الماتى قالاسىنداعى بۇۇ عيماراتىندا شتاتتىق سانى 120 ادامنان اساتىن 18 اگەنتتىك ورنالاسقان
قازاقستان پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى جانە الماتى قالاسىنىڭ اكىمى ەربولات دوسايەۆ بۇۇ اگەنتتىكتەرىنىڭ باسشىلارىمەن جانە وڭتۇستىك استانادا اككرەديتتەلگەن ديپلوماتيالىق كورپۋسپەن بىرلەسكەن كەزدەسۋ وتكىزدى، دەپ حابارلايدى Almaty-akshamy.kz.
الماتىداعى حالىقارالىق ۇيىمدارىنىڭ كەڭسەسىنە بارۋ بارىسىندا عيماراتقا «UN Plaza» اتاۋىن بەرۋ ءراسىمى ءوتتى. بۇل عيماراتتىڭ رەسمي يناۋگۋراسياسى 2019 جىلدىڭ مامىر ايىندا ق ر پرەزيدەنتى قاسىم-جومارت توقايەۆتىڭ قاتىسۋىمەن ءوتتى. بۇگىنگى تاڭدا الماتى قالاسىنداعى بۇۇ عيماراتىندا شتاتتىق سانى 120 ادامنان اساتىن 18 اگەنتتىك ورنالاسقان.
بۇۇ وكىلدەرىمەن كەزدەسۋ بارىسىندا م. تىلەۋبەردى بۇۇ-نىڭ قازاقستاندا بولعانىنا 30 جىل تولۋىمەن قۇتتىقتاپ، وسى كەزەڭدەگى ەلىمىز بەن جاھاندىق ۇيىم اراسىنداعى ءوزارا ءىس-قيمىلدىڭ جوعارى دەڭگەيىن اتاپ ءوتتى. قازاقستاننىڭ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ جونىندەگى باستاماسىنا ەرەكشە نازار اۋدارىلدى. «مۋلتيلاتەراليزمگە بەرىك سەنىم مەن مىندەتتەمە، بولجامدى جانە سىندارلى سىرتقى ساياسات قازاقستان ءۇشىن باسىمدىق بولىپ تابىلادى. وڭىرلىك ورتالىقتىڭ قىزمەتى بۇۇ وڭىرلىك دامۋ جۇيەسىن ىسكە اسىرۋ شەڭبەرىندە ءتيىمدى قۇرال بولادى»، – دەدى ق ر ءسىم باسشىسى.
سونىمەن قاتار، مينيستر كەزدەسۋگە قاتىسۋشىلاردى پرەزيدەنت ق. توقايەۆ باستاماشىلىق ەتكەن ەلدەگى ساياسي رەفورمالاردىڭ ىسكە اسىرىلۋ بارىسى جانە 2023 جىلعى 19 ناۋرىزدا جوسپارلانعان الداعى پارلامەنتتىك سايلاۋعا دايىندىق تۋرالى حاباردار ەتتى.
ءوز كەزەگىندە الماتىداعى بۇۇ مەن ديپلوماتيالىق كورپۋس وكىلدەرى ەل باسشىلىعىنىڭ «جاڭا جانە ادىلەتتى قازاقستاندى» قۇرۋعا باعىتتالعان كۇش-جىگەرىن جوعارى باعالادى جانە الماتىدا قىزمەتتى جۇزەگە اسىرۋ ءۇشىن قولايلى جاعدايدى قامتاماسىز ەتۋدە كورسەتكەن قولداۋى ءۇشىن ۇكىمەت پەن اكىمدىككە العىسىن ءبىلدىردى.