استانادا جەڭىس كۇنى مەن اتى اڭىزعا اينالعان باتىر، كەڭەس وداعىنىڭ باتىرى باۋىرجان مومىش ۇلىنىڭ 115 جىلدىعىنا ارنالعان ەرەكشە جوبانىڭ تۇساۋى كەسىلدى. شارا اياسىندا 600-دەن استام بالانىڭ قاتىسۋىمەن كولەمى 2736 شارشى مەترگە جەتەتىن الىپ فوتوموزايكا جاسالىپ، ەل ەسىندە قالاتىن تاريحي وقيعاعا اينالدى، دەپ حابارلايدى Aqshamnews.kz
ۇزىندىعى 70 مەتر، ەنى 32 مەتردى قۇرايتىن پورترەت – قازاقستاندا بۇرىن-سوڭدى بولماعان اۋقىمداعى ونەر تۋىندىسى. ءار بالا جەكە فوتوقۇرامداس بولشەك رەتىندە موزايكانىڭ ءبىر بولىگىن جاساپ شىققان. بۇل ەرەكشە ءتاسىل تەك شىعارماشىلىقتى عانا ەمەس، پاتريوتتىق تاربيەنى دە ناسيحاتتاپ وتىر.
كەسكىننىڭ ءوزى – باۋىرجان مومىش ۇلىنىڭ بەينەسى. باتىردىڭ ءومىرى مەن ەرلىگى تۋرالى تاريحتى كەيىنگى ۇرپاققا جەتكىزۋدىڭ بۇل جولى – زاماناۋي ونەر مەن ۇرپاق ساباقتاستىعىنىڭ ەرەكشە ۇيلەسىمى رەتىندە باعالانىپ وتىر.
الىپ فوتوموزايكا رەسمي تۇردە قازاقستان رەكوردتار كىتابىنا ەندى. بۇل تۋرالى شارا ۇيىمداستىرۋشىلارى مەن رەكوردتى تىركەۋگە جاۋاپتى وكىلدەر مالىمدەدى. ولار بۇل باستامانىڭ جاستاردى ەل تاريحىنا دەگەن قىزىعۋشىلىعىن ارتتىرۋعا سەپ بولاتىنىن اتاپ ءوتتى.
فوتوموزايكا تەك كوركەمدىك نىسان ەمەس، سونىمەن قاتار ەلدىك بىرلىكتى، ءپاتريوتيزمدى جانە جاس بۋىننىڭ ۇلتتىق قۇندىلىقتارعا دەگەن قۇرمەتىن بەينەلەيتىن سيمۆول رەتىندە تانىلدى.
مادەنيەتتانۋشى سارا نازىم قىزىنىڭ ايتۋىنشا، مۇنداي جوبا قوعامدا رۋحاني سەرپىلىس تۋدىرىپ، جاستاردىڭ باتىر بابالار تاريحىنا دەگەن كوزقاراسىن جاڭا دەڭگەيگە شىعارادى. «باۋىرجان مومىش ۇلى – باتىرلىقتىڭ، ۇلتجاندىلىقتىڭ سيمۆولى. ونىڭ بەينەسىن جۇزدەگەن بالانىڭ بىرلەسە وتىرىپ جاساۋى – ۇرپاقتار ساباقتاستىعىنىڭ كورىنىسى»، – دەيدى ول.
سونىمەن قاتار، بۇل شارا جەڭىس كۇنى قارساڭىنداعى ماڭىزدى مادەني ءىس-شارالاردىڭ بىرىنە اينالىپ وتىر. ەلوردا تۇرعىندارى مەن قالا قوناقتارى الىپ پورترەتتى كورۋ ءۇشىن ارنايى كەلىپ، پاتريوتتىق رۋحتى سەزىنە الدى.