قىتايمەن ءوزارا ساۋدا-ساتتىق تۋرالى ەكى ەلدىڭ ستاتيستيكالىق مالىمەتتەرى ەكى ءتۇرلى. ولاردىڭ اراسىندا ميللياردتاعان دوللار ايىرماشىلىق بار. بۇل تۋرالى ق ر پرەزيدەنتى قاسىم-جومارت توقايەۆ سىبايلاس جەمقورلىققا قارسى ءىس-قيمىل ماسەلەلەرى جونىندە كەڭەستە ايتتى، دەپ حابارلايدى almaty-akshamy.kz
«قىتايمەن ءوزارا ساۋدا-ساتتىق تۋرالى ەكى ەلدىڭ ستاتيستيكالىق مالىمەتتەرى ەكى ءتۇرلى. ولاردىڭ اراسىندا ميللياردتاعان دوللار ايىرماشىلىق بار. بىلتىر بۇل كورسەتكىش 5،7 ميلليارد دوللارعا جەتتى. مۇنداي ۇلكەن ايىرماشىلىق قالاي پايدا بولعانىن ەشكىم ءتۇسىندىرىپ بەرە المايدى. اشىعىن ايتقاندا، بۇل – كونتراباندا. كەلەڭسىزدىكتىڭ بار ەكەنىن كاسىپكەرلەر دە راستاپ وتىر. ساۋالناماعا قاراساق، شەتەلمەن ساۋدا جاسايتىن ادامداردىڭ 90 پايىزى جەمقورلىقپەن بەتپە-بەت كەلگەن. ونىڭ ىشىندە 45 پايىزى كەدەنشىلەرگە پارا بەرۋگە ءماجبۇر بولعان. سىبايلاس جەمقورلىققا قارسى ءىس-قيمىل اگەنتتىگى شىعىس قازاقستان وبلىسىنداعى ءۇش كولىكتىك باقىلاۋ بەكەتىن جەمقورلىق ابدەن جايلاعانىن انىقتادى. ەلىمىزدە مۇنداي 49 بەكەت بار. كەدەن جانە كولىكتىك باقىلاۋ سالاسىنداعى پاراقورلىق ترانزيتتىك الەۋەتىمىزدى تولىق پايدالانۋعا مۇمكىندىك بەرمەي وتىر»، – دەدى قاسىم-جومارت توقايەۆ.