پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ەلىمىزدەگى سۋ تاسقىنى جاعدايىنا قاتىستى ماسەلە قارالدى.
جالپى ەلىمىزدە سۋ تاسقىنى كەزەڭىنىڭ تۇراقتى ءوتۋى بايقالادى، دەپ حابارلايدى aqshamnews.kz.
اقتوبە، اتىراۋ، باتىس قازاقستان جانە قوستاناي وبلىستارىندا ۋاقتىلى قابىلدانعان شارالار ۇيلەردى سۋ باسۋىنا جانە وسى وڭىرلەردىڭ تۇرعىندارىنا زيان كەلتىرۋگە جول بەرگەن جوق. سونىمەن قاتار سولتۇستىك قازاقستان وبلىسىنداعى ەسىل وزەنىندە سۋ دەڭگەيىنىڭ كوتەرىلۋى بولجانۋدا. شىعىس قازاقستان وبلىسىنىڭ تاۋلى اۋداندارىندا ءالى دە 50%-عا جۋىق قار جاتىر.
اقمولا وبلىسىندا ءساۋىر ايىنىڭ باسىندا 100-دەن استام تۇرعىن ءۇي سۋ استىندا قالدى. ءقازىر احۋال تۇراقتالدى، ءقاۋىپ سەيىلدى دەپ ايتۋعا بولادى. توسىن جاعدايعا ەلدى مەكەندەردى قورعاۋ بويىنشا ينجەنەرلىك جۇمىستاردىڭ دۇرىس جۇرگىزىلمەۋى، سۋ تاسقىنىنا قارسى ءىس-شارالاردى جوسپارلاۋ مەن ورىنداۋدىڭ ساپاسىز جۇرگىزىلۋى سەبەپ بولعانى اتالدى. ماسەلەن، ەسكى قالقۇتان اۋىلىندا قالقۇتان وزەنىن تازارتۋ، جاعالاۋىن بەكىتۋ جانە تەرەڭدەتۋ جۇمىستارى 3 شاقىرىمداي عانا ۋچاسكەدە جۇرگىزىلگەن. ال جوبا بويىنشا 11 شاقىرىم بەكىتىلۋگە ءتيىس بولاتىن. سونىمەن قاتار ماكينسك قالاسىنا دا سۋ جايىلدى.
«ايتا كەتەيىك، وڭىردە ءدال وسى ەلدى مەكەندەردى جىل سايىن سۋ باسادى. دەمەك، اقمولا وبلىسىندا قابىلدانىپ جاتقان شارالار ءتيىمسىز. مارات مۇرات ۇلى، جوسپاردى قايتا قاراپ، بيىل بارلىق قاجەتتى جۇمىستاردى ىسكە اسىرىڭىز. باسپانالارى مەن جەر تەلىمدەرى سۋ استىندا قالعان تۇرعىندارعا جاردەمدەسىپ، كومەك كورسەتىڭىزدەر. توتەنشە جاعدايلار مينيسترلىگىنە مۇددەلى مەملەكەتتىك ورگاندارمەن بىرلەسىپ، سۋ تاسقىنى جاعدايىنا تاۋلىك بويى مونيتورينگ جۇرگىزۋدى جالعاستىرۋدى تاپسىرامىن. كۇشتەر مەن قۇرالدار ءاردايىم جەدەل ارەكەت ەتۋگە دايىن بولۋى ءتيىس»، — دەپ اتاپ ءوتتى ولجاس بەكتەنوۆ.
ۇكىمەت وتىرىسى سوڭىندا پرەمەر-مينيستر ولجاس بەكتەنوۆ مينيسترلىكتەر مەن اكىمدىكتەرگە ءبىرقاتار تاپسىرما بەردى:
- اقمولا، اباي، شىعىس قازاقستان جانە سولتۇستىك قازاقستان وبلىستارىنىڭ اكىمدىكتەرى سۋ تاسقىنىنا بايلانىستى جاعدايدىڭ ۋشىعىپ كەتۋىنە جول بەرمەۋ ءۇشىن بارلىق شارا قابىلداسىن. جاۋاپكەرشىلىكپەن ءارى شۇعىل قيمىلداپ، ۋاكىلەتتى مەملەكەتتىك ورگاندار مەن ەل باسشىلىعىن حاباردار ەتۋ قاجەت. تۇرعىندارمەن كەرى بايلانىس ورناتىپ، ولاردىڭ وتىنىشتەرىنە دەرەۋ قۇلاق اسۋ كەرەك.
- سۋ رەسۋرستارى مينيسترلىگى مەن اكىمدىكتەر، اسىرەسە ەلىمىزدىڭ سولتۇستىك جانە شىعىس وڭىرلەرىندە ورنالاسقان سۋ قويمالارى مەن نىساندارداعى سۋدىڭ دەڭگەيىن ەرەكشە باقىلاۋدا ۇستاۋ قاجەت. گيدروتەحنيكالىق قۇرىلىستاردىڭ قاۋىپسىزدىگىن قامتاماسىز ەتۋ كەرەك.
- توتەنشە جاعدايلار، ىشكى ىستەر مينيسترلىكتەرى مەن ءوڭىر اكىمدىكتەرىنە احۋال كۇردەلەنە تۇسكەن جاعدايدا ونى باقىلاۋدا ۇستاۋدى تاپسىرامىن. قاجەت بولسا، قوسىمشا كۇشتەر مەن قۇرالداردى جۇمىلدىرۋ كەرەك.
- كولىك مينيسترلىگى ءوڭىر اكىمدىكتەرىمەن بىرگە زاقىمدانعان جول ينفراقۇرىلىمىن قالپىنا كەلتىرۋ بويىنشا شارالار قابىلداسىن. جولدار مەن كوپىرلەردىڭ جاعدايىنا تۇراقتى تۇردە مونيتورينگ جۇرگىزۋ قاجەت.
- ەكولوگيا مينيسترلىگى اۋا رايى بولجامىنىڭ ناشارلاۋىنا قاتىستى اقپارات العان كەزدە دابىلدى ەسكەرتۋلەر تۋرالى ءتيىستى مەملەكەتتىك ورگانداردى جەدەل حاباردار ەتسىن.
- سيفرلىق دامۋ مينيسترلىگى سۋ تاسقىنىن بولجاۋ جانە مودەلدەۋ جۇمىستارىن جالعاستىرسىن. Tasqyn اقپاراتتىق جۇيەسىن ونىڭ جۇمىسىنا قاتىستى ايتىلعان سىن مەن انىقتالعان كەمشىلىكتەردى نازارعا الا وتىرىپ جەتىلدىرسىن.
- بىلتىرعى سۋ تاسقىنىن ەسكەرە وتىرىپ، تج زارداپتارىن جويۋ جانە تۇرعىندارعا كومەك كورسەتۋ ماسەلەلەرى بويىنشا بارلىق نورماتيۆتىك قۇقىقتىق اكتىلەردى وزەكتەندىرۋ جۇمىسىن ءبىر اپتا مەرزىمدە اياقتاۋ قاجەت.