وقۋ-اعارتۋ ءمينيسترى عاني بەيسەمبايەۆ وڭىرلىك ءبىلىم باسقارمالارى باسشىلارىنىڭ قاتىسۋىمەن وتكەن اپپاراتتىق كەڭەستە سۋ تاسقىنىنان زارداپ شەككەن ايماقتارداعى بالالاردى ەلىمىزدەگى ەڭ ۇزدىك جازعى ساۋىقتىرۋ ورتالىقتارىنا جىبەرۋدى تاپسىردى.
ۆەدومستۆو باسشىسى وقۋ پروسەسىن ساپالى ۇيىمداستىرا وتىرىپ، بالالاردىڭ قاۋىپسىزدىگى مەن قۇقىقتارىن قورعاۋعا ەرەكشە نازار اۋدارۋ قاجەت ەكەنىن اتاپ ءوتتى. بالالاردىڭ قۇقىقتارىن قورعاۋ كوميتەتىنە ەڭ الدىمەن كومەككە مۇقتاج وتباسىلارداعى وقۋشىلاردىڭ جازعى دەمالىسىن ۇيىمداستىرۋدى تاپسىردى.
ايتا كەتەيىك، ەلىمىزدەگى جىل بويى جۇمىس ىستەيتىن 11 ساۋىقتىرۋ ورتالىعى 6-ساۋىردەن باستاپ وقۋ پروسەسىن ۇيىمداستىرا وتىرىپ، بالالاردى قابىلداۋعا دايىن. وقۋشىلاردى تاسىمالداۋ ءۇشىن مينيسترلىك قاۋىپسىزدىك جونىندەگى نۇسقاۋلىق پەن ۆەدومستۆوارالىق ءىس-قيمىل الگوريتمىن ازىرلەدى.
اپپاراتتىق كەڭەس بارىسىندا مينيستر بالالاردىڭ قاۋىپسىزدىگىمەن قاتار، سۋ تاسقىنى سالدارىنان قيىن جاعدايعا تاپ بولعان پەداگوگتەردى قولداۋ ماسەلەسىنە دە توقتالدى. ۆەدومستۆو باسشىسى سۋ تاسقىنىنا قارسى ءىس-شارالارعا قاتىسقان ارىپتەستەرىنە كورسەتكەن كاسىبيلىگى، ادامگەرشىلىگى جانە شىنايى ءپاتريوتيزمى ءۇشىن العىسىن ءبىلدىردى.