رەسەي فەدەراسياسى بىرنەشە قازاقستاندىق ساياساتكەر مەن قوعام قايراتكەرىنە ءوز اۋماعىنا كىرۋگە رەسمي تۇردە تىيىم سالدى، دەپ حابارلايدى Aqshamnews.kz
DWء-نىڭ مالىمەتىنشە، قازاقستان مەن رەسەي اراسىنداعى قارىم-قاتىناس سوڭعى ۋاقىتتا كۇردەلى سيپات الا باستاعان. بۇعان سەبەپ — ەكى ەلدە دە ارنايى «قالاۋسىز تۇلعالار» ءتىزىمىنىڭ بولۋى. قازاقستان تاراپى رەسەيدىڭ بىرنەشە مەديا جانە ساياسي تۇلعالارىنا شەكارا اسۋعا رۇقسات بەرمەگەن. اتاپ ايتقاندا، بۇل تىزىمدە تينا كاندەلاكي، تيگران كەوسايان، الەكساندر دۋگين، نيكيتا مەندكوۆيچ جانە رەسەي مەملەكەتتىك دۋماسىنىڭ دەپۋتاتتارى ەۆگەنيي فەدوروۆ، ۆياچەسلاۆ نيكونوۆ پەن پەتر تولستوي بار.
ال رەسەي ءوز كەزەگىندە قازاقستاننان ءبىرقاتار تانىمال تۇلعالارعا تىيىم سالعان. ولاردىڭ قاتارىندا ساياساتتانۋشىلار دوسىم ساتپايەۆ، ديماش ءالجانوۆ، قوعام قايراتكەرلەرى مۇحتار تايجان مەن توعجان قوجالى، سونداي-اق ق ر پارلامەنتى ءماجىلىسىنىڭ دەپۋتاتتارى ەرمۇرات باپي مەن ايدوس سارىم بار.
ءماجىلىس دەپۋتاتى ايدوس سارىم بۇل تىيىممەن 2021 جىلى العاش رەت بەتپە-بەت كەلگەنىن ايتادى. ول كەزدە قازاقستاندىق دەلەگاسيا بريۋسسەلگە ساپارلاپ بارا جاتىپ، ماسكەۋ ارقىلى وتپەك بولعان. الايدا ماسكەۋدەگى قازاقستان ەلشىلىگىنىڭ شاراسىنا قاتىسۋ ءۇشىن قالاعا شىعۋعا تىرىسقان دەپۋتات شەكارادان وتە المادى.
"ديپلوماتيالىق ءتولقۇجاتىم بولا تۇرا، مەنى قالاعا جىبەرمەدى. باسقا دەلەگاسيا مۇشەلەرىن وتكىزدى، ال مەن شەكارا باقىلاۋىندا ۇزاق ۋاقىت وتىردىم. اقىرىندا فسب وفيسەرى كەلىپ، ماعان 'پەرسونا نون گراتا' ەكەنىمدى راستايتىن رەسمي قاعاز بەردى. سەبەبى تۇسىندىرىلگەن جوق. تەك ەگەر قايتا زاڭ بۇزسام، 8 جىلعا دەيىن باس بوستاندىعىمنان ايىرىلۋىم مۇمكىن دەگەن ەسكەرتۋ جاسالدى"، – دەدى سارىم DW-گە بەرگەن سۇحباتىندا.
ساياساتتانۋشىلاردىڭ پىكىرىنشە، مۇنداي تىزىمدەر — ەكى ەل اراسىنداعى ساياسي الاۋىزدىق پەن يدەولوگيالىق قايشىلىقتاردىڭ كورىنىسى. قازاقستان مەن رەسەي اراسىنداعى وداقتاستىق قاتىناستاردىڭ فورمالدى سيپاتتا ساقتالعانىمەن، قوعامدىق پىكىر مەن ىشكى ساياساتتا كەلىسپەۋشىلىكتەر ايقىن بايقالادى. اسىرەسە، ۋكرايناداعى سوعىس، ءسوز بوستاندىعى، ۇلتتىق ساياسات سەكىلدى تاقىرىپتاردا كوزقاراس الشاقتىعى بار ەكەنى بايقالادى.
مىسالى، تىيىم سالىنعانداردىڭ قاتارىنداعى مۇحتار تايجان مەن دوسىم ساتپايەۆ سەكىلدى قوعام قايراتكەرلەرى رەسەيدىڭ ساياساتىنا قاتىستى سىني پىكىرلەرىمەن تانىمال. ال ەرمۇرات باپي مەن ايدوس سارىم ۇلتتىق مۇددە مەن ءتىل ماسەلەسىنە قاتىستى بەلسەندى پىكىر ءبىلدىرىپ جۇرگەن تۇلعالار.
قازاقستان مەن رەسەي اراسىنداعى «پەرسونا نون گراتا» داۋى — ەكىجاقتى قارىم-قاتىناستاعى جاڭا كەزەڭنىڭ بەلگىسى ىسپەتتى. بۇل جاعداي ءسوز ەركىندىگى مەن ۇستانىم ەركىندىگىنە قاتىستى كۇردەلى ماسەلەلەردى العا تارتۋدا. شەكارادان كىرۋگە رۇقسات بەرمەۋ – بۇل ءبىر ەلدىڭ ىشكى قۇقىعى بولسا دا، مۇنداي شەشىمدەر ايماقتىق ساياساتتاعى سەنىم مەن تۇراقتىلىققا اسەر ەتۋى مۇمكىن.