مەملەكەت باسشىسىنىڭ تاپسىرماسى اياسىندا اۋىل شارۋاشىلىعى مينيسترلىگى اۋىل شارۋاشىلىعى داقىلدارىنىڭ ەگىس القاپتارىن ءارتاراپتاندىرۋ بويىنشا اۋقىمدى باعدارلامانى ىسكە اسىرۋدى جالعاستىرۋدا. بيىل العاش رەت ءارتاراپتاندىرۋ شارالارى شامامەن 1 ملن گەكتار اۋىل شارۋاشىلىعى جەرىن قامتيدى.
باعدارلاما ىشكى جانە سىرتقى نارىقتاردا جوعارى سۇرانىسقا يە، تابىستى داقىلداردىڭ ەگىس كولەمىن ۇلعايتۋعا باعىتتالعان. نەگىزگى ماقسات — اۋىل شارۋاشىلىعى سەكتورىنىڭ ءبىر عانا داقىلعا، ەڭ الدىمەن ءداندى داقىلدارعا تاۋەلدىلىگىن ازايتۋ جانە تۇراقتى، تەڭگەرىمدى اۋىل شارۋاشىلىعى وندىرىسىنە كوشۋ.
2025 جىلى بۇرشاق، مايلى جانە مال ازىقتىق داقىلداردىڭ ەگىس كولەمى ەداۋىر ارتادى دەپ كۇتىلۋدە. اتاپ ايتقاندا، مايلى داقىلداردىڭ ەگىس كولەمى 378 مىڭ گەكتارعا ءوسىپ، 3،3 ملن گەكتاردان اسادى. كۇنباعىس تۇڭعىش رەت 1،4 ملن گەكتارعا دەيىن ەگىلەدى — بۇل وتكەن جىلمەن سالىستىرعاندا 121 مىڭ گەكتارعا ارتىق. سونىمەن قاتار، زىعىر ەگىسى 181 مىڭ گەكتارعا، قىشا — 52 مىڭ گەكتارعا، راپس — 28 مىڭ گەكتارعا ۇلعايادى.
مال ازىقتىق داقىلداردىڭ ەگىس كولەمى 127 مىڭ گەكتارعا ارتتىرىلىپ، مال شارۋاشىلىعىنىڭ جەم-شوپ بازاسىن نىعايتۋعا، ەگىس اينالىمىن جاقسارتۋعا جانە اۋىل شارۋاشىلىعى ءوندىرىسىنىڭ تۇراقتىلىعىن ارتتىرۋعا ىقپال ەتەدى.
سوڭعى ەكى جىلدا بيداي ەگىس كولەمى 750 مىڭ گەكتارعا قىسقاردى، ونىڭ ىشىندە 2025 جىلى — 187 مىڭ گەكتارعا. بۇل رەتتە نارىقتىق جاعداي مەن الەۋمەتتىك ماڭىزدىلىعى ەسكەرىلىپ، ارپا ەگىس كولەمى 158 مىڭ گەكتارعا، قاراقۇمىق — 41 مىڭ گەكتارعا ۇلعايادى.
وتكەن جىلعى قانت قىزىلشاسىنىڭ ونىمدىلىگىنە بايلانىستى بيىل ونىڭ ەگىس كولەمى 6،7 مىڭ گەكتارعا قىسقارىپ، 18،4 مىڭ گەكتاردى قۇرايدى. سونىمەن قاتار، ۇيىمداسقان شارۋاشىلىقتار ىشكى نارىقتى قامتاماسىز ەتۋ ماقساتىندا كارتوپ ەگىسىن 11،3 مىڭ گەكتارعا ارتتىرادى.
سۋ رەسۋرستارىن ۇنەمدەۋ ماقساتىندا ماقتا ەگىس كولەمى 135 مىڭ گەكتاردى قۇرايدى. ونىڭ ىشىندە زاماناۋي تامشىلاتىپ سۋارۋ تەحنولوگيالارى قولدانىلاتىن القاپ 50 مىڭ گەكتارعا دەيىن ۇلعايتىلادى، ال ءداستۇرلى ادىسپەن ەگىلەتىن كولەم 21،4 مىڭ گەكتارعا قىسقارادى.
جالپى العاندا، 2025 جىلعى ەگىس القاپتارىنىڭ قۇرىلىمى ەلدىڭ نەگىزگى ونىمدەرگە دەگەن ىشكى قاجەتتىلىگىن قامتاماسىز ەتۋگە عانا ەمەس، سونىمەن قاتار ازىق-تۇلىك قاۋىپسىزدىگى مەن اگروونەركاسىپتىك كەشەننىڭ تۇراقتىلىعىن نىعايتۋعا مۇمكىندىك بەرەدى.