2025 جىلدىڭ باسىنان بەرى 297،4 مىڭ قازاقستاندىق Skills Enbek كاسىپتىك وقىتۋ پلاتفورماسىندا ونلاين-كۋرستاردان ءوتىپ، سەرتيفيكات الدى. ونىڭ ىشىندە 47،5 مىڭعا جۋىق ازامات جۇمىسسىزدار قاتارىنان. بۇگىندە پلاتفورمادا بارلىعى 827،6 مىڭ ادام تىركەلگەن، ولاردىڭ 328،9 مىڭى بيىل قوسىلعان. جوبا ىسكە قوسىلعان ۋاقىتتان بەرى 708،3 مىڭ ادام وقۋدان ءوتتى.
جۇمىسسىزداردىڭ ىشىندە 13،3 مىڭعا جۋىعى تۇركىستان، قىزىلوردا وبلىستارىنان، الماتى جانە شىمكەنت قالالارىنان. پلاتفورمادا ءتۇرلى باعىت بويىنشا 1 000-نان استام كۋرس جاريالانعان، ونىڭ 340-ى تەگىن. سونداي-اق Courstore، Fluent Education جانە ياندەكس قازاقستان سەرىكتەستەرى دايىنداعان كۋرستار قولجەتىمدى. وقىتۋ ۇزاقتىعى 1-دەن 72 ساعاتقا دەيىن.
تامىز ايىندا ەڭ سۇرانىسقا يە بولعان كۋرستار قاتارىندا «سەنىڭ مانساپتىق باستاماڭ: ەلەكتروندىق ەڭبەك بيرجاسىن پايدالانۋ جولدارى»، «ۋپراۆلەنيە پەرسونالوم»، «كاسسير»، «ستراحوۆوي اگەنت»، «ءپىشۋ جانە تىگۋ» سياقتى باعدارلامالار بار. الەۋمەتتىك قىزمەت كورسەتۋ جانە باسقا دا سالالارداعى تەگىن كۋرستار سانى ارتىپ كەلەدى.
پلاتفورما «ءومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. ءبىلىم الۋشىلار وقۋدىڭ قارقىنى مەن ءتىلىن وزدەرى تاڭداپ، وقۋ بارىسىن باقىلاپ، كۋرس اۆتورلارىمەن بايلانىسا الادى. وقۋ سوڭىندا تەست تاپسىرىلادى، ونى 70 پايىزدان جوعارى ناتيجەمەن اياقتاعاندار داعدىلاردى يگەرۋ تۋرالى سەرتيفيكات الادى. سەرتيفيكات اۆتوماتتى تۇردە Enbek.kz تۇيىندەمەسىنە ەنگىزىلەدى جانە جۇمىس بەرۋشىلەرگە كورىنىپ تۇرادى.
كۋرستاردى ورنالاستىرۋ اۆتورلار ءۇشىن تەگىن. ولار مەملەكەتتىك، ورىس جانە اعىلشىن تىلدەرىندە ۇسىنىلادى جانە ءماتىن، بەينە، اۋديو، ينفوگرافيكا سياقتى ءتۇرلى فورماتتاردى قامتيدى. ارنايى قاجەتتىلىكتەرى بار ازاماتتار ءۇشىن ينتەرفەيس بەيىمدەلگەن. اۆتورلارعا ساباق قۇراستىرۋ قۇرالى، ستاتيستيكا، سەرتيفيكات ۇلگىلەرى جانە ونلاين-كالكۋلياتور قولجەتىمدى.
2023 جىلدىڭ جەلتوقسانىنان باستاپ كۋرستاردى Enbek ءموبيلدى قوسىمشاسى ارقىلى دا وتۋگە بولادى. قوسىمشا Google Play جانە App Store دۇكەندەرىنەن جۇكتەلەدى. پلاتفورماعا تىركەلۋ نەمەسە جۇمىس ىستەۋ بويىنشا سۇراقتارعا «ەردو» اق جاۋاپ بەرەدى: 8 (7172) 95 43 17 (ىشكى 877، 888).