الماتى ونكولوگيالىق ورتالىعىنا جاتىر موينى وبىرىنىڭ II ساتىسى دياگنوزىمەن 26 جاستاعى ايەل ءتۇستى. بۇل تۋرالى ورتالىقتىڭ ونكوگينەكولوگيا ءبولىمىنىڭ مەڭگەرۋشىسى رايحان بولاتبەكوۆا مالىمدەدى، دەپ حابارلايدى aqshamnews.kz
ناۋقاس ءبىر جىل بويى قاندى بولىنىستەر مەن وزگە دە شاعىمدارعا قاراماستان دارىگەرگە بارماعان.
– ونىڭ ەكى بالاسى بار. تەك جاعدايى تىم اۋىرلاپ كەتكەن كەزدە عانا مەديسينالىق كومەككە جۇگىنۋگە شەشىم قابىلداعان، – دەيدى بولاتبەكوۆا.
دارىگەرلەر ءۇش ساعاتقا سوزىلعان كۇردەلى وتا جاسادى. ونىڭ بارىسىندا جاتىر، جاتىر موينى جانە رەگيونارلىق ليمفا تۇيىندەرى الىندى. ناۋقاستىڭ جاسى جاس بولعاندىقتان، انالىق بەزدەر ساقتالىپ قالدى. بۇل وعان بولاشاقتا سۋرروگات انا كومەگىمەن انا بولۋعا مۇمكىندىك بەرەدى.
وتا ءساتتى ءوتتى. قازىرگى تاڭدا ايەل ونكولوگيالىق ورتالىقتىڭ باقىلاۋىندا جانە حيميو-ساۋلەلىك تەراپيا كۋرسىن قابىلداپ جاتىر.
رايحان بولاتبەكوۆانىڭ ايتۋىنشا، الماتىدا جاتىر موينى وبىرى ايەلدەر اراسىنداعى ونكولوگيالىق اۋرۋلار ىشىندە ءسۇت بەزى وبىرىنان كەيىن ەكىنشى ورىندا تۇر. تەك 2024 جىلى بۇل دياگنوز بويىنشا 206 جاڭا جاعداي تىركەلگەن.
– نەگىزگى جاس توبى – 35 پەن 50 جاس ارالىعى. ءبىراق، وكىنىشكە قاراي، اۋرۋدىڭ «جاسارۋى» ءۇردىسى بايقالۋدا. ءقازىردىڭ وزىندە 20–24 جاس ارالىعىنداعى قىز-كەلىنشەكتەر اراسىندا جاتىر موينى وبىرىنىڭ انىقتالعان جاعدايلارى بار، – دەيدى ونكوگينەكولوگ.
اۋرۋدىڭ باستاپقى كەزەڭى ايقىن بەلگىلەرسىز وتەتىندىكتەن، ونى ەرتە انىقتاۋ ءۇشىن تۇراقتى پروفيلاكتيكالىق تەكسەرۋلەر مەن سكرينينگتەن ءوتىپ تۇرۋ وتە ماڭىزدى.
مەملەكەتتىك باعدارلاما اياسىندا 30 بەن 70 جاس ارالىعىنداعى ايەلدەر ءتورت جىلدا ءبىر رەت تەگىن سكرينينگتەن وتە الادى. بۇل – سيتولوگيالىق جاعىندى الۋ ارقىلى جۇرگىزىلەتىن، اۋرۋدى ەرتە كەزەڭدە انىقتاۋعا مۇمكىندىك بەرەتىن قاراپايىم جانە ءتيىمدى ءادىس.
دارىگەرلەر بارلىق ايەلدەرگە ءتىپتى بولماشى بەلگىلەردىڭ ءوزىن ەلەمەۋگە بولمايتىنىن ەسكەرتىپ، گينەكولوگقا جۇيەلى تۇردە قارالىپ تۇرۋعا كەڭەس بەرەدى. 26 جاستاعى ناۋقاس جاعدايىندا دەر كەزىندە تەكسەرىلمەۋ ونىڭ رەپرودۋكتيۆتى فۋنكسياسىنان ايىرىلۋىنا سەبەپ بولدى.