ستاتي ۆاشينگتونداعى سوت پروسەسىندە جەڭىلگەنىن مويىندادى. ستاتي تارابى ءوزىنىڭ قازاقستاننىڭ ديپلوماتيالىق مەنشىگىنە تىيىم سالۋ جونىندەگى زاڭسىز ارەكەتىن كەرى قايتارىپ الدى دەپ حابارلايدى almaty-akshamy.kz ادىلەت مينيسترلىگىنىڭ باسپا ءسوز قىزمەتىنە سىلتەمە جاساپ.
2021 جىلعى 28 قازاندا مولدوۆا ازاماتتارى اناتول مەن گابريەل ستاتي ۆاشينگتون فەدەرالدى سوتىنان اقش استاناسىنداعى قازاقستان رەسپۋبليكاسىنىڭ ديپلوماتيالىق مەنشىگىنە تىيىم سالۋ تۋرالى ءوتىنىشىن قايتارىپ الۋعا رۇقسات سۇرادى.
ستاتي ءوز وتىنىشتەرىن 2021 جىلدىڭ شىلدەسىندە بەردى، وندا ولار قازاقستاننىڭ ۆاشينگتونداعى ديپلوماتيالىق رەزيدەنسياسى كوممەرسيالىق كەڭسە رەتىندە پايدالانىلدى دەپ جالعان مالىمدەمە جاسادى.
2021 جىلعى تامىزدا قازاقستان سوتقا تولىقتاي ماتەريالداردى ۇسىنىپ، ءستاتيدىڭ مالىمدەمەلەرى جالعان ەكەنىن دالەلدەدى. قازاقستاننىڭ دالەلدەمەلەرىنە جاۋاپ بەرۋگە تىرىسۋدىڭ ورنىنا، ستاتي مەرزىمدى ۇزارتۋدى ەكى رەت سۇرادى. سوت ءبىرىنشى سۇرانىستى قاناعاتتاندىردى.الايدا، ءستاتيدىڭ جەتكىلىكتى ۋاقىتى بار دەپ ەسەپتەپ، ەكىنشى سۇرانىسىن قابىلداماي، ولارعا 2021 جىلعى 29 قازانعا دەيىن جاۋاپ بەرۋدى بۇيىردى. وسى مەرزىمنەن ءبىر كۇن بۇرىن ستاتي جالعان مالىمدەمەلەرىن اقتاۋعا تىرىسپاي، وتىنىشتەرىن قايتارىپ الۋعا رۇقسات سۇرادى، - دەلىنگەن حابارلامادا.
ءستاتيدىڭ سوتتا جالعان مالىمدەمەلەر بەرۋ، سودان كەيىن سوت شەشىمىن كۇتۋدىڭ ورنىنا ءوز وتىنىشتەرىن كەرى قايتارىپ الۋ بويىنشا مۇنداي ارەكەتتەرى –- ولاردىڭ قازاقستان رەسپۋبليكاسىنىڭ بەدەلىنە نۇقسان كەلتىرۋ جونىندەگى جالعاسىپ جاتقان كامپانيانىڭ بولىگى. ستاتي انگلياداعى سوت پروسەسىندە دە ءدال وسىلاي ارەكەت ەتتى. لوندوندا قازاقستان رەسپۋبليكاسى ءستاتيدىڭ نەگىزگى تورەلىك شەشىمدى الاياقتىق جولىمەن العانىن دالەلدەگەن كەزدە، ستاتي جاۋاپ رەتىندە سوتقا جۇگىنۋدىڭ ورنىنا، وزدەرى باستاعان پروسەستى توقتاتىپ، ودان باس تارتتى.
ادىلەت ۆيسە-مينيسترى المات مادالييەۆ ىسكە قاتىستى ءوز پىكىرىن ءبىلدىردى.
قازاقستاننىڭ ديپلوماتيالىق مەنشىگىنە تىيىم سالۋ تۋرالى ءستاتيدىڭ زاڭسىز ارەكەتى وتىرىككە نەگىزدەلگەن دەگەن قازاقستاننىڭ تۇجىرىمدارىن ۆاشينگتوندا وتكەن تالقىلاۋدا ءستاتيدىڭ ءوزىنىڭ جەڭىلىسىن مويىنداۋى راستايدى. بۇل ءستاتيدىڭ سوتتا جالعان مالىمدەمەلەر بەرۋ جانە باق-تى اداستىرۋ بويىنشا جۇرگىزىلەتىن كامپانياسى اياسىنداعى بەلگىلى ارەكەتى. ءبىز ادىلەتتىلىكتىڭ ورناعانىنا قۋانىشتىمىز، - دەدى ول.