بازار يەلەرى ءوز ماسەلەلەرىن شەشۋ ءۇشىن قالا تۇرعىندارىن پايدالانادى
الماتى اكىمى ەربولات دوسايەۆ بۇگىن جەتىسۋ اۋدانىنىڭ تۇرعىندارىمەن كەزدەسۋ بارىسىندا «راحات» بازارىندا جۇمىس ىستەيتىن كاسىپكەرلەردىڭ سۇراعىنا جاۋاپ بەردى، دەپ حابارلايدى Almaty-akshamy.kz.
«راحات» بازارى كاسىپكەرىنىڭ سۇراعى:
- وتكەن جىلدىڭ ناۋرىز ايىندا ءبىزدىڭ جارىعىمىزدى ءوشىرىپ تاستادى. ءبىز جالداۋ اقىسىن جانە بارلىق سالىقتاردى تولەيمىز. اۋدان اكىمى: جەردى بوساتىڭىز، ول مەملەكەتكە تيەسىلى دەيدى. ال ءبىز كىمبىز؟ ءبىز جارىقسىز، وتىنسىز ءومىر سۇرەمىز، كومەكتەسىڭىزشى.
الماتى اكىمى ەربولات دوسايەۆتىڭ جاۋابى:
- وكىنىشكە وراي، مەن كومەكتەسپەيمىن. نەگە ەكەنىن تۇسىندىرەيىن. بازار يەلەرى سىزدەردى ۇنەمى الدارىنا سالادى: مىنە، ءسىز بارىڭىز، ايتىڭىز دەيدى. بۇل بازار تۇرعان جەر جالعا الىنعان، ول قالاعا قاتىستى، بازار يەلەرىنە ونىڭ ەش قاتىسى جوق. بازار يەلەرى ءوز ماسەلەلەرىن شەشۋ ءۇشىن قالا تۇرعىندارىن پايدالانادى.
مۇنداي ناشار جاعداي قالادا 56 بازاردىڭ ەشقايسىسىندا جوق. مەن بازاردا بولىپ، جاعدايدى ءوزىم كورگەن سوڭ ايتىپ وتىرمىن. بازار يەسى كوپ جىلدان بەرى وعان ءبىر تيىن دا سالماعان. اي سايىنعى جالداۋ اقىسىن ءسىز ونىڭ قالتاسىنا سالاسىز. ول ءسىز تۋرالى ويلاي ما؟ شاتىردى جابۋدىڭ ورنىنا، ول قالتاسىن ويلايدى.
بازار اۋماعىن مەملەكەت مەنشىگىنە بەرۋ تۋرالى سوت شەشىمى بار، ءبىز سوت شەشىمىمەن جۇمىس ىستەيمىز، باسقا جول جوق.
جەتىسۋ اۋدانىنىڭ اكىمى گۇلنار كوكەبايەۆانىڭ جاۋابى:
- ەربولات اسقاربەك ۇلى، مەن ول جاققا بىرنەشە رەت بارىپ، كورشى بازارلاردىڭ ديرەكتورلارىمەن سويلەستىم. ولاردىڭ بارلىعى ورىن بەردى، باعالارىن ايتتى، كەپىلدىكتەر بەردى، مەن وندا كاسىپكەرلەرگە نە ۇنامايتىنىن بىلمەيمىن.
الماتى اكىمى ەربولات دوسايەۆتىڭ جاۋابى:
- بيزنەستى جوعالتپاۋ جانە جاپپاۋ ءۇشىن باسقا ورىنعا كوشۋگە بولادى عوي. كورشى بازارلار جەڭىلدىك جاساۋعا، ءبىر جىلعا تۇراقتى جالداۋ باعاسىن بەلگىلەۋگە دايىن.
مەن ورىنباسارعا تاپسىرما بەرەمىن، ول ءسىزدى كەلەسى اپتادا قابىلدايدى. تاعى قانداي كومەك قاجەت، مۇمكىن بولسا كومەكتەسەمىن. ءبىراق تاعى دا قايتالايمىن، باسقا جەرگە، كورشى بازارلارعا كوشىڭىز.