بۇل باعدارلاما شارتى بويىنشا 20 جىلعا دەيىن كرەديت بەرىلەدى
«بايتەرەك» حولدينگىنىڭ ەنشىلەس ۇيىمى «وتباسى بانك» اق دامۋ الەۋەتى تومەن مونوقالالاردىڭ تۇرعىندارى ءۇشىن جەڭىلدەتىلگەن يپوتەكا باعدارلاماسىن ازىرلەۋدە، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇل تۋرالى ۇكىمەتى وتىرىسىندا حولدينگ باسقارماسىنىڭ ءتوراعاسى ايدار ءارىپحانوۆ ايتتى.
ونىڭ ايتۋىنشا، بۇل يپوتەكانىڭ شارتتارى مىناداي: باستاپقى جارنا - 10%، سىياقى مولشەرلەمەسى 5%-عا دەيىن، كرەديت مەرزىمى - 20 جىلعا دەيىن.
«قازىرگى ۋاقىتتا باعدارلامانىڭ نەگىزگى پارامەترلەرىن مەملەكەتتىك ورگاندارمەن كەلىسۋدەمىز. الدىن الا ەسەپتەۋلەر بويىنشا، بۇل ماقساتتارعا 2022-2025 جىلدارى رەسپۋبليكالىق بيۋدجەتتەن جىل سايىن شامامەن 11 ملرد تەڭگە ءبولۋ قاجەت. ءونىم 2022 جىلدىڭ ءبىرىنشى توقسانىندا ىسكە قوسىلماقشى»، - دەپ ءتۇسىندىردى ايدار ءارىپحانوۆ.
«بايتەرەك» حولدينگىنىڭ باسشىسى وبليگاسيالاردى ساتىپ الۋ تەتىگى ارقىلى كرەديتتىك تۇرعىن ءۇي قۇرىلىسى باعىتى بويىنشا وتكەن جىلى اكىمدىكتەرگە جالپى سوماسى 163،7 ملرد تەڭگە قورلاندىرۋ، ياعني بەكىتىلگەن جوسپاردىڭ 100%-ى بەرىلگەنىن حابارلادى.
"تۇرعىن ءۇي قۇرىلىس جيناقتارى" جۇيەسى بويىنشا 2021 جىلى حالىققا جالپى سوماسى 1،235 ترلن تەڭگەگە 82،2 مىڭ جەڭىلدىكپەن قارىز بەرىلدى. "وتباسى بانك" جۇيەسىندە 1،5 ترلن تەڭگە بولاتىن 2،2 ملن شارت بار.
ۇلەستىك تۇرعىن ءۇي قۇرىلىسى بويىنشا جالپى سوماسى 372 ملرد تەڭگە جانە اۋدانى 2 ملن شارشى مەتر بولاتىن 70 جوبا كەپىلدەندىرىلدى.
سونداي-اق، جەكە قۇرىلىس سالۋشىلاردىڭ كرەديتتەرىن سۋبسيديالاۋ بويىنشا جوبالار جالپى سوماسى 27،8 ملرد تەڭگەگە ماقۇلداندى (بۇل 275 مىڭ شارشى مەتر تۇرعىن ءۇي)، ال جوسپار بويىنشا 20 ملرد تەڭگە بولعان.