سمارتفوننىڭ ادام ەنەرگياسىن تارتىپ الاتىنى دالەلدەندى

زەرتتەۋشىلەر كۇندە ءبىر مەزگىل سمارتفوندى ءوشىرىپ قويۋعا كەڭەس بەرەدى. 

تۇسكى ءۇزىلىستىڭ وزىندە دە ۋاقىتىن سمارتفونمەن وتكىزەتىن جاندار بۇل ۋاقىتتى سەرۋەندەۋگە، ارىپتەستەرىمەن سويلەسۋگە نەمەسە كىتاپ وقۋعا ارناعاندارعا قاراعاندا قاتتى شارشايدى.

كورەيا زەرتتەۋشىلەرى جۇمىس ۋاقىتىندا شارشاپ جۇرەتىندەرگە تۇسكى اس كەزىندە ءموبيلدى قۇرىلعىنى ءوشىرىپ قويۋعا كەڭەس بەرەدى. بۇل تۋرالى Menslife ينتەرنەت باسىلىمى جازدى، دەپ حابارلايدى Almaty-akshamy.kz.

جۇرگىزىلگەن ەكسپەريمەنت بويىنشا تۇسكى ءۇزىلىستىڭ وزىندە دە ۋاقىتىن سمارتفونمەن وتكىزەتىن جاندار بۇل ۋاقىتتى سەرۋەندەۋگە، ارىپتەستەرىمەن سويلەسۋگە نەمەسە كىتاپ وقۋعا ارناعاندارعا قاراعاندا قاتتى شارشايتىنى بەلگىلى بولعان.
زەرتتەۋ بارىسىندا 400-دەن اسا ەرلەر مەن ايەلدەر قاتىسقان ساۋالناما قورىتىندىسى وسىنداي ناتيجە كورسەتكەن. ساۋالنامادا تۇسكى اس كەزىندەگى جانە ودان كەيىنگى ۋاقىتتاعى كوڭىل كۇيدى ناقتىلاعان.
قاتىسۋشىلاردىڭ جارتىسىنا جۋىعى تۇسكى اس كەزىندە ۇيالى تەلەفون قولدانعان. قالعاندارى بۇل ۋاقىتتا سمارتفوندارىن ءوشىرىپ قويعان. ەندى بىرەۋلەرى تازا اۋادا سەرۋەندەپ، ەندى ءبىرى ادامدارمەن ارالاسقان. ۇزىلىستەن كەيىن بايقالعانداي، سمارتفون قولدانعاندار وزدەرىنىڭ تىنىققانىن سەزبەگەن، ولار كۇشتەرىنىڭ سارقىلعانىنا جانە جۇمىسقا دەگەن بەلسەندىلىكتەرىنىڭ تومەندەگەنىنە شاعىم ايتقان. 
عالىمدار سمارتفوندا ءبىر دەگەندە بىرنەشە قىزمەتتەردى (الەۋمەتتىك جەلىلەردى قولدانۋ، پلەي-ليستەردى تىڭداۋ) اتقارۋ كوپ ەنەرگيا مەن كۇشتى الىپ قوياتىنىن ايتادى. ال باسىلىمداردى، كىتاپتاردى وقۋدا مۇنداي سەلقوستىق بايقالماعانىن اتادى. سەبەبى قاعاز تۇرىندەگى بۇقارالىق قۇرالداردا جىلت ەتكەن جارنامالار، سىلتەمەلەر جانە باسقا دا نازار اۋداراتىن دۇنيەلەر جوق. سونىمەن قاتار كوز بەن مويىنعا دا كۇش ازىراق تۇسەدى ەكەن.