جازعى دەمالىس ماۋسىمى جاقىنداعان سايىن تۋريستەر تابيعاتتى، مادەنيەتتى، جايلى ينفراقۇرىلىمدى بىرىكتىرەتىن باعىتتاردى ىزدەي باستايدى. قازاقستاندا جازعى ءتۋريزمدى دامىتۋ ءۇشىن ءتۇرلى مۇمكىندىك بار. نازارلارىڭىزعا ەلدىڭ ەكوتۋريزم جانە تانىمدىق باعىتتار الەۋەتىن اشاتىن توپ-5 باعىتتى ۇسىنامىز.
1. كاتونقاراعاي، شىعىس قازاقستان وبلىسى
كاتونقاراعاي ۇلتتىق پاركى — قازاقستاندا Green Destinations حالىقارالىق تىزىمىنە ەنگەن العاشقى اۋماق. ءوڭىر كوركەم تابيعاتىمەن، بيىك تاۋلارىمەن، كولدەرىمەن، ەمدىك بۇلاقتارىمەن تانىمال. تۋريستەر يازيەۆوە كولىنە، بەلۋحا تاۋىنا، «راحمان قاينارى» قورىق ايماعىنا جانە شۇكىر ءشايجۇنىسوۆ مۋزەيىنە بارۋىنا بولادى. بۇل ءوڭىر ەكوتۋريزم، الپينيزم جانە ساۋىقتىرۋ ءتۋريزمى ءۇشىن وتە قولايلى ورىن سانالادى.
2. قورعالجىن قورىعى، اقمولا وبلىسى
قورعالجىن — قوقيقازداردى تابيعي مەكەنىندە كورۋگە بولاتىن الەمدەگى سيرەك ورىنداردىڭ ءبىرى. جازدا قورىق كولدەرىنە مىڭداعان جىل قۇسى ۇشىپ كەلەدى. بۇل باعىت ورنيتولوگيامەن اينالىساتىندار مەن تابيعات تىنىشتىعىن قالايتىن تۋريستەر اراسىندا تانىمال.
3. التىنەمەل ۇلتتىق پاركى، جەتىسۋ وبلىسى
التىنەمەل — تابيعي الۋانتۇرلىلىك پەن مادەني مۇرا توعىسقان ءىرى تۋريستىك ورتالىقتاردىڭ ءبىرى. پاركتە زاماناۋي ۆيزيت-ورتالىق جۇمىس ىستەيدى. تۋريستەرگە باعىتتار بويىنشا اقپارات بەرۋ، قىزمەت كورسەتۋ، ناۆيگاسيالىق قولداۋ ۇسىنىلادى. باستى نىسانداردىڭ قاتارىندا — «ايعاي قۇم»، اقتاۋ تاۋلارى مەن تامعالى-تاس پەتروگليفتەرى بار. بۇل باعىت وتباسىلىق جانە جەكە ساياحاتقا دا قولايلى.
4. سايرام-وگەم ۇلتتىق پاركى، تۇركىستان وبلىسى
سايرام-وگەم — وڭتۇستىك ايماقتاعى الەۋەتى جوعارى، ءبىراق ءالى تولىق اشىلماعان باعىتتاردىڭ ءبىرى. مۇندا مۇزدىق كولدەرگە اپاراتىن جاياۋ باعىتتار مەن تاۋ فلوراسىمەن تانىسۋ مۇمكىندىگى بار. ەكوتۋريزم دامىپ كەلە جاتقان بۇل ءوڭىر ىشكى تۋريزم ءۇشىن تىڭ مۇمكىندىككە اينالۋدا.
5. «سارتاس» ۆيزيت-ورتالىعى، ماڭعىستاۋ وبلىسى
ماڭعىستاۋ ءوڭىرى تۋريستىك ينفراقۇرىلىمدى بەلسەندى تۇردە دامىتىپ كەلەدى. جاڭادان اشىلعان «سارتاس» ۆيزيت-ورتالىعى ءوڭىردىڭ پەتروگليفتەرىنە، جارتاس كەشەندەرىنە جانە قاسيەتتى ورىندارىنا باراتىن كەلۋشىلەر ءۇشىن اشىق. بۇل ورتالىق لوگيستيكا مەن ءقاۋىپسىز مارشرۋتتارعا قولايلى جاعداي جاسايدى. جاز مەزگىلى — ماڭعىستاۋدىڭ ەرەكشە تابيعاتى مەن تاريحي كەڭىستىگىن تانۋعا تاپتىرماس كەزەڭ.