىڭ توپىراعىن بىرگە الىپ جۇرگەن.
سۋرەتتەر: womenofkz Instagram-پاراقشاسىنان الىندى
زەرتتەۋشىلەردىڭ ايتۋىنشا، ايەلدەر تۇمارىنىڭ ۇشى تومەنگە، ەرلەر تۇمارىنىڭ ۇشى جوعارىعا قاراعان. ال ەكەۋىن قوسىپ تاعۋ – تۇتاستىق پەن جاڭا ءومىردىڭ بەلگىسى بولعان.
ۇل بالالارعا سىرعا تاعۋ ءداستۇرى
قىزدارعا سىرعا تاعۋ مىندەتتى بولسا، ۇل بالالارعا دا بەلگىلى ءبىر جاعدايدا سىرعا تاعىلعان. ەگەر جالعىز نەمەسە كوپتەن كۇتكەن ۇل تۋسا، جىن-پەرىلەردى الداۋ ءۇشىن قۇلاعىنا سىرعا تاققان. مۇنداي سىرعانى بالا بەس جاسقا تولعاندا عانا شەشكەن.
سۋرەت: س. دۋدين. سۋرەتتەر womenofkz Instagram-پاراقشاسىنان الىندى
تاعى ءبىر نانىم بويىنشا، قايتىس بولعان ايەلدىڭ قۇلاعىنداعى سىرعاسى الىنباعان. ولاي جاساۋداعى سەنىم «قۇلاعىنا جىلان كىرمەسىن» دەگەننەن تۋعان دەسەدى.
شەكەلىك – سامايعا تاعىلعان اشەكەي
قازاق قىزدارىنىڭ تاعى ءبىر قورعانىش بۇيىمى – شەكەلىك. ول ساماي تۇسىنا تاعىلىپ، تىل-كوزدەن ساقتايدى دەپ سەنگەن. ال شولپى قىزدىڭ نازىكتىگىن كورسەتىپ، ارتىق سويلەۋدەن، قاتتى قيمىلداۋدان تىيسا، شەكەلىك سۇلۋلىقتى قورعاۋشى بولعان.
سۋرەت: جي، «NewTimes.kz» اا
وسى ورايدا مىنانداي قىزىق دەرەك بار: ايەلدىڭ جاسى ۇلعايعان سايىن اشەكەيىندەگى مونشاق سانى ازايىپ وتىرعان. وسىعان قاراپ، ونىڭ جاسىن بىلگەن.
قۇستۇمسىق جۇزىك – اكە اماناتى
جۇزىكتىڭ دە وزىندىك سىرى بار. «ازىرەت سۇلتان» قورىق-مۋزەيىنىڭ دەرەگىنشە، قۇستۇمسىق جۇزىكتى قىزىن ۇزاتقان اكە ارنايى سوققىزىپ، قىزىنىڭ ساۋساعىنا تاققان. بۇل – «بارعان جەرىڭدە سىيلى بول، تىل-كوزدەن امان ءجۇر» دەگەن تىلەك.
سۋرەت: calend.mycollection.kz
ەگەر قىزى جاڭا وتباسىندا باقىتتى بولسا، جۇزىكتى امانات ەتىپ اكەسىنە قايتارعان. مۇنداي حاباردى جەتكىزگەن جولاۋشىعا سىي-سياپات جاسالىپ، اكە قىزىنىڭ باقىتىن ەلگە جاريا ەتىپ توي جاساعان.