سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى كەڭەيتىلگەن وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭداردى تالقىلادى، دەپ حابارلايدى Almaty-akshamy.kz.
بۇل تۋرالى سەناتتىڭ باسپا ءسوز قىزمەتى مالىمدەدى.
قۇجاتتار ازاماتتاردى قۇمار ويىندار مەن ءباس تىگۋگە قاتىسۋ كەزىندە ويىنعا تاۋەلدىلىكتەن قورعاۋ جونىندەگى زاڭنامانى جەتىلدىرۋگە باعىتتالعان. زاڭداردا قۇمار ويىندار مەن ءباس تىگۋگە قاتىساتىن ادامداردىڭ شەكتەۋلى ءتىزىمىن ايقىنداۋ، قۇمار ويىندارعا تاۋەلدى ادامداردى مەديسينالىق وڭالتۋ ءتارتىبى بەلگىلەنەدى جانە ولاردى كونسۋلتاسيالىق مەديسينالىق بايقاۋدان وتكىزۋ ەنگىزىلەدى، بۋكمەكەرلىك كەڭسەلەر مەن توتاليزاتورلاردى سىرتقى جارنامادا، اتاپ ايتقاندا: عيماراتتاردا، كولىك قۇرالدارىندا، بۇقارالىق اقپارات قۇرالدارىندا، كينولاردا، بەينەجازبالار مەن انىقتامالىق قىزمەت كورسەتۋ بارىسىندا جارنامالاۋعا تىيىم سالىنادى.
ودان باسقا، لوتەرەيا بيلەتتەرىن تاراتۋعا قويىلاتىن تالاپتار بەلگىلەنەدى جانە قازاقستاندا ليسەنزياسىز شەتەلدىك بۋكمەكەرلىك كەڭسەلەر مەن توتاليزاتورلاردىڭ ينتەرنەت-رەسۋرستارىنىڭ قىزمەتىنە تىيىم سالىنادى. قۇمار ويىندار مەن ءباس تىگۋدىڭ قاۋىپتىلىگى مەن زيانى تۋرالى ەسكەرتۋلەردى ويىن مەكەمەلەرىندە، بۋكمەكەرلىك كەڭسەلەردە، توتاليزاتوردا، كازينودا، ويىن اۆتوماتى زالدارىندا، سونداي-اق وزدەرىنىڭ ينتەرنەت-رەسۋرستارىندا ورنالاستىرۋ تالاپتارىن ساقتاماعانى ءۇشىن ويىن بيزنەسىن ۇيىمداستىرۋشىلارعا اكىمشىلىك جاۋاپكەرشىلىك ەنگىزۋ كوزدەلىپ وتىر.
سەناتورلاردىڭ ايتۋىنشا، زاڭداردى قابىلداۋ ويىن بيزنەسى، لوتەرەيا جانە لوتەرەيا قىزمەتى سالاسىن رەتتەۋدىڭ نورماتيۆتىك نەگىزىن تۇجىرىمدامالىق تۇرعىدا قالىپتاستىرۋعا مۇمكىندىك بەرەدى جانە ۇلتتىق زاڭنامانى جانە ولاردىڭ قۇقىق قولدانۋ تاجىريبەسىن ودان ءارى جەتىلدىرۋگە ىقپال ەتەدى.
كوميتەت مۇشەلەرى تالقىلاۋ قورىتىندىسى بويىنشا زاڭداردى پالاتا وتىرىسىندا قاراۋعا جىبەرۋ تۋرالى شەشىم قابىلدادى.