سوڭعى ۋاقىتتا الەمدە كەڭ تارالىپ كەلە جاتقان ەرەكشە سۋسىن – ساڭىراۋقۇلاق كوفە، ياعني ساڭىراۋقۇلاق قوسىلعان كوفە. كادىمگى كوفەگە بالاما رەتىندە ۇسىنىلاتىن بۇل ءونىم قۇرامىمەن جانە اعزاعا وڭ اسەرىمەن ەرەكشەلەنەدى. بۇل جونىندە Aqshamnews.kz حابارلايدى.
مۇنداي كوفەنىڭ قۇرامىنا چاگا، رەيشي، كورديسەپس جانە ارىستان جالى (ەجوۆيك گرەبەنچاتىي) سەكىلدى ەمدىك قاسيەتى بار ساڭىراۋقۇلاقتار ەنەدى. گارۆارد مەديسينا مەكتەبىنىڭ مالىمەتىنشە، بۇل ساڭىراۋقۇلاقتار بەيىمدەۋشى (اداپتوگەن) قاسيەتكە يە — ياعني، ولار اعزانىڭ كۇيزەلىس پەن شارشاۋعا توتەپ بەرۋ قابىلەتىن ارتتىرادى.
ساڭىراۋقۇلاق كوفەسىنىڭ باستى ارتىقشىلىعى — قۇرامىندا كادىمگى كوفەگە قاراعاندا كوفەين مولشەرىنىڭ ەكى ەسە از بولۋى. بۇل ۇيقىسىزدىققا بەيىم ادامدارعا جانە جۇرەك-قانتامىر جۇيەسىنە تۇسەتىن سالماقتى ازايتقىسى كەلەتىندەرگە ءتيىمدى.
زەرتتەۋلەرگە سايكەس، مۇنداي ساڭىراۋقۇلاقتار:
ۇيقى ساپاسىن جاقسارتادى،
كوڭىل-كۇي مەن زەيىندى ارتتىرادى،
يممۋندىق جۇيەنى نىعايتادى،
قابىنۋ پروسەستەرىن ازايتۋعا ىقپال ەتەدى.
ساڭىراۋقۇلاق قوسىلعان كوفەنىڭ ءدامى — ەرەكشە. كەي ادامدار بىردەن ۇيرەنسە، ەندى بىرەۋلەرگە ونىڭ شوپتەسىن ءيىسى مەن دامىنە بەيىمدەلۋگە ۋاقىت قاجەت. دەگەنمەن، ونى تۇراقتى تۇتىناتىندار بۇل سۋسىندى بىرتىندەپ جاقسى كورىپ كەتەتىنىن ايتادى. ول كادىمگى كوفەگە قاراعاندا جۇمساقتاۋ، الايدا بوي سەرگىتەتىن اسەرى بار.
قازىرگى تاڭدا بۇل ءونىمنىڭ ناقتى ەمدىك اسەرىن دالەلدەيتىن كەڭ كولەمدى كلينيكالىق زەرتتەۋلەر جەتكىلىكسىز. عالىمدار ساڭىراۋقۇلاق كوفەسىنىڭ مۇمكىندىكتەرىن جوققا شىعارمايدى، الايدا تۇبەگەيلى قورىتىندى جاساۋعا ءالى ەرتە. سوعان قاراماستان، تابيعي ءونىم رەتىندە ول تۇتىنۋشىلار اراسىندا تانىمالدىققا يە بولۋدا.
اقش، كانادا جانە ەۋروپا ەلدەرىندە ساڭىراۋقۇلاق قوسىلعان كوفە دەنساۋلىققا پايدالى ءومىر سالتىن ۇستانۋشىلار اراسىندا كەڭ قولدانىس تابۋدا. كوپتەگەن كومپانيالار وسىنداي كوفەلەردى شىعارۋعا كىرىسىپ، نارىقتا باسەكەگە تۇسە باستادى. بۇل – ادامداردىڭ تابيعي ءارى دەنساۋلىققا پايدالى ونىمدەرگە بەت بۇرا باستاعانىن كورسەتەدى.
ساڭىراۋقۇلاق قوسىلعان كوفە — ءداستۇرلى كوفەدەن باس تارتقىسى كەلەتىندەرگە پايدالى بالاما. ونىڭ تابيعي بەيىمدەۋشى قاسيەتتەرى اعزانىڭ كۇش-قۋاتىن قالپىنا كەلتىرىپ، ءومىر ساپاسىن جاقسارتۋعا ىقپال ەتۋى مۇمكىن. الايدا، ونىڭ ناقتى پايداسى جايلى ايتۋ ءۇشىن قوسىمشا عىلىمي زەرتتەۋلەر قاجەت. سوعان قاراماستان، قازىرگى كەزدە بۇل ءونىم سالاۋاتتى ءومىر سالتىن ۇستاناتىندار اراسىندا كەڭىنەن قولدانىلا باستادى.