ولار - شىنايى ماحابباتتىڭ سيمۆولى. ەلدىڭ ءسوزى مەن كوپتىڭ ويىن ەلەمەي، تەك جۇرەكتەرىندەگى سەنىم مەن سەزىمگە سۇيەنىپ، ءومىردىڭ سىناعىن بىرگە ەڭسەرگەن جاندار. ارۋجان مەن ءدىنيسلام - سىرت كوزگە ەرەكشە، ءبىراق بىر-بىرىنە دەگەن ماحابباتىمەن ناعىز وتباسىنىڭ نە ەكەنىن دالەلدەگەن جۇپ. 15 قىركۇيەك - وتباسى كۇنى قارساڭىندا Aqshamnews.kz ءتىلشىسى بەرىك سەزىمگە قۇرىلعان جانۇيانىڭ اڭگىمەسىن ۇسىنادى.
ءبار قالاي باستالدى؟
ارۋجان – تۇركىستان قالاسىنىڭ تۋماسى. ول بالا كۇنىنەن ومىرگە قۇشتار بولىپ وسكەن. ءبىراق تاعدىر وعان ەرتە جاستا اۋىر سىناق جىبەردى.
"جاراقاتىم 2009 جىلى كۇز ايىندا دەنە شىنىقتىرۋ ساباعىندا ابايسىزدا تىزەمەن قۇلاپ، اۋىرتىپ الۋدان باستالدى. 2 اي گيپستە جاتتىم. تۇركىستانداعى دارىگەرلەر دياگنوزدى بىلمەگەندىكتەن شىمكەنتكە جىبەردى، ولار دا انىقتاي الماي الماتىعا جولدادى. الماتىداعى دارىگەرلەر بىردەن ونكولوگيا ەكەنىن ءبىلدى دە، اۋرۋحاناعا جاتقىزدى. 3 حيميا العان سوڭ اياعىم جاراماي قالدى، كەسۋگە تۋرا كەلدى. ءسويتىپ 8 حيميا الىپ، اۋرۋىمدى جەڭىپ شىقتىم. ناقتى دياگنوزىم – سۇيەك تىندەرىنىڭ جاراقاتى. ءقازىر مەن تۇركىستان قالاسىندا nail master بولىپ جۇمىس ىستەيمىن" دەدى ول.
ءدىنيسلام مەن ارۋجاننىڭ تانىستىعى
ارۋجان ءوزىنىڭ ومىرلىك سەرىگى دىنيسلاممەن الەۋمەتتىك جەلىدە تانىسقان.
"جۇبايىممەن Instagram جەلىسىندە تانىستىق. 2022 جىلى 1 ناۋرىز كۇنى مەنى قۇربىمنىڭ ستوريسىنەن كورىپ، ماعان جازدى. سولاي تانىسىپ كەتتىك. قازىرگى تاڭدا ول يپوتەكالىق بروكەر بولىپ جۇمىس ىستەيدى، كەزەكپەن جانە كەزەكسىز ءتيىمدى باعامەن ءۇي الۋعا كومەكتەسەدى. ءبىز 2023 جىلدىڭ 15 ناۋرىزىندا شاڭىراق كوتەردىك" دەدى.
"ول اياعىم تۋرالى ەشتەڭە سۇرامادى"
جاس كەلىنشەك ءۇشىن ءدىنيسلام – تەك جۇباي ەمەس، سەنىمدى دوس ءارى تىرەك.
"ماعان ول جولداس قانا ەمەس، ەڭ جاقىن سىرلاس دوس، جانىمنىڭ تىنىشتىعى، تىرەگىم. ول – سەنىمدى سەرىك، ءارقاشان قاسىمنان تابىلعان مىقتى ادام. جاقسى اكە، ادال جار، وتباسىمىزدىڭ تىرەگى. جۇبايىم وتە سابىرلى، سالماقتى، ۋادەسىندە تۇراتىن ەر ازامات. ءبىز ءبىرىنشى كەزدەسكەندە ول “كەلەسى كەزدەسكەنشە” دەپ قوشتاسقان بولاتىن. سول ساتتەن-اق ونىڭ مەنىڭ ادامىم ەكەنىن ءتۇسىندىم. ول كەزدە اياعىم تۋرالى ەشتەڭە سۇرامادى. قۇربىم وعان جاعدايىمدى ايتىپ: “ەگەر ارى قاراي سويلەسكىڭ كەلمەسە، قازىردەن توقتات” دەگەندە، ول “جوق، مەن وندايعا قارامايمىن، سويلەسۋدى جالعاستىرامىن” دەدى. سول كەزدە اللا ماعان ەڭ دۇرىس ادامدى جىبەرگەنىن تولىق سەزىندىم" دەدى ول.
