سەنات سپيكەرى ماۋلەن اشىمبايەۆتىڭ توراعالىعىمەن ينكليۋزيا جونىندەگى كەڭەستىڭ كەزەكتى وتىرىسى ءوتتى.
دەپۋتاتتار مەملەكەتتىك ورگاندار مەن ساراپتامالىق قوعامداستىق وكىلدەرىمەن بىرلەسىپ، ەرەكشە قاجەتتىلىگى بار ادامداردىڭ ساپالى ءبىلىم الۋ مۇمكىندىكتەرىن كەڭەيتۋ جونىندە ۇسىنىستار الماسىپ، ولاردى ىسكە اسىرۋ جولدارىن تالقىلادى. وتىرىس جۇمىسىنا وقۋ-اعارتۋ ءمينيسترى، عىلىم جانە جوعارى ءبىلىم، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ ۆيسە-مينيسترلەرى، حالىقارالىق ۇيىمداردىڭ وكىلدەرى قاتىستى، دەپ حابارلايدى aqshamnews.kz.
وقۋ-اعارتۋ ءمينيسترى عاني بەيسەمبايەۆ ينكليۋزيۆتى ءبىلىم بەرۋدى دامىتۋ بويىنشا قابىلدانىپ جاتقان شارالارعا توقتالىپ، ءبىلىم بەرۋ مۇمكىندىكتەرىن كەڭەيتۋ بويىنشا باستامالار مەن ۇسىنىستارىن جەتكىزدى. بۇگىنگى تاڭدا قازاقستاندىق مەكتەپتەردە ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتا قۇرىلۋدا. وسىلايشا، مەكتەپتەردىڭ 88%-ى ينكليۋزيۆتى ءبىلىم الۋعا جاعداي جاسادى. 2024 جىلى 5 مىڭنان استام پەداگوگ قايتا دايارلاۋ كۋرستارىنان ءوتتى.
سەنات سپيكەرى ماۋلەن اشىمبايەۆ تەڭ مۇمكىندىكتى ينكليۋزيۆتى قوعام قالىپتاستىرۋ ەل پرەزيدەنتىنىڭ رەفورمالارىنىڭ كۇن تارتىبىندەگى ماڭىزدى باسىمدىقتاردىڭ ءبىرى ەكەنىن اتاپ ءوتتى. بۇل باعىتتا سوڭعى جىلدارى جۇيەلى جۇمىستار جۇرگىزىلۋدە جانە كوپتەگەن سالالاردا، سونىڭ ىشىندە وقۋ-اعارتۋ جۇيەسىندە وڭ ديناميكا بايقالادى.
سەنات سپيكەرى ينكليۋزيۆتى ءبىلىم بەرۋدى دامىتۋ جونىندەگى جۇمىستى كۇشەيتۋ قاجەتتىلىگىن اتاپ ءوتتى. ەرەكشە قاجەتتىلىگى بار ادامداردىڭ ءبىلىم الۋ مۇمكىندىكتەرىن كەڭەيتۋ جونىندەگى ازىرلەنگەن ۇسىنىستار مۇددەلى تاراپتاردىڭ بىرلەسكەن جۇمىسى ءۇشىن ءتيىستى مەملەكەتتىك ورگاندارعا جولداناتىن بولادى.