مامىر ايىنان باستاپ ەلىمىزدە نە وزگەرەدى؟

مامىر ايىنان باستاپ قازاقستاندىقتاردى نە كۇتىپ تۇر؟ Aqshamnews.kz ماتەريالىنان ءبىلىڭىز. 

جەدەل جاردەم قىزمەتىندەگى جاڭاشىلدىق 

1 مامىردان باستاپ جەدەل مەديسينالىق كومەك كورسەتۋ ءتارتىبى وزگەرەدى:

• ەندى ەمحانالار جانىنداعى ءموبيلدى بريگادالار تاڭعى 08:00-دەن كەشكى 20:00-گە دەيىن جۇمىس ىستەيدى.

• 4-ساناتتى شاقىرتۋلار (مىسالى، قان قىسىمىنىڭ جوعارىلاۋى، دەنە قىزۋى، جەڭىل جاراقاتتار) – ياعني ومىرگە تىكەلەي ءقاۋىپ توندىرمەيتىن جاعدايلار – ەمحانا جۇمىس ۋاقىتى ىشىندە العاشقى مەديسينالىق-سانيتارلىق كومەك كورسەتەتىن ءموبيلدى توپتارعا باعىتتالادى.

• ال 20:00-دەن كەيىن جانە دەمالىس كۇندەرى بارلىق شاقىرتۋلار، سونىڭ ىشىندە 4-ساناتتى، بۇرىنعىداي جەدەل جاردەم بريگادالارىمەن قامتاماسىز ەتىلەدى.

دەنساۋلىق ساقتاۋ مينيسترلىگىنىڭ مالىمەتىنشە، جەدەل جاردەمگە كەلىپ تۇسەتىن شاقىرتۋلاردىڭ 50%-دان استامى 4-ساناتقا جاتادى جانە سوزىلمالى اۋرۋلاردىڭ اسقىنۋىمەن بايلانىستى. بۇل جاعداي ومىرىنە ءقاۋىپ ءتونىپ تۇرعان ناۋقاستاردان رەسۋرستاردى الاڭداتۋعا اكەپ سوعادى.

جاڭا وزگەرىستەر جۇكتەمەنى وڭتايلاندىرىپ، كۇتۋ ۋاقىتىن ازايتىپ، جۇيەنىڭ تيىمدىلىگىن ارتتىرادى دەپ كۇتىلىپ وتىر. 

تج كەزىندە باسپاناسى بۇلىنگەندەرگە وتەماقى تولەۋ ءتارتىبى وزگەردى

2 مامىردان باستاپ تابيعي اپات سالدارىنان كەلتىرىلگەن زالالدى وتەۋ ەرەجەلەرى جاڭاردى. ەندى وتەماقى تولەنەتىن مۇلىك ءتىزىمى كەڭەيتىلدى. وعان:

• تۇرعىن ۇيلەردى جىلىتۋعا ارنالعان وتىن قورى؛

• مۇگەدەكتەر ارباسى – قوزعالۋعا ارنالعان ارنايى قۇرال ەندى.

وتەماقىنىڭ شەكتى مولشەرى – 150 اەك-تەن (2025 جىلى – 589 800 تەڭگە) اسپايدى.

ەكستەرنمەن وقۋ ەرەجەلەرى وزگەردى

2 مامىردان باستاپ كۇشىنە ەنگەن جاڭا بۇيرىققا سايكەس:

• ەكستەرندەرگە ارنالعان اتتەستاسيا جالپى ءتارتىپ بويىنشا: اعىمداعى، ارالىق جانە قورىتىندى باقىلاۋ تۇرىندە وتەدى؛

• شەتەلدە تۇراتىن وقۋشى وقۋ باعدارلاماسىن وزدىگىنەن مەڭگەرەدى، ال ءبىلىمىن باقىلاۋ (باعا قويۋ) – قاشىقتان، تىركەلگەن مەكتەبى ارقىلى جۇزەگە اسادى؛

• قورىتىندى اتتەستاسيادان ءساتتى وتكەندەرگە مەملەكەتتىك ۇلگىدەگى ءبىلىم تۋرالى قۇجات بەرىلەدى.