"قىزىم دۇنيەگە كەلگەلى ومىرگە دەگەن قۇشتارلىعىم ارتتى"
قىزىن قۇشاعىنا العان ساتتەن باستاپ ارۋجاننىڭ ومىرگە دەگەن كوزقاراسى تۇبەگەيلى وزگەرگەن.
"اناڭنىڭ ءقادىرىن بالالى بولعاندا تۇسىنەسىڭ دەگەن ءسوز راس ەكەن. قىزىم دۇنيەگە كەلگەلى ومىرگە دەگەن قۇشتارلىعىم ارتىپ قانا قويماي، جۇرەگىم ماحابباتقا تولدى. ول – مەنىڭ ەڭ ۇلكەن قۋانىشىم، ءومىرىمنىڭ ءمانى. قىزىم ماعان جاڭا ماقسات، جاڭا ارمان سىيلاعان پەرىشتە. جۇبايىم قىزىمىزعا ەڭ مەيىرىمدى، ەڭ قامقور اكە. ونىڭ كوزىنەن قىزىمىزعا دەگەن شەكسىز سۇيىسپەنشىلىكتى كورەمىن" دەيدى ارۋجان.
"كەيدە تۇسىنبەي، سىن ايتاتىندار بولادى"
وتباسىلىق ومىردە ءتۇرلى قيىندىقتار كەزدەسكەنىمەن، ولاردى بىرگە جەڭۋ – ارۋجان مەن ءدىنيسلام ءۇشىن باستى ساباق بولعان.
«بىزگە ومىردە ءتۇرلى سىناقتار كەزدەستى: بىردە ماتەريالدىق قيىندىقتار، بىردە دەنساۋلىق ماسەلەلەرى، بىردە ادامداردىڭ تۇسىنبەۋشىلىگى. ءبىراق ءبارىن بىرگە ەڭسەردىك. ەڭ باستىسى – بىر-بىرىمىزگە دەگەن سەنىم مەن قولداۋ. ارينە، قوعامدا ءتۇرلى پىكىر ايتىلادى. كەيدە تۇسىنبەي، سىن ايتاتىندار بولادى. ءبىراق ءبىز وعان اسا ءمان بەرمەيمىز. سەبەبى ءبىز ءۇشىن ەڭ باستىسى – وتباسىمىزدىڭ اماندىعى مەن باقىتى. باقىتتى جانۇيانى سىرتقى پىكىر ەمەس، ىشكى ماحاببات قۇرايدى. جۇبايىم – مەنىڭ ەڭ ۇلكەن تىرەگىم. قينالعان ساتتە ءاردايىم سابىرلى بولىپ، ماعان دەمەۋ بولادى. ونىڭ “ءبارى جاقسى بولادى” دەگەن قاراپايىم ءسوزى ماعان جاڭا كۇش بەرەدى. ول – مەنىڭ قامقورشىم عانا ەمەس، جانىمنىڭ تىنىشتىعى" دەدى ول.
بەرىك وتباسىنىڭ باستى نەگىزى نە؟
ارۋجان ءۇشىن وتباسىنداعى ەڭ باستى بايلىق – سەنىم مەن سىيلاستىق.
"وتباسى ءۇشىن ەڭ ماڭىزدىسى – سىيلاستىق پەن تۇسىنىستىك. شىنايى ماحاببات تەك سەزىم ەمەس، ول – كۇندەلىكتى قامقورلىق، قۇرمەت، جاناشىرلىق. ءبىزدىڭ وتباسىمىزداعى باستى قۇندىلىق – سەنىم. ءبىز بىر-بىرىمىزگە سەنىپ، قۋانىش پەن سىناقتى بىرگە بولىسەمىز. سول سەنىم وتباسىمىزدى مىقتى ەتەدى. ءوز جارتىسىن تابا الماي جۇرگەن جاندارعا ايتارىم: ەڭ اۋەلى ءوزىڭدى جاقسى كورىپ، ءوزىڭدى تابۋ كەرەك. سوندا اللا جۇرەگىڭە ساي جارتىڭدى جولىقتىرادى. اسىقپاي، تاعدىرعا سەنىپ، شىنايى ماحابباتتى كۇتكەن دۇرىس" دەيدى ارۋجان ابىلاي.