بۇگىن وڭىرلىك كوممۋنيكاسيالار قىزمەتىندە «ميسس قازاقستان 2023» بايقاۋىنىڭ جەڭىمپازى سابينا ىدىرىسوۆانىڭ قاتىسۋىمەن باسپا ءسوز ءماسليحاتى ءوتتى. سابينا ەرتەڭ ءۇندىستانعا جول تارتىپ، سوندا وتەتىن «Miss World 2025» بايقاۋىنىڭ اقتىق سايىسىندا قازاقستان اتىنان ب ا ق سىناماق، دەپ حابارلايدى aqshamnews.kz
بۇعان دەيىن ەلىمىزدە وتكەن سۇلۋلىق بايقاۋىندا جەڭىسكە جەتكەن سابينا الداعى ساپارىنا قالاي دايىندالىپ جاتقانىن جانە بايقاۋ تۋرالى ءوز ويىمەن ءبولىستى. ونىڭ ايتۋىنشا، «Miss World 2025» بايقاۋىنا قاتىسۋ تەك اتاق ءۇشىن عانا ەمەس، سونىمەن قاتار قازاقستاننىڭ مادەنيەتىن، سۇلۋلىعىن، زياتكەرلىك الەۋەتى مەن تاريحىن الەمگە تانىتۋدىڭ بىرەگەي مۇمكىندىگى.
– ماعان ۇلكەن جاۋاپكەرشىلىك جۇكتەلگەنىن سەزىنىپ وتىرمىن. بۇل بايقاۋعا جاي بارىپ قاتىسىپ قايتۋ ەمەس، ەكى ەل اراسىنداعى دانەكەر، التىن كوپىر بولۋ دەپ تۇسىنەمىن. قازاقستاندى قالاي جاقسى كورسەم، الەم دە ەلىمدى سولاي تانىپ، جاقسى كورسە ەكەن دەيمىن، – دەدى سابينا.
بىرنەشە ايعا سوزىلعان دايىندىق بارىسىندا سابينا ىدىرىسوۆا كەين كەريش، اق بۇلاق جانە التىن ەمەل تابيعي ايماقتارىندا ۆيزيتتىك بەينەروليك ءتۇسىردى. سونداي-اق «ياپۋراي» اتتى اۆتورلىق ءنومىر دايىنداپ، دەفيلە، ساحنالىق سويلەۋ، ماكياج جانە اعىلشىن ءتىلى بويىنشا جاتتىعۋلار جاسادى. ديزاينەر ديلارا كورجوۆامەن بىرگە ەتنو-مودەرن ستيلىندە كوستيۋمدەر ازىرلەپ، «Beauty with a Purpose» قايىرىمدىلىق اۋكسيونىنا ارنالعان زەرگەرلىك بۇيىمدار جاساتقان.
11–31 مامىر ارالىعىندا تەلانگانا شتاتىندا وتەتىن بايقاۋدىڭ فينالىنا 120 ەلدىڭ وكىلى قاتىسادى. «Miss Kazakhstan» ۇيىمىنىڭ وكىلدەرى سابينانىڭ قازاقستان اتىن الەمگە ايگىلەيتىنىنە سەنىم ءبىلدىرىپ وتىر.