بانكروت بولعانداردىڭ مۇلكى ەلەكتروندى اۋكسيون ارقىلى ساتىلادى

3 مامىردان باستاپ بانكروت مۇلكىن ساتۋ جاڭا ەرەجە بويىنشا وتەدى:

• مۇلىك ەلەكتروندى اۋكسيون ارقىلى ساتىلادى؛

• باستاپقى باعا – بالانستىق قۇنى نەمەسە باعالاۋدىڭ 75%-ى؛

• اۋكسيونعا قاتىسۋ ءۇشىن ەلەكتروندى قولتاڭبامەن ءوتىنىم بەرۋ كەرەك؛

• بارلىق پروسەسس مەملەكەتتىك مۇلىك رەەسترى پورتالى ارقىلى جۇرگىزىلەدى.

تاراز اينالما جولى اقىلى بولادى

5 مامىردان باستاپ تاراز قالاسىنىڭ اينالاسىنداعى 57 شاقىرىمدىق جول ۋچاسكەسى اقىلى بولادى. اقىلى پايدالانۋ مەرزىمى – 20 جىل.

باعالار (ءبىر باعىتقا):

• اۆتوبۋستار (16 ورىنعا دەيىن)، جۇك كولىكتەرى (2،5 ت دەيىن): 390 تگ (الدىن الا تولەم) / 330 تگ (الدىن الا تولەم)

• اۆتوبۋستار (32 ورىنعا دەيىن)، جۇك كولىكتەرى (5،5 ت دەيىن): 790 / 670 تگ

• اۆتوپويىزدار (10 ت دەيىن): 1190 / 1010 تگ

• جۇك كولىكتەرى (10-15 ت): 1590 / 1350 تگ

• جۇك كولىكتەرى (15 ت جوعارى، تىركەمەلى): 1980 / 1680 تگ

پرەزيدەنتتىك كادر رەزەرۆىنە وزگەرىستەر ەنگىزىلدى

9 مامىردان باستاپ، پرەزيدەنتتىڭ ارنايى مەملەكەتتىك ورگاندار ءۇشىن كادر رەزەرۆىن قالىپتاستىرۋ ەرەجەلەرى جاڭارتىلادى.

• قۇجاتتان قۇقىق قورعاۋ جانە ازاماتتىق قورعاۋ ورگاندارىنا قاتىستى نورمالار الىنىپ تاستالدى؛

• رەزەرۆ تەك كۇش قۇرىلىمدارى ءۇشىن ارنالعان بولادى؛

• رەزەرۆتى پرەزيدەنت اكىمشىلىگىنىڭ باسشىسى قاۋىپسىزدىك كەڭەسىنىڭ كەلىسىمىمەن بەكىتەدى.

مەكتەپ ءبىتىرۋ ەمتيحاندارىنىڭ كۇندەرى بەكىتىلدى

9 مامىردان باستاپ مەكتەپ تۇلەكتەرى ءۇشىن ەمتيحان كۇندەرى رەسمي تۇردە بەكىتىلەدى.

9 (10) سىنىپتار ءۇشىن:

• 29 مامىر – ماتەماتيكا (الگەبرا)؛

• 2 ماۋسىم – وقۋ ءتىلى (قازاقشا، ورىسشا)؛

• 5 ماۋسىم – تاڭداۋ ءپانى (فيزيكا، حيميا، تاريح، ادەبيەت، ت.ب.)؛

• 10 ماۋسىم – قازاق نەمەسە ورىس ءتىلى مەن ادەبيەتى.

11 (12) سىنىپتار ءۇشىن:

• 30 مامىر – قازاقستان تاريحىنان اۋىزشا ەمتيحان؛

• 4 ماۋسىم – الگەبرا جانە تالداۋ نەگىزدەرى؛

• 9 ماۋسىم – وقۋ ءتىلى بويىنشا ەمتيحان؛

• 12 ماۋسىم – تاڭداۋ ءپانى؛

• 16 ماۋسىم – قازاق نەمەسە ورىس ءتىلى مەن ادەبيەتى.

