وبىر دەرتى بەتى وڭايلىقپەن قايتا قوياتىن اۋرۋ ەمەس. بۇل – ۇلكەندى دە، كىشىنى دە جالماپ جاتقان اسا قاتەرلى كەسەل. دەگەنمەن، كەز كەلگەن راك اۋرۋى ەرتە ساتىسىندا، دەر شاعىندا انىقتالسا، ەم ناتيجەلى بولادى.
الماتىدا «قىزىل قىركۇيەك» اكسياسى اياسىندا دۇنيەجۇزىلىك سۇيەك كەمىگى دونورلارىنىڭ جانە دۇنيەجۇزىلىك سوزىلمالى ميەلويدتى لەيكوزبەن كۇرەس كۇندەرىنە وراي ءىس-شارالار ۇيىمداستىرىلدى. المالى اۋدانىنىڭ ونكولوگى گۇلنۇر باشاروۆا مەن №30 قالالىق ەمحانانىڭ ونكولوگى ايگەرىم باقاسوۆا اتالعان ەمحانادا تىركەۋدە تۇرعان تۇرعىندارمەن كەزدەسىپ، قاننىڭ قاتەرلى ىسىگى تۋرالى نە ءبىلۋ كەرەكتىگىمىز، قالاي ساقتانۋ قاجەتتىگى جايىندا اڭگىمەلەدى. سونداي-اق، ەمحانا ماماندارىنا دا كەڭەستەر بەرىلدى.
"سۇيەك كەمىگىندەگى جاسۋشالار قالىپتى ەمەس نەمەسە جىلدام وسە باستاعاندا سۇيەك كەمىگىنىڭ قاتەرلى ىسىگى نەمەسە قان راگى پايدا بولادى. بۇل اۋرۋ تەز (اۋرۋدىڭ جەدەل تۇرىندە) نەمەسە باياۋ (اۋرۋدىڭ سوزىلمالى تۇرىندە) داميدى. قاننىڭ قاتەرلى ىسىگىمەن جاستار دا، قارتتار دا، ءتىپتى، بالالار دا اۋرۋى مۇمكىن. اۋرۋدىڭ پايدا بولۋىنىڭ ناقتى سەبەبى جوق، ءبىراق سەبەپ بولۋى مۇمكىن بىرنەشە فاكتور بار. ولار: تۇكىمقۋالاۋشىلىق (ەگەر اتا-بابالارىندا قاننىڭ قاتەرلى ىسىگى بولسا، تۇقىم ارقىلى بەرىلۋى مۇمكىن)؛ زياندى حيميالىق زاتتاردىڭ اسەرى؛ جوعارى دارەجەلى رادياسيا؛ ۆيچ -ينفەكسيا؛ داۋن اۋرۋى؛ زياندى ادەتتەر (ءجيى تەمەكى تارتۋ).
باسقا ونكولوگيالىق اۋرۋلار سياقتى قاننىڭ قاتەرلى ىسىگىن باستاپقى ساتىسىندا ەمدەۋ ءتيىمدى. ءبىراق العاشقى كەزەڭىندە انىقتاۋ كوپ جاعدايدا مۇمكىن بولمايدى. العاشقى بەلگىلەرى: تەز شارشاعىشتىق، السىزدىك، تەمپەراتۋرانىڭ كوتەرىلۋى، تەرشەڭدىك، يممۋنيتەتتىڭ تومەندەۋى، باستىڭ اۋرۋى، تابەتتىڭ تومەندەۋى، ءجيى ينفەكسيالىق اۋرۋلارمەن اۋرۋى مۇمكىن. ەگەر قاندايدا ءبىر وسى ايتىلعان بەلگىلەر ۇزاق ۋاقىت مازالاسا، مەكەنجاي بويىنشا تىركەلگەن ەمحاناعا بارىپ تەكسەرۋدەن وتكەن دۇرىس. بۇل بىزگە اۋرۋدى ەرتە انىقتاپ، ۋاقىتىلى ەمدەۋگە مۇمكىندىك بەرەدى"، – دەيدى ونكولوگ-دارىگەر گۇلنۇر باشاروۆا.