مەملەكەتتەن تۇرعىن ءۇي الۋ ەرەجەلەرى وزگەردى

24 مامىردان باستاپ مەملەكەتتىك مەكەمەلەر قىزمەتكەرلەرىنە ارنالعان تۇرعىن ءۇي كەزەگى جاڭا ەرەجە بويىنشا جۇرگىزىلەدى.

كەزەككە تۇرۋ ءۇشىن قاجەت قۇجاتتار:

• ءوتىنىش؛

• جەكە كۋالىكتىڭ جانە وتباسى مۇشەلەرىنىڭ قۇجات كوشىرمەلەرى؛

• نەكە (اجىراسۋ)، ءولىم، تۋۋ تۋرالى كۋالىكتەردىڭ كوشىرمەلەرى؛

• سوت شەشىمى (بار بولسا)؛

• الەۋمەتتىك وسال توپقا جاتاتىنىن راستايتىن قۇجات.

سالىق كودەكسىنە تۇزەتۋلەر سەناتقا جولداندى

30 ساۋىردە ءماجىلىس سالىق كودەكسىنە تۇزەتۋلەردى ەكىنشى وقىلىمدا قابىلدادى. ەندى قۇجات سەنات قاراۋىنا وتەدى.

ماڭىزدى وزگەرىستەر:

• 2026 جىلدان باستاپ ققس ستاۆكاسى 12%-دان 16%-عا كوتەرىلەدى؛

• ققس تىركەۋ شەگى 15 ملن تەڭگەدەن 40 ملن تەڭگەگە دەيىن ۇلعايادى؛

• دارى-دارمەكتەرگە دە ققس ەنگىزىلەدى.

سمارتفونداردى ۆەريفيكاسيالاۋ مەرزىمى اياقتالادى

24 مامىرعا دەيىن ۇيالى قۇرىلعىلاردى ۆەريفيكاسيالاۋ قاجەت. قۇرىلعىلار ءۇش تىزىمگە ءبولىندى:

• اق ءتىزىم – تەكسەرۋدەن وتكەن جانە بازاعا ەنگىزىلگەن؛

• سۇر ءتىزىم – تەكسەرۋ قاجەت، ۋاقىتشا 30 كۇنگە قوسىلعان؛

• قارا ءتىزىم – دۇرىس ەمەس IMEI. مۇنداي قۇرىلعىلار تولىقتاي جەلىدەن اجىراتىلادى.

25 مامىردان كەيىن سايت جۇمىسىن جالعاستىرادى، ءبىراق تىركەلمەگەن قۇرىلعىلار ءۇشىن بايلانىس قىزمەتتەرى شەكتەلەدى.

اۋا رايى بولجامى

1، 2 جانە 3 مامىر كۇندەرى قازاقستاندا تۇراقسىز اۋا رايى كۇتىلەدى. كوپتەگەن وڭىرلەردە نايزاعايلى جاڭبىر، ال تاۋلى ايماقتاردا – جاڭبىر ارالاس قار جاۋۋى مۇمكىن.

مامىر ايىنداعى مەرەكەلەر

مامىر – مەرەكەلەرگە تولى اي:

• 1 مامىر (بەيسەنبى) – قازاقستان حالقىنىڭ بىرلىگى كۇنى؛

• 7 مامىر (سارسەنبى) – وتان قورعاۋشىلار كۇنى؛

• 9 مامىر (جۇما) – جەڭىس كۇنى.

سونىمەن قاتار كاسىبي مەرەكەلەر دە بار:

• 17 مامىر – بايلانىس قىزمەتكەرلەرى كۇنى؛

• 20 مامىر – مەترولوگيا قىزمەتكەرلەرى كۇنى؛

• 21 مامىر – مادەنيەت جانە ونەر قىزمەتكەرلەرى كۇنى؛

• 25 مامىر – حيميا ونەركاسىبى قىزمەتكەرلەرى كۇنى (مامىردىڭ سوڭعى جەكسەنبىسى).